ရုရှား သမ္မတ ဗလာဒီမာ ပူတင်နဲ့ တရုတ် သမ္မတ ရှီကျင့်ဖျင်တို့ဟာ ကာဂျစ္စတန် နိုင်ငံမှာ အစည်းအဝေးတက်ရင်း တွေ့ဆုံခဲ့ကြပါတယ်။
ရှန်ဟိုင်း ပူးပေါင်းဆောင်ရွက်မှုအဖွဲ့ (SCO)ရဲ့ ညီလာခံကို အာရှအလယ်ပိုင်း ဒေသတွင်း နိုင်ငံမှာ ၂ ရက်ကြာ ကျင်းပပြီး ဩဂုတ် ၃၁ ရက်နေ့မှာ ရှီနဲ့ ပူတင်တို့ သီးခြား တွေ့ဆုံခဲ့တာပါ။ အဲဒီ အစည်းအဝေးကို အီရန် သမ္မတ မာဆွတ်ဒ် ပက်ဇက်ရှ်ခန်း၊ တူရကီ သမ္မတ ရာဂျစ် တာယစ် အာဒိုဝမ်၊ အိန္ဒိယ ဝန်ကြီးချုပ် နာယန်ဒရာ မိုဒီ၊ ပါကစ္စတန် သမ္မ ရှာဘက်ဇ် ရှရစ်ဖ်တို့လည်း တက်ရောက်ခဲ့ပါတယ်။
နှစ်စဉ် ကျင်းပတဲ့ SCO အစည်းအဝေးတွေဟာ ရှီနဲ့ ပူတင်တို့က သူတို့ရဲ့ နိုင်ငံတကာရေးရာ မူဝါဒတွေကို ပုံရိပ်မြှင့်တင်ဖို့၊ အနောက်နိုင်ငံတွေအပေါ် ဆန့်ကျင်မှုကို ပူးပေါင်းပြသဖို့ အသုံးချတဲ့ ကိရိယာတွေလို ဖြစ်ခဲ့ပါတယ်။
နှစ်ဦး တွေ့ဆုံကြချိန်မှာတော့ ရှီက ပူတင်နဲ့ ဆုံရတာကို ဝမ်းသာကြောင်း၊ တရုတ်နဲ့ ရုရှား ဆက်ဆံရေးဟာ ပိုမိုကျစ်လစ် ခိုင်မာလာတဲ့အပြင် ဒီထက် တောက်ပလာဦးမယ့် အနာဂတ် အလားအလာတွေကို မြင်နေရကြောင်း ပြောကြားခဲ့ပါတယ်။
Public Service Announcement
ပူတင်ကလည်း နှစ်နိုင်ငံ ပူးပေါင်း ဆောင်ရွက်မှုတွေဟာ ကဏ္ဍပေါင်းစုံမှာ အောင်မြင်နေတယ်လို့ ချီးကျူးခဲ့ပါတယ်။ သူတို့နှစ်ဦးဟာ မေလတုန်းက နောက်ဆုံး တွေ့ထားခဲ့ကြပါတယ်။
လွန်ခဲ့တဲ့ ၄ နှစ်ခွဲလောက်က ဖြစ်ပွားခဲ့တဲ့ ယူကရိန်း စစ်ပွဲနောက်ပိုင်း အနောက်နိုင်ငံတွေရဲ့ အရေးယူ ပိတ်ဆို့မှုတွေကြောင့် ရုရှားရဲ့ စီးပွားရေးဟာ တရုတ်အပေါ် အကြီးအကျယ် မှီခိုလာရပါတယ်။
ရှီနဲ့ ပူတင်တို့ တွေ့ဆုံမှုမှာတော့ ယူကရိန်း စစ်ပွဲအကြောင်းကိုသာ ဆွေးနွေးဖြစ်ခဲ့တယ်လို့ ရုရှား အစိုးရ ပြောရေးဆိုခွင့်ရ အရာရှိ ဒီမစ်ထရီ ပက်စ်ကော့ဗ်က ဆိုပါတယ်။
လွန်ခဲ့တဲ့ ၂၅ နှစ်က စတင်ဖွဲ့စည်းခဲ့တဲ့ SCOဟာ စီးပွားရေးဆိုင်ရာ ပူးပေါင်းဆောင်ရွက်မှုတွေကိုပဲ အဓိက ထားခဲ့ပေမယ့် မကြာသေးခင် နှစ်ပိုင်းတွေအတွက် ရုရှားနဲ့ တရုတ်တို့ရဲ့ နိုင်ငံရေးအရ ဦးဆောင်တဲ့ လွှမ်းမိုးမှုတွေ သိသိသာသာ ပိုမိုကြီးထွားလာတယ်လို့ နိုင်ငံတကာရေးရာ အကဲခတ်တွေက သုံးသပ်ထားကြပါတယ်။
ကိုးကား: AFP
