ဒေါ်အောင်ဆန်းစုကြည်အတွက် လူကိုယ်တိုင်သွားရောက်သက်သေထွက်ဆိုခွင့်မရတဲ့အတွက် ဗီဒီယိုကွန့်ဖရန့်ဆင်းကတဆင့် ဒေါက်တာဇော်မြင့်မောင်သက်သေထွက်ဆိုမယ်

ပြီးခဲ့တဲ့ ရုံးချိန်းမှာ ဒေါက်တာဇော်မြင့်မောင်ကို ထောင်ဝတ်စုံနဲ့ရုံးထုတ်စစ်ဆေးခဲ့

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အမှုအတွက် နေပြည်တော်တရားခွင်ကိုလူကိုယ်တိုင်သွားရောက်ထွက်ဆိုဖို့ထောင်အာဏာပိုင်တွေက ခွင့်မပြုတာကြောင့် ဒေါက်တာဇော်မြင့်မောင်ဟာ ဗီဒီယိုကွန့်ဖရန့်ဆင်းကနေ သက်သေထွက်ဆိုမယ်လို့သိရပါတယ်။

မနက်ဖြန်မှာ မန္တလေးအိုးဘိုထောင်ထဲကနေ ဗီဒီယိုကွန့်ဖရန့်ဆင်းနဲ့ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ဟာ သက်သေထွက်ဆိုမှာပါ။

ဒေါ်အောင်ဆန်းစုကြည်ကို နေပြည်တော်က NLD ပါတီဝန်းရံသူတွေထံသွားရောက်ခဲ့တာနဲ့ပတ်သက်ပြီးကိုဗစ်စည်းကမ်းချိုးဖောက်တယ်ဆိုကာ သဘာဝဘေးပုဒ်မ ၂၅ နဲ့စွဲဆိုထားတာပါ။

Public Service Announcement

အဲဒီအမှုအတွက် ခရီးစဉ်မှာ လိုက်ပါခဲ့သူ ဒေါက်တာဇော်မြင့်မောင်ဟာ ဒေါ်အောင်ဆန်းစုကြည်ဘက်က သက်သေထွက်ဆိုဖို့ ဆန္ဒရှိပေမယ့် ထောင်အာဏာပိုင်တွေက တရားခွင်ကိုလူကိုယ်တိုင်သွားရောက်ထွက်ဆိုဖို့ ခွင့်မပြုခဲ့တာဖြစ်ပါတယ်။

ဒါကြောင့်မနက်ဖြန်မှာ အမှုစစ်တဲ့အခါ ဗီဒီယိုကွန့်ဖရန့်ဆင်းကတဆင့် သက်သေထွက်ဆိုမှာပါ။

လက်ရှိအချိန်မှာတော့ ဒေါက်တာဇော်မြင့်မောင်ဟာ ထောင်ဒဏ် ၄ နှစ်ကျခံနေရပြီး အဂတိအမှုတွေနဲ့လည်းရင်ဆိုင်နေရကာ ပြီးခဲ့တဲ့ ရုံးချိန်းတုန်းက ထောင်ဝတ်စုံနဲ့ ရုံးထုတ်ခဲ့တယ်လို့သိရပါတယ်။