စက်တင်ဘာ ၁၇၊ ၂၀၂၆။ ထားမြတ်/People’s Spring
ကချင်ပြည်နယ်၊ ဗန်းမော်မြို့နယ်နဲ့ မံစီမြို့နယ်ကြား ကောင်ဂျာယန်ဒေသမှာ ဖြစ်ပွားခဲ့တဲ့ တိုက်ပွဲအတွင်း စစ်တပ်က သေဆုံးထိခိုက်များခဲ့ပြီး စစ်သုံ့ပန်းတွေ ဖမ်းမိသလို ထွက်ပြေးစစ်သားတွေ ပုန်းအောင်းရာ နေရာတွေကို လိုက်လံရှင်းလင်းနေကြောင်း KIA သတင်းပြန်ကြားရေးဌာနက ဖော်ပြပါတယ်။
စက်တင်ဘာ ၁၃ရက်မှာ အင်အား ၁၀၀ ခန့်ပါ စစ်ကြောင်းကို ကောင်ဂျာယန်ကျေးရွာမှာ ကြားဖြတ်တိုက်ခိုက်ခဲ့တာဖြစ်ပြီး အလောင်းအများအပြားနဲ့ လက်နက်ခဲယမ်းများ သိမ်းရခဲ့ကြောင်း အသိပေးပါတယ်။ အဲဒီစစ်ကြောင်းဟာ ၂၀၂၅ ဇန်နဝါရီမှာ KIA ပူးပေါင်းတပ် သိမ်းထားတဲ့ မံစီမြို့နယ်က စစ်တပ်ရဲ့ ခမရ(၃၁၉)၊ ခမရ(၆၀၁)တပ်ရင်း စတဲ့ တပ်ဟောင်းနေရာတွေကို နေရာပြန်ဝင်ယူဖို့ ထိုးဝင်လာတာ ဖြစ်နိုင်ကြောင်း KIAက ဖော်ပြပါတယ်။
ကောင်ဂျာယန်တိုက်ပွဲမှာ အထိနာ ထွက်ပြေးသွားတဲ့ စစ်သားတွေဟာ ဒေသခံတွေ စစ်ရှောင်သွားတဲ့ အိမ်ဟောင်းများနဲ့ ခြုံတောတွေထဲ ပုန်းအောင်းနေနိုင်တာကြောင့် KIA တပ်ဖွဲ့က လိုက်လံရှင်းလင်းနေကြောင်းလည်း အသိပေးပါတယ်။
Public Service Announcement
ဒါ့အပြင် အခု ရက်ပိုင်းမှာ ဗန်းမော်မြို့က စစ်တပ်တွေဟာ မြို့ပြင်ထွက်ပြီး စစ်ရေးလှုပ်ရှားမှု ခပ်စိပ်စိပ်ရှိလာသလို လေကြောင်းကနေ အပြင်းအထန် ဗုံးကြဲတိုက်ခိုက် လျက်ရှိကြောင်းလည်း ဖော်ပြထားပါတယ်။
ကချင်စစ်ရေးသတင်းရင်းမြစ်ကလည်း ကောင်ဂျာယန်တိုက်ပွဲမှာ ဖမ်းမိထားတဲ့ စစ်ကောင်စီတပ်ဖွဲ့ဝင်တွေရဲ့ ရုပ်သံမှတ်တမ်းကို ပြသပါတယ်။
အဲဒီ ရုပ်သံမှာ စစ်သားတွေကို တော်လှန်ရေးရဲဘော်တွေက ကြိုးတုပ်နေတာကို တွေ့ရရပြီး တော်လှန်ရေးရဲဘော် ၁ဦးက ဆေးကုသတက်တဲ့သူပါလားဟု မေးမြန်းရာ ဆေးမှူးက ထွက်ပြေးသွားတယ်လို့ စစ်သုံ့ပန်း တစ်ဦးက ပြောပါတယ်။
ကောင်ဂျာယန်တိုက်ပွဲမှာ စစ်တပ်ဘက်က သေဆုံးသူ ၄၀ကျော်ရှိကာ သုံ့ပန်း ၃၀ ကျော်ရှိတယ်လို့ စစ်ရေးသတင်းရင်းမြစ်က ပြောပါတယ်။
စစ်သုံ့ပန်းတွေ ဖမ်းမိထားတဲ့ ရုပ်သံမှာ တော်လှန်ရေးရဲဘော်တွေက မင်းတို့အဘတွေကို ဆဲရဲလားဟု မေးမြန်းရာ ဆဲရဲပါတယ်လို့ ပြောကြားပြီး ဖမ်းဆီးခံထားရတဲ့ စစ်တွေက မင်းအောင်လှိုင်ကို ဆဲဆိုခဲ့ကြသလို အသံကျယ်ကျယ်အော်ဆဲကြဖို့လည်း တော်လှန်ရေးရဲဘော်တွေက ပြောဆိုတာကို ကြားရပါတယ်။
စစ်တပ်ဟာ ဩဂုတ်လကုန်ပိုင်းနဲ့ စက်တင်ဘာလတွေမှာ ကချင်ပြည်နယ်အတွင်း မြေပြင်၊ ရေကြောင်း တိုက်ပွဲတွေမှာ အထိနာလျက်ရှိပါတယ်။ အထူးသဖြင့် ဗန်းမော်နဲ့ ရွှေကူမြို့နယ်မှာ မြေပြင်တိုက်ပွဲတွေ ပြင်းထန်ခဲ့သလို ဗန်းမော်ကို စစ်အင်အားဖြည့်ဖို့ တက်လာတဲ့ စစ်တပ် သင်္ဘောအုပ်စုဟာလည်း ရွှေကူ-ဗန်းမော်ကြား တိုက်ခိုက်ခံရပြီး သင်္ဘောမျိုးစုံ အစီး ၂၀ကျော်ကို KIA ပူးပေါင်းတပ်က ဖျက်ဆီးထားနိုင်ခဲ့ပါတယ်။
