ဒုံးတောအပါအဝင် ကျေးရွာ ၈ ရွာက လူ ၂ သောင်းလောက် စစ်ကောင်စီတပ်ဖွဲ့တွေကြောင့် တိမ်းရှောင်နေရ
စစ်ကိုင်းတိုင်းဒေသကြီး၊ ယင်းမာပင်ခရိုင် ဆားလင်းကြီးမြို့နယ်ထဲက ဒုံးတောကျေးရွာအပါအဝင် အနီးပတ်ဝန်ကျင်က ကျေးရွာ ၈ ရွာလောက်ဟာ အကြမ်းဖက်စစ်ကောင်စီတပ်ဖွဲ့ဝင်တွေကြောင့် ဘေးလွတ်ရာကို ထွက်ပြေးတိမ်းရှောင်နေရတယ်လို့သိရပါတယ်။
စစ်ကောင်စီတပ်ဖွဲ့ဝင်တွေဟာ နယ်မြေရှင်လင်းရေးဆိုကာ ရွာသားတွေကို သတ်ဖြတ်တာ ၊ ဖမ်းဆီးရိုက်နှက်တာ ၊လူသားဒိုင်းအဖြစ် အသုံးပြုတာတွေလုပ်နေတာလို့ ဒေသခံတွေက ပြောကြပါတယ်။
ဒီနေ့ ဒီဇင်ဘာလ ၈ ရက်အထိ ဒုံးတော၊ ဖောင်းကား၊ ဘိန်းနွယ်ချောင်၊ ကျေးစာပြ၊ ဂုန်းတော၊ ဒုံးတော၊ သံကုန်းစတဲ့ကျေးရွာတွေက လူဦးရေ ၂သောင်းကျော်လောက်ဟာ ဘေးလွတ်ရာကိုထွက်ပြေးတိမ်းရှောင်နေရပါတယ်။
Public Service Announcement
ဒုံးတော ရွာမှာတော့ မနေ့က ရွာသား ၁၁ ဦးကို စစ်ကောင်စီတပ်တွေဟာ မီးရှို့သတ်ဖြတ်ခဲ့ပြီး ပျောက်ဆုံးနေသူတွေကို ရှာဖွေရာမှာ ဒီနေ့မနက်ပိုင်းက အလောင်း ၃ လောင်း ထပ်တွေ့ရတယ်လို့ ဒေသခံတွေဆီကသိရပါတယ်။
ထပ်တွေ့တဲ့အလောင်း ၃ လောင်းဟာ အသက် ၅၀ အရွယ်အမျိုးသား ၊ သက်ကြီးပိုင်းအမျိုးသမီး နဲ့
လူငယ်အရွယ်အမျိုးသမီးတို့ ဖြစ်တယ်လို့ မျက်မြင်တွေ့ရသူတစ်ဦးကပြောပါတယ်။
“မနက်အစောလေးတင် သေနေတာတွေ့ရတယ်၊ စစ်တပ်ကပဲသတ်သွားတာ၊ ရွာရှိလူစာရင်းအရ ၅ယောက်လောက်လည်းပျောက်နေသေးတယ်”လို့ ဒုံးတောရွာသားတစ်ဦးကပြောပါတယ်။
