စစ်ကောင်စီတပ်ရဲ့ဒရုန်းတိုက်ခိုက်မှုကြောင့် DKBA တပ်ဖွဲ့ဝင်အချို့သေဆုံး

ဖေဖော်ဝါရီ – ၂၅ ၊၂၀၂၆ ၊ နိုင်ပကောင်း/People’s Spring

ကရင်ပြည်နယ်၊မြ၀တီမြို့နယ်၊ မဲကနယ်-ဖလူး တောလမ်းပိုင်းမှာ မနေ့( ဖေဖော်ဝါရီ ၂၄ ရက်)နေ့လယ်ပိုင်းကစစ်ကောင်စီတပ်ရဲ့ဒရုန်းနဲ့ တိုက်ခိုက်မှုကြောင့်ဒီမိုကရေစီအကျိုးပြု ကရင့်တပ်မတော် (DKBA)တပ်ဖွဲ့ဝင်အချို့ သေဆုံးမှု ရှိတယ်လို့ဒေသခံအချို့ဆီကသိရပါတယ်။

သင်္ဃန်းညီနောင်ဒေသအနီး ဖလူး၊ ကျောက်ခက်ဒေသ ဆီ ဆက်သွယ်ထားတဲ့တောလမ်းတစ်နေရာမှာ စစ်ကောင်စီတပ်ကဒရုန်းနဲ့တိုက်ခိုက်မှု ပြုလုပ်ခဲ့တာပါ။

ဒေသခံအချို့ရဲ့ပြောပြချက်အရ DKBAတပ်ဖွဲ့ ဝင်တွေလိုက်ပါလာတဲ့ကားနဲ့ အရပ်သားကားတို့ တိုက်ခိုက်ခံရတာလို့ သိရပါတယ်။

Public Service Announcement

People’s Spring က ကြည့်ရှုရတဲ့ ဓာတ်ပုံအရ မြေသားလမ်းတစ်နေရာမှာတိုယိုတာအမျိုးအစား ဟိုင်းလတ် ( Hilux) ကားဘေးအမျိုးသားလေးဦး ထိခိုက်ဒဏ်ရာရပြီး နဲ့ လဲကျနေတာတွေ့ရပါတယ်။

အဲဒီတိုက်ခိုက်မှုကြောင့် DKBA တပ်ဖွဲ့ဝင်နှစ်ဦး၊အရပ်သားသုံးဦး စုစု ပေါင်း ငါးဦး သေဆုံးတယ်လို့ ဒေသတွင်းသတင်းရင်းမြစ်က ပြောပါတယ်။

သေဆုံးသွားတဲ့ DKBA တပ်ဖွဲ့ဝင်နှစ်ဦးရဲ့ နာရေးကို DKBA ထိန်းချုပ်နယ်မြေအတွင်း ဒီနေ့ (ဖေဖော်ဝါရီ ၂၅ ရက်)မှာ ပြုလုပ်ခဲ့တယ်လို့လည်း သိရပါတယ်။

တပ်ဖွဲ့ဝင်တွေ သေဆုံးမှုနဲ့ပတ်သက်ပြီး DKBA ဘက်ကတော့ ထုတ်ပြန်တာမျိုးမရှိသေးပါဘူး။

ဒရုန်းတိုက်ခိုက်ခံရတဲ့ မဲကနယ်-ဖလူး-ကျောက်ခက် တောလမ်းပိုင်းဟာ အရပ်သားကားတွေ သွားလာနေတဲ့အပြင် ဒီမိုကရေစီအကျိုးပြုကရင့်တပ်မတော်(DKBA)တပ်ဖွဲ့လည်း အများဆုံးအသုံးပြုတာလို့ မြဝတီနယ်ခံ သတင်းရင်းမြစ်တစ်ဦးက မြေပြင်အခြေအနေကို ပြောပါတယ်။

တဖက်မှာလည်း မဲကနယ်-ဖလူး-ကျောက်ခက်တောလမ်းအနီးဝန်းကျင် ရသေ့ဂူ၊ ဖလူး၊ မင်းလက်ပံကျေးရွာတွေဘက်မှာ စစ်ကောင်စီတပ်က နယ်မြေစိုးမိုးထိန်းချုပ်ဖို့အတွက် စစ်ရေးလှုပ်ရှားတာတွေ ရှိနေတာပါ။

ဒါအပြင်ဒရုန်းနဲ့တိုက်ခိုက်တာ၊လေယာဉ်နဲ့ ဗုံးကြဲတာတွေရှိနေတာကြောင့် သွားလာရာမှာ အထူးသတိပြုကြဖို့၊ အထူးသဖြင့် အဲဒီလမ်းပိုင်းကို အသုံးပြု တာကို ရှောင်ရှားသွားလာကြဖို့လည်း ဒေသခံအချင်းချင်းကြား သတိပေးတာတွေလည်း ရှိနေပါတယ်။

DKBA ဟာဦးသိန်းစိန်အစိုးရလက်ထက်ကတစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)လက်မှတ်ထိုးခဲ့တဲ့ အဖွဲ့ဖြစ်ပြီး နေပြည်တော်မှာ အာဏာသိမ်းစစ်ကောင်စီ နဲ့လည်း တွေ့ဆုံဆွေးနွေးမှု ရှိခဲ့တဲ့ အဖွဲ့ဖြစ်ပါတယ်။