ဘောလခဲတိုက်ပွဲ စစ်ကောင်စီတပ်မှ သုံးဦးသေ၊ နှစ်ဦးဒဏ်ရာရ

ကရင်နီ(ကယား)ပြည်နယ် ဘောလခဲမြို့နယ်တွင် တိုက်ပွဲဖြစ်၍ စစ်ကောင်စီတပ်မှ သုံးဦးသေ၊ နှစ်ဦးဒဏ်ရာရခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF) က သတင်းထုတ်ပြန်သည်။

ယမန်နေ့ (ဒီဇင်ဘာ၇ရက်) ညနေပိုင်းက ဘောလခဲမြို့နယ် နန်းဖဲကျေးရွာ မဲ့စလောင်းတောင်ခြေအနီး စစ်ကြောင်းထိုးလာသော အကြမ်းဖက်စစ်ကောင်စီတပ်များကို ကရင်နီတပ်မတော်(KA)နှင့် (KNDF)တို့ ခုခံတိုက်ခိုက်ခဲ့ရာ မိနစ် ၃၀ခန့်ကြာ တိုက်ပွဲဖြစ်ခဲ့ကြောင်း ဖော်ပြထား သည်။

ယနေ့ ဒီဇင်ဘာ၈ရက်တွင်လည်း စစ်ကောင်စီတပ်သည်ဒီးမော့ဆိုမြို့နယ်အတွင်းရှိ တောတောင်များဘက်သို့ စစ်ရေးလှုပ်ရှားလာ၍ တိုက်ပွဲများထပ်မံဖြစ်ပွားခဲ့ကြောင်း၊ စစ်ကောင်စီတပ်မှ လက်နက်ကြီးများဖြင့် ညနေပိုင်းအထိ ရမ်းသမ်းပစ်ခတ်ခဲ့ကြောင်း KNDFက ဆိုသည်။ တိုက်ပွဲ၌ ထိခိုက်မှုအခြေအနေများကို မသိရသေးဟုဆိုသည်။

ဒီဇင်ဘာ၇ ရက် ညတွင်လည်း ဒီးမော့ဆိုမြို့နယ်ရဲစခန်းနှင့် ငွေတောင် (၄၂၇) တပ်တို့တွင်ပစ်ခတ်မှုများဖြစ်ပွားခဲ့ပြီး အကြမ်းဖက်စစ်‌ကောင်စီတပ်မှ လက်နက်ကြီးများဖြင့် ညလုံးပေါက် ရမ်းသမ်းပစ်ခတ်ခဲ့ကြောင်း KNDFက ထုတ်ပြန်ခဲ့သည်။

Public Service Announcement

စစ်တပ်အာဏာသိမ်းပြီးနောက်ပိုင်း ကရင်နီဒေသခံများက စစ်ကောင်စီတပ်ကို ခုခံတိုက်ခိုက်မှုများ လုပ်ဆောင်ခဲ့ရာ ၆လကျော်ကာလအတွင်း တိုက်ပွဲ ရာနှင့်ချီဖြစ်ပွားခဲ့ပြီး စစ်ကောင်စီတပ်မှ သေဆုံးထိခိုက်မှုများပြားခဲ့သည်။