အထိနာနေတဲ့ဧရာဝတီတိုင်းမှာ ဟိုတယ်နဲ့တည်းခိုခန်းတွေကို စစ်တပ် ဝင်စစ်နေ

ဇူလိုင်-၇၊၂၀၂၆။ဇော်ရမ်း/People’s Spring

ရေကြည် နဲ့ လေးမျက်နှာမြို့နယ်​တွေမှာတိုက်ပွဲတွေပြင်းထန်နေစဉ် စစ်တပ်က ဧရာဝတီတိုင်းထဲက မြို့နယ်တွေမှာရှိတဲ့ဟိုတယ်နဲ့တည်းခိုခန်းတွေကို ရှောင်တခင်ဝင် စစ်ဆေးပြီးနေ့စဉ်တည်းခိုသူစာရင်းတွေ မဖြစ်မနေပေးဖို့ ဖိအားပေးနေပါတယ်။

ပုသိမ်၊ သာပေါင်း၊ ငပုတော၊ မအူပင်၊ ဟင်္သာတ၊ မြန်အောင်အပါအဝင် တိုက်ပွဲဖြစ်နေတဲ့နေရာတွေနဲ့နီးစပ်တဲ့ မြို့နယ်တွေမှာ အာဏာသိမ်း စစ်တပ်က စစ်ဆေးမှုတွေပိုမိုပြုလုပ်​​​နေတာဖြစ်ပါတယ်။

“ဧည့်သည်စာရင်းတွေနေ့တိုင်းပို့ရတယ်။ မှတ်ပုံတင်မပါတဲ့သူတွေ ရောက်လာရင် ရဲစခန်းကိုချက်ချင်းအကြောင်းကြားရတယ်။ ရုတ်တရက်ဝင်စစ်ဆေးပြီး သူတို့မကြိုက်တာတွေ့ရင် ငွေညှစ်ပြီး ခံဝန်ထိုးခိုင်းတယ်”လို့ ပုသိမ်မြို့မှာရှိတဲ့ တည်းခိုခန်း ဝန်ထမ်းတဦးကပြောပါတယ်။

Public Service Announcement

ဂွမြို့ကို ပြန်လည်သိမ်းယူမယ်လို့ကြုံဝါးပြီး ဧရာဝတီတိုင်းဘက်ကတဆင့်စစ်ကြောင်းတွေဝင်ရောက်လာပြီးတဲ့နောက်ပိုင်း ပြီးခဲ့တဲ့ဇွန်လကစပြီး ရေကြည်မြို့နယ်ထဲမှာတိုက်ပွဲတွေပိုမိုပြင်းထန်လာခဲ့ပါတယ်။ရခိုင်ပြည်နယ်နဲ့ဆက်စပ်နေတဲ့ သာပေါင်းနဲ့ လေးမျက်နှာမြို့နယ်တွေမှာလည်း တိုက်ပွဲတွေဖြစ်ခဲ့ပါတယ်။ ဇွန်လကစပြီး တိုက်ပွဲတွေသိသိသာသာပြင်းထန်လာပြီးတဲ့နောက်ပိုင်း ရေကြည်မြို့နယ်ထဲကစစ်တပ်စခန်းတွေကိုအာရက္ခတပ်တော်(AA)နဲ့ မဟာမိတ်တွေက ဆက်တိုက်သိမ်းယူနေပါတယ်။

ဇွန်လက တိုက်ပွဲတွေထဲမှာ ရေကြည်မြို့နယ်ထဲက ပွိုင့် (၂၈၈) ကုန်း၊ ပွိုင့် (၁၈၈) ကုန်နဲ့ပွိုင့် (၁၄၈) ကုန်းကို AAက သိမ်းယူပြီး ဇူလိုင်လ ၂ရက်နဲ့ ၃ရက်မှာ ၂၂၇ပွိုင့်ကုန်းရဲ့ ကာကင်းစခန်းကုန်းနှစ်ခုကိုထပ်မံသိမ်းယူနိုင်ခဲ့တယ်လို့ AAက ဇူလိုင်လ ၄နေ့ညမှာသတင်းထုတ်ပြန်ပါတယ်။

စစ်တပ်က ရေကြည်မြို့နယ်ထဲက အမြောက်တပ်(၃၄၄)နဲ့ လေးမျက်နှာမြို့ဘက်မှာလည်း အင်အားဖြည့်တင်းနေတယ်လို့ AAက ထုတ်ပြန်ထားပါတယ်။ ပုသိမ်-မုံရွာလမ်းပိုင်းမှာလည်း တပ်ဖွဲ့ဝင်အင်အားအများအပြားသုံးပြီး နေရာယူထားတယ်လို့လည်းAAကအသိပေးထားပါတယ်။

တိုက်ပွဲတွေပြင်းထန်နေစဉ် ဒေသတွင်း ရထားလမ်းနဲ့ကားလမ်း ဆက်သွယ်ရေးလမ်းပိုင်းတွေမှာ စစ်တပ်ကစစ်ဆေးရေးတင်းကြပ်နေသလို တည်းခိုခန်းနဲ့ဟိုတယ်တွေကိုလည်း ရှောင်တခင်ဝင်ရောက်စစ်ဆေးတာတွေပြုလုပ်နေပါတယ်။

“ပေါ်တာဆွဲတာတွေလည်းရှိတယ်။အကြောင်းအမျိုးမျိုးပြပြီးဖမ်းတာတွေလည်းရှိတယ်။ ညဆို ၈နာရီလောက်ဆိုမြို့ကတိတ်ဆိတ်သွားပြီ။ အသွားအလာမရှိ တော့သလောက်ပဲ” လို့ မအူပင်မြို့ခံတစ်ဦးကပြောပါတယ်။

ရေကြည်မြို့နယ်ထဲမှာဖြစ်ပွားနေခြင်းတိုက်ပွဲတွေနဲ့ပတ်သက်လို့ AA ကဇူလိုင်လ၇ရက်နေ့မှာ ထပ်မံထုတ်ပြန်ထားပါတယ်။ ဇူလိုင်လ ၃ရက်နေ့က ၂၂၇ပွိုင့်ကုန်းသိမ်းယူတိုက်ပွဲကနေထွက်ပြေးသွားတဲ့စစ်သားတွေနဲ့ ဇူလိုင်လ၄ရက်နေ့မှာတိုက်ပွဲဖြစ်ပွားခဲ့ပြီးလက်နက်ခဲယမ်းအချို့၊ စစ်အသုံးအဆောင်ပစ္စည်းအချို့နဲ့ ရုပ်အလောင်းအချို့သိမ်းဆည်းနိုင်ခဲ့တယ်လို့ဖော်ပြထားပါတယ်။

စစ်တပ်ကလည်းလက်လွတ်ဆုံးရှုံးလိုက်ရတဲ့စခန်းတွေနဲ့ တိုက်ပွဲဖြစ်ပွားနေတဲ့ နေရာတွေကိုဂျက်ဖိုက်တာ၊ ဒရုန်း၊လက်နက်ကြီးတွေနဲ့ ဆက်တိုက် ဗုံးကြဲပစ်ခတ်နေတယ်လို့ ထုတ်ပြန်ထားပါတယ်။