ကိုးကန့်လက်နက်ကိုင်တပ်ဖွဲ့(MNDAA)နှင့် အာဏာ သိမ်းစစ်ကောင်စီတပ်တို့သည် နိုဝင်ဘာလအတွင်း တိုက်ပွဲ အကြီးအသေး ၁၂၆ကြိမ်ဖြစ်ပွားခဲ့ကြောင်း MNDAAက ထုတ်ပြန်သည်။
ပြီးခဲ့သည့် နိုဝင်ဘာအတွင်း အထူးဒေသ(၁)ကိုးကန့်ခရိုင် ၊ မုံးကိုးခရိုင် ၊ မူပန်(သိန္နီ)ခရိုင် စသောနေရာများတွင် တိုက်ပွဲများဖြစ်ပွားခဲ့သည်ဟု ဆိုသည်။
ကိုးကန့်နယ်မြေ ဟုန်ရှင်းဒေသ ၊ ရှင်ဝမ့်ဒေသနှင့် ရှိရှန်ဒေသတို့၌ တိုက်ပွဲ ၁၂ကြိမ်ဖြစ်ခဲ့ပြီး မုံးကိုးနယ်မြေအတွင်း ၇၂ကြိမ် ၊ မူပန်နယ်မြေတွင် ၄၂ကြိမ်ဖြစ်ပွားခဲ့ကြောင်း ဖော်ပြထားသည်။
နိုဝင်ဘာ၁၂ နှင့် ၁၃ရက် မှအပ အခြားရက်များတွင် တိုက်ပွဲနေ့စဉ်ဖြစ်ပွားခဲ့၍ နိုဝင်ဘာလအတွင်း ရက်ပေါင်း ၃၀ရှိရာ ၂၈ရက် တိုက်ပွဲဖြစ်ပွားခဲ့ခြင်းဖြစ်သည်။
Public Service Announcement
စစ်ကောင်စီတပ်အနေဖြင့် မြေပြင်မှထိုးစစ်ဆင်ရာတွင် လက်နက်ကြီးပစ်ခတ်မှု အလုံးအရင်း ပြုလုပ်ခဲ့ကြောင်း၊ နိုဝင်ဘာလအတွင်း စစ်ကောင်စီတပ်မှ MNDAA တပ်စခန်းများဆီသို့ လက်နက်ကြီးဖြင့် အကြိမ် ၂၃၀၀ ကျော် ပစ်ခတ်ခဲ့ပြီး မုံးကိုးဒေသ မန်ရန်တပ်စခန်း နှင့် ရှိကျိကျတောင် တန်းတွင် လက်နက်ကြီးကျည် ကျရောက်မှုအများဆုံးဖြစ်သည်ဟု ဆိုသည်။
စစ်ကောင်စီ၏ အဆက်မပြတ်ထိုးစစ်ဆင်တိုက်ခိုက်လာခြင်းကြောင့် နှစ်ဘက်၏ စစ်ရေး လှုပ်ရှားမှုများဆက်လက် ပြင်းထန်နိုင်ကြောင်းလည်း ထုတ်ပြန်ခဲ့သည်။
MNDAAနှင့် စစ်ကောင်စီတပ်တို့သည် ဇူလိုင်လလယ်မှစ၍ မုံးကိုးဒေသ၌ တိုက်ပွဲများ ဖြစ်ပွားခဲ့ခြင်းဖြစ်သည်။
