မေ-၃၊ ၂၀၂၆။ထားမြတ်/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင် ပိန်းဇလုပ် – သူဌေးကုန်းကြားက မီးရထားလမ်း ဂိတ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း (၉) က ဝင်ရောက်တိုက်ခိုက်ခဲ့ရာ စစ်တပ်က ၅ဦးသေဆုံးခဲ့ပြီး လက်နက် ၅လက်သိမ်းရကြောင်း KNUက ထုတ်ပြန်ပါတယ်။
မေလ ၂ရက်ည ၉နာရီခွဲမှာ ပိန်းဇလုပ်နဲ့ သူဌေးကုန်းအကြား မီးရထားလမ်း (၁၄၇)တံတားမှာ တပ်စွဲထားတဲ့ ဂိတ်စခန်းကို တိုက်ခိုက်ခဲ့ရာ စစ်တပ်အရာရှိ ၂ဦးနဲ့ တပ်သား ၃ဦးသေဆုံးခဲ့တာလို့ အသိပေးထားပါတယ်။
တိုက်ခိုက်မှုအတွင်း ဂိတ်စခန်းရှိတဲ (၃)လုံး မီးရှို့ဖျက်ဆီးခဲ့ပြီး သေနတ် (၅)လက်အပါအဝင်ခဲယမ်းအချို့အားသိမ်းဆည်းရမိခဲ့ဟု မှတ်တမ်းဓာတ်ပုံတွေနဲ့ အသိပေးပါတယ်။
Public Service Announcement
စစ်ဆင်ရေးမှာ KNLA ရဲဘော်တွေ အထိအခိုက်မရှိဘဲ အောင်မြင်စွာ ပြန်လည်ဆုတ်ခွာနိုင်ခဲ့တယ်လို့ ဖော်ပြပါတယ်။
KNU အနေနဲ့ အာဏာသိမ်းစစ်တပ်ကို နိုင်ငံရေးအရ၊ စစ်ရေးအရ တော်လှန်တွန်းလှန်လျက်ရှိပြီး ပြည်သူလူထုလိုလားတောင့်တသော စစ်မှန်သော ဖက်ဒရယ်ဒီမိုကရေစီပြည်ထောင်စု ပေါ်ပေါက်လာရေးအတွက် အစဉ်တစိုက်အားထုတ် ကြိုးပမ်းလျက်ရှိကြောင်းလည်း အသိပေးထုတ်ပြန်ပါတယ်။
