ဧပြီ ၅၊၂၀၂၆။ဟာနာဆန်/People’s Spring
စစ်ကိုင်းတိုင်း၊ ဒီပဲယင်းမြို့နယ်မှာ လာမယ့်သင်္ကြန်ကာလအတွင်း လေကြောင်းအန္တရာယ်အပါအဝင် လုံခြုံရေးအသိ၊သတိနဲ့ ဖြတ်သန်းကြဖို့ မြို့နယ်ပြည်သူ့အုပ်ချုပ်ရေးအဖွဲ့က သတိပေးပါတယ်။
စစ်ကောင်စီဟာ ဒီကနေ့အထိ ပြည်သူလူထုအပေါ် မြေပြင်စစ်ကြောင်းတွေသာမက လေကြောင်းက တဆင့် စာသင်ကျောင်း၊ ဘုန်းကြီးကျောင်းနဲ့ လူနေအိမ်တွေကို ပစ်မှတ်ထား တိုက်ခိုက်နေဆဲဖြစ်ကြောင်း၊ ဒါ့ကြောင့် မကြာခင် ရောက်ရှိတော့မယ့် သင်္ကြန်ကာလအတွင်း ဒီပဲယင်းမြို့နယ်သူ၊ မြို့နယ်သားတွေအနေနဲ့ ပွဲလမ်းသဘင်တွေ ဆင်နွှဲရာမှာလေကြောင်းအန္တရာယ်ကို အစဉ်မပြတ် သတိပြုကြဖို့၊ “လုံခြုံရေးအသိ၊ လုံခြုံရေးသတိ”နဲ့ ဂရုတစိုက် ဖြတ်သန်းကြဖို့ တိုက်တွန်းပါတယ်။
ထုတ်ပြန်ချက်နဲ့ ပတ်သက်ပြီး ဒီပဲယင်းပအဖအဖွဲ့ကို ဆက်သွယ်မေးမြန်းထားပြီး လက်တလော ပြန်လည်ဖြေကြားတာ မရှိသေးပါဘူး။
Public Service Announcement
လက်တလောအခြေအနေအရ ပွဲလမ်းသဘင်တွေကျင်းပဖို့ မသင့်သေးဘူးလို့ ဒီပဲယင်းဒေသခံတစ်ဦးက ပြောပါတယ်။ “မလုပ်သင့်သေးပါဘူး။ ဗုံးကြဲနိုင်တယ်”လို့ ၎င်းဒေသခံက ဆိုပါတယ်။
ဒါ့အပြင် ဘာသာရေး၊ သာသနာရေးနဲ့ ဓလေ့ထုံးတမ်းဆိုင်ရာ ပွဲလမ်းသဘင်တွေကိုလည်းသက်ဆိုင်ရာ ကျေးရွာအုပ်ချုပ်ရေးအဖွဲ့ (ပ.အ.ဖ)၊ ကာကွယ်ရေးအဖွဲ့ (ပ.က.ဖ)၊ လုံခြုံရေးအဖွဲ့ (ပ.လ.ဖ) တို့နဲ့ ကြိုတင်ညှိနှိုင်းကာ ဘေးကင်းလုံခြုံရေးအတွက် အထူးသတိပြု ဆောင်ရွက်ကြဖို့ ပအဖအဖွဲ့က လမ်းညွှန်ထားပါတယ်။
စစ်ကောင်စီဟာ ဒီရက်ပိုင်းအတွင်း ဘုတလင်၊ အရာတော်၊ မုံရွာ စတဲ့ဒေသတွေက ဆေးရုံဆေးခန်းတွေကိုပါ လေကြောင်းတိုက်ခိုက်မှုတွေ ပြုလုပ်နေပါတယ်။
၂၀၂၃က သင်္ကြန်မရောက်ခင် နှစ်ရက်အလို ဧပြီ ၁၁ရက်မှာ ကန့်ဘလူမြို့နယ်၊ ပဇီကြီးကျေးရွာကို စစ်တပ်က လေကြောင်းတိုက်ခိုက်ခဲ့လို့ ပြည်သူ ၁၇၀ကျော် သေဆုံးခဲ့ရဖူးပါတယ်။
