တရုတ်နိုင်ငံ အလယ်ပိုင်းနဲ့ တောင်ပိုင်းဒေသတွေက ရေကြီးမှုတွေအတွင်း သေဆုံးသူ ဦးရေဟာ ၂၂ ဦးထိ မြင့်တက်လာကြောင်း သိရပါတယ်။
ပြီးခဲ့တဲ့ သီတင်းပတ်ကုန်ကစလို့ အဲဒီဒေသတွေမှာ မိုးသည်းသည်းထန်ထန် ရွာသွန်းပြီး နောက်ဆက်တွဲ ရေကြီးမှုတွေ ပေါ်ပေါက်လာခဲ့တာပါ။ မေလ ၂၀ ရက်နေ့မှာတော့ တရုတ် အစိုးရပိုင် ရှင်ဟွာ သတင်းဌာနက ရေကြီးမှုတွေနဲ့ ဆက်စပ်ပြီး သေဆုံးသူ ၂၂ ဦးထိ အတည်ပြု စာရင်းရထားပြီး လူ ၂၀ ပျောက်ဆုံးနေဆဲလို့ ဖော်ပြခဲ့ပါတယ်။
တရုတ်နိုင်ငံမှာတော့ နွေရာသီ ကာလတွေမှာ ပြင်းထန်ကြမ်းတမ်းတဲ့ ရာသီဥတု အခြေအနေတွေ ကြုံရခြင်းက ပုံမှန်လို့ ဆိုနိုင်ပါတယ်။ တချို့ဒေသတွေမှာ အခုလိုပဲ မိုးအလွန်အကျွံ ရွာနေပြီး တချို့ဒေသတွေမှာတော့ အစွမ်းကုန် ပူပြင်းတဲ့ နေဒဏ်ကို ခံကြရပါတယ်။
ပြီးခဲ့တဲ့ ရက်ပိုင်းအတွင်း တရုတ်နိုင်ငံအနှံ့ ဒေသတချို့မှာ ဒေသအလိုက် စံချိန်သစ်တင်တဲ့ မိုးသည်းသည်းထန်ထန် ရွာသွန်းမှုတွေ ရှိခဲ့ကြောင်း တရုတ် မိုးလေဝသဌာနက ကြေညာခဲ့ပါတယ်။
Public Service Announcement
မေလ ၁၉ ရက်နေ့တုန်းက နိုင်ငံတောင်ပိုင်း ကွမ့်ရှီးဒေသမှာ ဘတ်စ်ကားတစ်စီး လမ်းချော်ပြီး ရေလျှံနေတဲ့ မြစ်ထဲ ထိုးကျသွားရာက လူ ၁၀ ဦး သေဆုံးခဲ့ပါတယ်။ အနီးမှာရှိတဲ့ ကွမ့်ကျိုးမှာလည်း မိုးသည်းသည်းထန်ထန် ရွာသွန်းမှုတွေနဲ့ ဆက်စပ်ပြီး အနည်းဆုံး ၄ ဦး အသက်ဆုံးရှုံးခဲ့သလို ၅ ဦး ပျောက်ဆုံးနေကြောင်း သိရပါတယ်။
နိုင်ငံ အလယ်ပိုင်းက ဟူပေပြည်နယ်မှာလည်း သေဆုံးသူ ၃ ဦး စာရင်းရထားပြီး ၄ ဦး ပျောက်ဆုံးနေပါတယ်။ ရေကြီးမှုတွေကြောင့် လမ်းတံတားတွေပါ ပျက်စီးကုန်ပြီး တချို့ ကျေးလက်ဒေသတွေနဲ့ လုံးဝဥဿုံ အဆက်အသွယ် ပြတ်တောက်နေကြောင်း ကယ်ဆယ်ရေးတွေက ပြောပါတယ်။
အစိုးရက သဘာဝ ဘေးအန္တရာယ် သက်ရောက်ခံစားခဲ့ရတဲ့ ဒေသတွေဆီ အရေးပေါ် အကူအညီတွေ ပေးပို့နိုင်ရေးအတွက် ယွမ်ငွေ သန်း ၁၂၀ စိုက်ထုတ်ပေးမယ်လို့ ကြေညာထားပါတယ်။ ဒါ့အပြင် အခြေအနေ အဆိုးဆုံး ကြုံထားတဲ့ ကွမ့်ကျိုးအတွက် သီးခြား ယွမ်ငွေ သန်း ၃၀ ပေးပို့ဖို့ စီစဉ်ထားပါတယ်။ ကွမ့်ကျိုး၊ ဟူနန်နဲ့ ဟူပေတို့မှာ ရေဘေးကြောက့် အနည်းဆုံး လူ ၂၄၀၀၀ လောက်ကိုလည်း ယာယီ ရွှေ့ပြောင်းပေးထားရပါတယ်။
တရုတ် မိုးလေဝသ ဌာနရဲ့ အဆိုအရ လက်ရှိ ရေဘေးသင့်နေတဲ့ ဒေသတော်တော်များများဟာ နောက်ထပ် ရက်ပိုင်းလောက် ကြာတဲ့ထိ မိုးဆက်ရွာမယ့် အခြေအနေနဲ့ ကြုံရနိုင်ကြောင်းလည်း သိရပါတယ်။
ကိုးကား: AFP
