ဇူလိုင်-၇၊၂၀၂၆ ။ခိုင်မြတ်/People’s Spring
ရခိုင်ပြည်နယ်ဝန်ကြီးချုပ် ဦးညီပုရဲ့ သမီးဖြစ်သူ အမျိုးသားဒီမိုကရေစီအဖွဲ့ချုပ်(NLD)ပါတီ လူငယ်တာဝန်ခံ မမိုး ဆန်းစုကြည်ကို အာဏာသိမ်းစစ်တပ်က အကြမ်းဖက်မှုတိုက်ဖျက်ရေးဥပဒေပုဒ်မ၅၂(က)နဲ့ ထပ်မံတရားစွဲဆိုပြီး ထောင်ဒဏ်ငါးနှစ်ချမှတ်လိုက်တယ်လို့ မိသားစုဝင်တွေက ပြောကြပါတယ်။
ပြီးခဲ့တဲ့နှစ်ကတည်းကလွတ်ရက်စေ့ပြီး သာယာ၀တီအကျဉ်းထောင်ကနေ လွတ်လာခဲ့ပြီဖြစ်တဲ့ မမိုးဆန်းစုကြည် ကို စစ်တပ်လက်အောက်ခံ ရဲတပ်ဖွဲ့က ထောင်ဘူး၀ အရောက်မှာထပ်မံဖမ်းဆီးကာ ပုဒ်မ ၅၂(က)နဲ့ တရားစွဲဆိုခဲ့တာဖြစ်ပြီး အ ခုအခါ အဲဒီပုဒ်မနဲ့ အမိန့်ချမှတ်လိုက်တာပါ။
“သာယာ၀တီထောင်ကနေ အင်းစိန်ထောင်ကို ပြောင်းထားပြီးတော့ မနေ့ကကမာရွတ်တရားရုံးကနေ အမိန့်ချ လိုက်တာ။ မနှစ်ကတရားစွဲထားတဲ့ပုဒ်မနဲ့ပဲ အမိန့်ချတာလို့သိရတယ်။ ” လို့ အမည်မဖော်လိုသူ မိသားစုဝင်တဦးက ပြောပါတယ်။စစ်တပ်အာဏာသိမ်းပြီးလပိုင်းအကြာမှာကတည်းကဖမ်းဆီးခံထားရတဲ့သူ့ကို NUG၊CRPH တို့နဲ့ ဆက်စပ်တယ်လို့ စစ်တပ်ကစွပ်စွဲ အမိန့်ချတယ်လို့ ဆိုပါတယ်။
Public Service Announcement
လက်ရှိမှာ မမိုးဆန်းစုကြည်ကို အင်းစိန်အကျဉ်းထောင်ထဲမှာထားပြီး မိသားစုနဲ့လည်း ပုံမှန်ထောင်ဝင်စာတွေ့ခွင့်မပေးဘူးလို့ မိသားစုဝင်တွေနဲ့ နီးစပ်သူတွေက ပြောပါတယ်။
မမိုးဆန်းစုကြည်ဟာ ပြီးခဲ့တဲ့ ၂၀၂၁ ခု မေလ ၉ ရက်နေ့ကတည်းက ရန်ကုန်တိုင်း ကမာရွတ်မြို့နယ်အတွင်း ဖမ်း ဆီးခံခဲ့ရပြီး နိုင်ငံတော်အကြည်အညိုပျက်စေမှုပုဒ်မ ၅၀၅(က)၊ မတရားအသင်းဆက်သွယ်မှု ဥပဒေပုဒ်မ ၂၇(၁) တို့နဲ့ ထောင်ဒဏ်ခြောက်နှစ်ချမှတ်ခံထားခဲ့ရတာပါ။
မမိုးဆန်းစုကြည်ဟာ အစပိုင်းမှာ အင်းစိန်အကျဉ်းထောင်ထဲ နေခဲ့ရပြီး ၂၀၂၃ ခု ဇွန်လဆန်းမှာတော့ သာယာ၀တီ အကျဉ်းထောင်သို့ ရွေ့ပြောင်းခံခဲ့ရကာ ထပ်တိုးတရားစွဲခံရချိန် အင်းစိန်ထောင်သို့ ထပ်မံရွှေ့ပြောင်းခံရတာဖြစ်ပါ တယ်။
“အခုအင်းစိန်ထောင်ရောက်နေပြီ။ ဒီဘက်မှာ ထပ်ပြီးတရားစွဲဖို့အတွက် ပြောင်းလာတာလို့ သိရတယ်။ ဒီအာဏာ ရှင်ကောင်တွေကတော့ ဒီမိုကရေစီအရေးလှုပ်ရှားသူတွေကို ပုဒ်မတစ်ခုပြီးတစ်ခုတပ်ပြီး တရားစွဲမှာပါပဲ။ ဒီငါးနှစ်စေ့ ရင်လည်း နောက်ထပ်အပြစ်ရှာမှာပဲ” လို့ ရခိုင်ဒေသခံနိုင်ငံရေးအကျဉ်းသားဟောင်းတဦးက ပြောပါတယ်။
မမိုးဆန်းစုကြည်ရဲ့ ဖခင်ဖြစ်သူ ရခိုင်ပြည်နယ်ဝန်ကြီးချုပ်ဦးညီပုကိုလည်းစစ်တပ်က အဂတိလိုက်စားမှုဥပဒေပုဒ်မ ၅၅ ၊ ဆူပူ အောင်လှုံ့ဆော်မှုပုဒ်မ ၅၀၅(ခ) တို့နဲ့ ထောင်ဒဏ် ၁၁ နှစ် ချမှတ်ခံထားရပြီး အင်းစိန်အကျဉ်းထောင်ထဲမှာ ရှိနေပါ တယ်။
မျက်လုံးတဖက်နေမကောင်းတဲ့ ဦးညီပုဟာ ပုံမှန်ဆေးကုသခွင့်၊ ထောင်ဝင်စာတွေ့ခွင့်တို့ မရဘူးလို့လည်း သမီးဖြစ် သူက ပြောထားပါတယ်။အာဏာသိမ်းစစ်တပ်ဟာအာဏာသိမ်းချိန်ကတည်းက ပြည်နယ်၊ တိုင်းဝန်ကြီးချုပ်တွေ၊ NLD ပါတီဝင်တွေ၊ ခေါင်းဆောင်တွေအပါအဝင် ဒီမိုကရေစီအရေးလှုပ်ရှားသူတွေကို ပုဒ်မမျိုးစုံတပ်ကာ နှစ်ရှည် ထောင်ဒဏ်တွေ ချမှတ်နေခဲ့တာဖြစ်ပါတယ်။
လက်ရှိမှာလည်း စစ်တပ်ရဲ့ဖမ်းဆီးခြင်းခံထားရသူနိုင်ငံရေးအကျဥ်းသား သုံးသောင်းတစ်ထောင်ကျော် ရှိနေဆဲဖြစ်တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း(AAPP)ကထုတ်ပြန်ပါတယ်။
