အောက်တိုဘာ ၉၊ ၂၀၂၆။ ထားမြတ်/People’s Spring
ရေဘေးသင့်ဒဏ်ခံစားနေရတဲ့ တနင်္သာရီတိုင်း သရက်ချောင်းမြု့နယ်အတွင်း စစ်ကြောင်းထိုးတဲ့ စစ်တပ်က အရပ်သား ၁ဦးကို ဖမ်းဆီးနှိပ်စက် သတ်ဖြတ်ခဲ့ကြောင်းကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။
KNU အုပ်ချုပ်နယ်မြေသတ်မှတ်ချက်အရ မြိတ်ထားဝယ်ခရိုင် ကစယ်ဒိုမြို့နယ်(သရက်ချောင်းနယ်)ကို စစ်ကြောင်းထိုးလာတဲ့ စစ်ကောင်စီရဲ့ ခမရ(၄၀၃)၊ (၄၀၄)နဲ့ (၄၀၉) ပူးပေါင်းစစ်ကြောင်းဟာ အောက်တိုဘာ ၆ရက်နေ့မှာ ထီးမဲ့ဘော(သဲချောင်းကြီး)ကျေးရွာက ပြည်သူ ၁ဦးကို ရက်စက်စွာ သတ်ဖြတ်ခဲ့တာလို့ ဖော်ပြပါတယ်။
အာဏာသိမ်းစစ်တပ်ဟာ အာဏာတည်မြဲရေးအတွက် ပြည်သူလူထုအား ရက်ရက်စက်စက် ညှင်းပန်းနှိပ်စက် သတ်ဖြတ်နေတာဖြစ်ကြောင်းလည်း KNUမြိတ်ထားဝယ်ခရိုင်က ထုတ်ပြန်ပါတယ်။
Public Service Announcement
စစ်တပ်ဟာ အောက်တိုဘာ ၅ရက်ကလည်း သရက်ချောင်းမြို့နယ် ပြင်းဖြူကြီးကျေးရွာ ကို လက်နက်ကြီးနဲ့ ပစ်ခတ်ခဲ့လို့ အမျိုးသမီး ၁ဦးသေဆုံးခဲ့ရတယ်လို့ KNU မြိတ်ထားဝယ်ခရိုင် သတင်းရင်းမြစ်က ပြောပြထားပါတယ်။
အာဏာသိမ်းစစ်တပ်ဟာ မကြာသေးမီက ရေကြီး၊ မြေပြိုလို့ ဘေးအန္တရာယ်ကြုံတွေ့နေရတဲ့ တနင်္သာရီတိုင်း လောင်းလုံ၊ ရေဖြူ၊ သရက်ချောင်း မြို့နယ်တွေကို လေကြောင်းတိုက်ခိုက်တာ၊ လက်နက်ကြီးပစ်ခတ်တာအပြင် မြေပြင်စစ်ကြောင်းထိုးနေတယ်လို့ ဒေသတွင်းတော်လှန်ရေးတပ်တွေက ထုတ်ပြန်ထားပါတယ်။
တနင်္သာရီတိုင်း ထားဝယ်ခရိုင် တစ်ခုလုံးမှာ ရေကြီးမှု၊ မြေပြိုမှုဖြစ်ကာ လူသေဆုံးမှုနဲ့ အခက်အခဲ ပေါင်းစုံကို ရင်ဆိုင်ကြုံတွေ့နေရချိန် စစ်ကြောင်းထိုး ဗုံးကြဲနေတဲ့ စစ်တပ်ကို လက်တုန့်ပြန်သွားမယ်လို့ ဓဝယ်အမျိုးသားလွတ်မြောက်ရေးတပ်တော် (DNLA)က ထုတ်ပြန်ခဲ့သလို
ပြည်သူ့ကာကွယ်ရေးတပ်မတော်(PDF) တနင်္သာရီတိုင်း စစ်ဌာန နည်းဗျူဟာ (၃၃)ကလည်း ပြည်သူ့အခက်အခဲ လျစ်လျူရှုပြီး စစ်ကြောင်းထိုးလာရင် လိုအပ်သလို ပြင်းထန်စွာ အရေးယူမယ်လို့ သတိပေးထားပါတယ်။
ပြည်သူတွေအနေနဲ့လည်း စစ်တပ်ရဲ့ သွားလာလှုပ်ရှား ထိုးစစ်ဆင်မှု၊ လေယာဉ်ဗုံးကြဲမှုတွေကို အထူးအလေးထား ဂရုစိုက်ကြဖို့ တော်လှန်ရေးတပ်ဖွဲ့တွေဘက်က အသိပေးတိုက်တွန်းထားပါတယ်။
