ဖားကန့်မြို့ မှော်စီစာကျေးရွာရှိ စွန့်ပစ်မြေစာပုံတစ်ပုံ ယနေ့(ဒီဇင်ဘာ ၂၂ ရက်) နံနက်က ပြိုကျခဲ့ပြီး ရေမဆေးကျောက်ရှာဖွေသူ ၈၀ခန့်ပျောက်ဆုံးနေသည်ဟု ဒေသခံများက ပြောသည်။
“ဖားကန့်မှာ ဟိုနေ့က ပြိုပြီး အခုတစ်ခါထပ်ပြိုတာ။မြေစာပုံကြီးက ရေကန်ဘက် ပြိုကျပြီး လှိုင်းလုံးနဲ့ရိုက်ချသွားသလိုဖြစ်တာ။ လူရှစ်ဆယ်လောက်အထိ ပါသွားတယ်”ဟု ဒေသခံတစ်ဦးက ပြောသည်။
မှော်စီစာကျေးရွာရှိ စွန့်ပစ်မြေစာပုံမှာ နံနက် ၃နာရီခွဲခန့်က ပြိုကျခဲ့ခြင်းဖြစ်သည်။ ပြီးခဲ့သည့် ဒီဇင်ဘာ ၁၉ရက် နံနက်ကလည်း ဖားကန့်မြို့ မနမှော်မြေစာပုံ ပြိုကျခဲ့ပြီး ရေမဆေးကျောက်ရှာဖွေသူ ခြောက်ဦးသေဆုံးခဲ့သည်။
ကိုဗစ်ရောဂါ ထိန်းချုပ်ရေးအတွက် ဒီချုပ်အစိုးရက သတ္တုတူးဖော်ခွင့်ပိတ်သိမ်းထားသည့် ဖားကန့်ဒေသတွင် စစ်ကောင်စီက နိုင်ငံတော်အာဏာသိမ်းပြီးနောက် ပေါ်ပေါ်ထင်ထင် ခိုးယူတူးဖော်နေသည်ဟု ဒေသခံများကပြောသည်။
Public Service Announcement
“စစ်တပ်က အရင်နှစ်တွေကထက် ဆိုးနေတယ်။ ရေမဆေးတွေက အလုပ်မရှိလို့ ကျောက်ရှာကြဖွေကြတာ။ စစ်တပ်ကတော့ ကုမ္ပဏီတွေနဲ့ပေါင်းပြီး ဖားကန့်ကို ဖျက်ဆီးနေပြီ”ဟု ဒေသခံတစ်ဦးက ပြောသည်။
