မြန်မာပြည်သူများနှင့်အတူ ဆက်လက်ရပ်တည်ပြီး စစ်တပ်တာဝန်ရှိသူများကို အရေးယူနိုင်ရေး လုပ်ဆောင်မည်ဟုဗြိတိန်​ပြော

ဗြိတိန်အစိုးရသည် အဖိနှိပ်ခံမြန်မာပြည်သူအားလုံးနှင့်အတူဆက်လက်ရပ်တည်​မည်ဖြစ်ပြီး စစ်တပ်၏ ကျူးလွန်မှုများအတွက် တာဝန်ရှိသူများကို အရေးယူဆောင်ရွက်နိုင်ရေး ဆက်လက်လုပ်ဆောင်သွားမည်ဟု ဗြိတိန်သံရုံးက ထုတ်ပြန်သည်။

“ခွဲခြားဆက်ဆံမှု၊ အလွဲသုံးစားခံရမှုတွေနဲ့ရင်ဆိုင်နေရတဲ့ ပြည်သူအားလုံးနဲ့အတူ ယူကေအစိုးရကဆက်လက်ရပ်တည်သွားမှာဖြစ်ပြီး၊ ကျူးလွန်မှုတွေအတွက် တာဝန်ရှိသူတွေကို အရေးယူဆောင်ရွက်နိုင်ဖို့ ဆက်လက်လုပ်ဆောင်သွားမှာ ဖြစ်ပါတယ်”ဟု ဗြိတိန်သံအမတ်အဖြစ် ခန့်အပ်ထားခြင်းခံရသူ Pete Vowles က ပြောသည်။

မြန်မာပြည်သူများစွာသည် ယခုခရစ္စမတ်ကာလတွင်ပျော်ပျော်ရွှင်ရွှင်ဆင်နွှဲရမည့်အစား စစ်တပ်အာဏာသိမ်းမှု၏ အကျိုးဆက်များဖြစ်သည့် သေကြေ ပျက်ဆီး ဆုံးရှုံးမှုများဖြင့်သာ ရင်ဆိုင်နေကြရကြောင်း သံရုံး၏ ယနေ့(ဒီဇင်ဘာ ၂၅ ရက်)ထုတ်ပြန်ချက်၌ ဖော်ပြသည်။

“ခရစ္စမတ်ကာလဟာ စည်းလုံးညီညွတ်မှုအတွက် အချိန်အခါဖြစ်ပြီး ဗြိတိသျှသံရုံးမိသားစု၀င်အားလုံးရဲ့ကိုယ်စား အခုအခက်အခဲဒုက္ခတွေနဲ့ ကြုံတွေ့ခံစားနေရတဲ့ မြန်မာပြည်သူလူထုအတွက် ကိုယ်ချင်းစာကြောင်း မိမိပြောကြားလိုပါတယ်” ဟု Pete Vowles က ဆို သည်။

Public Service Announcement

ဆက်လက်ပြီး “အခုနှစ်မှာ အထူးသဖြင့် စစ်တပ်ရဲ့ ခွဲခြားဆက်ဆံမှုနဲ့ အလွဲသုံးစားလုပ်ခံနေရတဲ့ မြန်မာနိုင်ငံတလွှားက ခရစ်ယာန်ဘာသာဝင်များနဲ့ တခြားဘာသာဝင်များအတွက် မိမိတို့ဆုတောင်းပေးနေပါတယ်”ဟု ၎င်းက ပြောသည်။

ဘာသာရေး အဆောက်အဦများကို မီးရှို့ဖျက်ဆီးခြင်းနှင့် အသင်းတော်ခေါင်းဆောင်များအပေါ် ပစ်မှတ်ထားခြင်းကဲ့သို့သော လတ်တလော အကြမ်းဖက်မှုများသည် ဘာသာရေးယုံကြည်ချက်ဖြစ်သော အခြေခံလူ့အခွင့် အရေးကို ပြောင်ပြောင်တင်းတင်း ချိုးဖောက်ခြင်းဖြစ်ကြောင်း သံရုံးက ထုတ်ပြန်သည်။