ဇန်နဝါရီ-၃၀၊၂၀၂၆။ရောင်နီ/People’s Spring
ရန်ကုန်မြို့၊ ဒဂုံမြို့သစ်တောင်ပိုင်းမြို့နယ် အမှတ်(၂)လမ်းမပေါ်မှာ YBSနဲ့ အငှားယာဉ်တိုက်မိပြီး အမျိုးသားတစ်ဦး သေဆုံးခဲ့တယ်လို့ သွားရောက်ကူညီခဲ့တဲ့ သု၀ဏ္ဏပရဟိတအသင်းက အသိပေးထားပါတယ်။
ဇန်နဝါရီ ၂၉ရက် ည ၁၁နာရီကျော်မှာ YBSက အငှားယာဉ်ကို ဝင်တိုက်ခဲ့တာကြောင့် အငှားယာဉ် ပေါ်မှာလိုက်ပါလာသူ နှစ်ဦးစလုံး အပြင်းအထန်ဒဏ်ရာရရှိခဲ့တာပါ။
ဒဏ်ရာရရှိသူတွေကို မိတ်ဖက်ပရဟိတအသင်းတွေနဲ့ ကူညီကယ်ဆယ်ရေးပြုလုပ်ပေးခဲ့ပြီး မြောက်ဥက္ကလာပဆေးရုံကို ပို့ဆောင်ခဲ့ရာမှာ တစ်ဦးသေဆုံးသွားတယ်လို့ အထက်ပါပရဟိတအသင်းက အသိပေးထားပါတယ်။
Public Service Announcement
ကျန်တစ်ဦးကလည်း အတွင်းလူနာအနေနဲ့ ဆက်လက်ကုသမှုခံယူနေရတယ်လို့ သိရပါတယ်။
ရန်ကုန်မြို့မှာ ဇန်နဝါရီ ၁ရက်ကလည်း ယာဉ်တိုက်မှု လေးကြိမ်ဖြစ်ခဲ့ပြီး ငါးဦးသေဆုံးခဲ့ပါတယ်။
ဒါ့အပြင် ဇန်နဝါရီ ၂ရက်နဲ့ ၃ရက်မှာလည်း ယာဉ်တိုက်မှုကြောင့် သေဆုံးသူ နှစ်ဦးရှိခဲ့တာကြောင့် ဇန်နဝါရီပထမပတ်အတွင်းမှာ ယာဉ်တိုက်မှုကြောင့် သေဆုံးသူ ခုနစ်ဦးအထိရှိခဲ့ပါတယ်။
