သြဂုတ်-၁၉၊၂၀၂၆။ရွှေပြည်စိုး/People’s Spring
အာဏာသိမ်းစစ်တပ်က ဝန်းသိုမြို့နယ်အခြေစိုက်တပ်ရင်းတွေကို အင်အားဖြည့်ပြီးကျေးရွာတွေကို စစ်ကြောင်းထိုဖို့ပြင်ဆင်နေတဲ့အတွက် လုံခြုံရေးသတိပြုနေထိုင်ကြဖို့ ကောလင်းခရိုင်အမှတ်(၄)တပ်ရင်းကသတင်းထုတ်ပြန်ပါတယ်။
စစ်တပ်က ဝန်းသိုမြို့အခြေစိုက် ခြေမြန်တပ်ရင်းခမရ (၁၁၁) ၊ ခမရ (၁၂၀)ထဲကို လေကြောင်းကနေအင်အားဖြည့်တင်းနေပါတယ်။ စစ်မှုထမ်းသင်တန်းဆင်းအများအပြားပါဝင်လာပြီး မြို့အနီးပတ်ဝန်းကျင်ကျေးရွာတွေကိုစစ်ကြောင်းထိုးဖို့ပြင်ဆင်နေတယ်လို့ ဒေသခံသတင်းရင်းမြစ်တွေကပြောပါတယ်။
စစ်တပ်ကစစ်ရေးပြင်ဆင်လာတဲ့အတွက် သတိပြုနေထိုင်ဖို့နဲ့ လေကြောင်းအန္တရာယ်ကိုလည်း ဂရုစိုက်ဖို့ ကောလင်းခရိုင်အမှတ်(၄)တပ်ရင်းက သတိပေးထားပါတယ်။
Public Service Announcement
အကယ်၍စစ်တပ်က လေကြောင်းတိုက်ခိုက်ပါက တိုက်ခိုက်ခံရတဲ့နေရာကိုလူမှုကွန်ရက်ပေါ်မတင်ကြဖို့နဲ့တင်တဲ့သူကိုအရေးယူမယ်လို့ သတိပေးထားပါတယ်။ဒေသခံတွေအနေနဲ့လုံခြုံရေးအတွက်ပူးပေါင်းဆောင်ရွက်ပေးကြဖို့လည်းတောင်းဆိုထားပါတယ်။
ဝန်းသိုမြို့နယ်နဲ့ကောလင်းမြို့နယ်ကြားမှာပြီးခဲ့တဲ့ဖေဖော်ဝါရီလက တိုက်ပွဲအပြင်းအထန်ဖြစ်ပွားခဲ့ဖူးပါတယ်။ကောလင်းမြို့နယ်ထဲမှာ ပြည်သူ့ကာကွယ်ရေးတပ်တွေ ထိန်းထားတဲ့ သစ်ဖုလတောင်ကိုဝန်းသိုမြို့ထဲက ခမရ(၁၀၁)နဲ့ ခမရ(၁၂၀)က အင်အား ၂၀၀ ခန့်ပို့ဆောင်ပြီး စစ်ကြောင်းထိုးလာလို့ ပြည်သူ့ကာကွယ်ရေးပူးပေါင်းတပ်တွေ တိုက်ခိုက်ခဲ့ကြတာဖြစ်ပါတယ်။ဖေဖော်ဝါရီလ၇ရက်ကဖြစ်ခဲ့တဲ့တိုက်ပွဲမှာခမရ(၁၂၀)က တပ်ကြပ်ကြီးထူးထူးနိုင်ဆိုသူအပြင်စစ်သား၇ဦးကို PDFတွေကဖမ်းမိခဲ့ပါတယ်။ပြည်သူ့ကာကွယ်ရေးပူးပေါင်းတပ်တွေဘက်မှာထိခိုက်မှုရှိခဲ့သလို စစ်တပ်ကသေဆုံးမှုတွေလည်းများပြားခဲ့တယ်လို့ထုတ်ပြန်ခဲ့ပါတယ်။
စစ်တပ်ဟာ လက်ရှိမှာ ဝန်းသိုမြို့နဲ့ဆက်စပ်နေတဲ့ ပင်လည်ဘူးမြို့နယ်ကိုပစ်မှတ်ထားပြီး လေကြောင်းကနေဗုံးကြဲတိုက်ခိုက်နေပါတယ်။ ဩဂုတ် ၁၆ရက်ကနေ သြဂုတ်၁၈ရက်နေ့အထိ သုံးရက်ဆက် လေကြောင်းကနေဗုံးကြဲခဲ့တာကြောင့်အရပ်သားဆယ်ဦးသေဆုံးပြီး ၂ဝဦးထက်မနည်းဒဏ်ရာရခဲ့တယ်လို့ ဒေသခံအချို့ကပြောပါတယ်။ သြဂုတ် ၁၉ ရက်မှာလည်းလေကြောင်းတိုက်ခိုက်မှုတွေဆက်လုပ်နေတဲ့အတွက်ပြည်သူတွေသတိပြုကြဖို့ ကာကွယ်ရေးတပ်ဖွဲ့တွေကသတိပေးထားပါတယ်။
