ဘိုလီးဗီးယားက စစ်တန်းလျား တစ်ခုမှာ ပေါက်ကွဲမှုဖြစ်ပြီး ၁၀ ဦးထက်မနည်းသေဆုံး

ဘိုလီးဗီယားနိုင်ငံက စစ်တန်းလျား တစ်ခုမှာ ပေါက်ကွဲမှု ဖြစ်ပွားပြီး လူ ၁၀ ဦးထက်မနည်း သေဆုံးခဲ့ကြောင်း သိရပါတယ်။

လာပက်ဇ်မြို့တော်နဲ့ ကီလိုမီတာ ၃၀ လောက်အကွာ ဗီယာချာ ဒေသမှာရှိတဲ့ စစ်တန်းလျားမှာ စက်တင်ဘာ ၄ ရက် မွန်းလွဲပိုင်းက အပြင်းအထန် ပေါက်ကွဲခဲ့တာပါ။ ပေါက်ကွဲမှု အကြောင်းရင်းကို တိတိကျကျ မသိရသေးပေမယ့် ခဲယမ်းသိုလှောင်တဲ့ နေရာတစ်ခုမှာ ဖြစ်ပွားခဲ့တာလို့ အာဏာပိုင်တွေက ပြောပါတယ်။

ကာကွယ်ရေးဝန်ကြီး အာနက်စ်တို ဂျူစတင်နီယာနိုက ၁၀ ဦးသေ၊ ၆၂ ဦး ဒဏ်ရာရပြီး ၇ ဦး ပျောက်ဆုံးနေကြောင်း၊ သေဆုံးစာရင်းက ထပ်တိုးလာနိုင်ခြေရှိကြောင်း သတင်းထောက်တွေကို မှတ်ချက်ပေးခဲ့ပါတယ်။ ဒဏ်ရာရသူတွေထဲမှာ တစ်ကိုယ်လုံးနီးပါး အပြင်းအထန် မီးလောင်ခံခဲ့ရတဲ့ မိန်းကလေး တစ်ဦးလည်း ပါဝင်ခဲ့ပါတယ်။

ပေါက်ကွဲမှုဒဏ်ကြောင့် စစ်တန်းလျား အနီးတဝိုက်က နေအိမ်တွေ အများအပြားမှာပါ မှန်တွေ ကွဲထွက်ကုန်တာ အပါအဝင် ထိခိုက်ပျက်စီးမှုတွေ ဖြစ်ပေါ်ခဲ့ပါတယ်။ ပေါက်ကွဲမှုအပြီး စစ်တန်းလျား တဝိုက်မှာ လူနာတင်ယာဉ်တွေ၊ မီးသတ်ကားတွေ၊ ရဲကားတွေ အများအပြား ရောက်ရှိလာခဲ့ကြောင်းလည်း မျက်မြင်တွေက ပြောပါတယ်။

Public Service Announcement

မီးသတ်တပ်ဖွဲ့က အခင်းဖြစ်ရာ နေရာမှာ ဆင့်ကဲပေါက်ကွဲနိုင်တဲ့ ခဲယမ်းတွေ ရှိနေနိုင်တာကြောင့် အနီးတဝိုက် ဧရိယာတွေကို ရွှေ့ပြောင်းထားစေသလို စစ်တန်းလျားနဲ့ အနည်းဆုံး ၁၅၀ မီတာလောက် ခွာနေကြဖို့လည်း ဒေသခံတွေကို ညွှန်ကြားထားပါတယ်။

ကိုးကား: CBS