အောက်တိုဘာ ၁၅၊ ၂၀၂၆။ ထားမြတ်/People’s Spring
စစ်ကိုင်းတိုင်းဒေသနဲ့ ကချင်ပြည်ဒေသအနှံ့ကို အာဏာသိမ်းစစ်တပ်က အင်အားတွေ ဖြည့်တင်းနေကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက ဖော်ပြပါတယ်။
အောက်တိုဘာ ၁၄ရက်သတင်းဖော်ပြချက်မှာ အောက်တိုဘာအတွင်း စစ်ကိုင်းတိုင်း အင်းတော်ဒေသ၊ ရှမ်းမြောက် မိုးမိတ်ဒေသ၊ နဲ့ ကချင်ပြည်နယ် ဒေသအချို့ မှာစစ်တပ်ရဲ့ စစ်ရေးလှုပ်ရှားမှု တွေကို ဖော်ပြခဲ့တာဖြစ်ပါတယ်။
KIA တပ်ရင်း(၃၄)ဒေသဖြစ်တဲ့ ရှမ်းမြောက် မိုးမိတ်-မဘိမ်းကြား နေရာတွေမှာ တိုက်ပွဲတွေ ဆက်ရှိနေကြောင်း အသိပေးပါတယ်။
Public Service Announcement
KIA တပ်ရှိရာကို စစ်တပ်က ထိုးစစ်ဆင်လာလို့ တိုက်ပွဲတွေဖြစ်နေတာလို့ ဆိုပါတယ်။အောက်တိုဘာ ၁၄ရက်က စစ်တပ် အင်အား ၃၀ခန့်ဟာ KIA တပ်ရှိရာ ၉မိုင်ဘက်ကို ထိုးစစ်ဆင်လာလို့ တိုက်ပွဲပြင်းထန်ခဲ့သလို အောက်တိုဘာ ၁၃ရက်ညနေပိုင်းကလည်း ၇မိုင်ကျေးရွာအနီးမှာ တိုက်ပွဲဖြစ်ခဲ့တယ်လို့ ဖော်ပြပါတယ်။ ဒါ့အပြင် ၆မိုင်ကျေးရွာဘက်မှာလည်း စစ်တပ် စစ်ရေးလှုပ်ရှားလာတဲ့အပေါ် KIAက ဒရုန်း လက်နက်ကြီးတွေနဲ့တိုက်ခိုက်ခဲ့တယ်လို့ ဆိုပါတယ်။
အင်းတော်ဒေသမှာ အောက်တိုဘာက စတင်ပြီး စစ်တပ်က အင်အားရိက္ခာဖြည့်တင်းလာလို့ တိုက်ပွဲတွေဖြစ်နေတယ်လို့ အသိပေးပါတယ်။ စစ်ကိုင်းဒေသ စစ်ရေးအခြေအနေ ပြန်လည်ရှုပ်ထွေးလာမှုကြောင့် ကားလမ်းအချို့ပိတ်ထားကြောင်းလည်း ဖော်ပြပါတယ်။ စစ်ကောင်စီတပ်က စစ်ကိုင်းဒေသနဲ့ ကချင်ဒေသအနှံ့ စစ်အင်အားဖြည့်တင်းတာ ဆက်တိုက်ပြုလုပ် နေကြောင်း KIA ရဲ့ သတင်းဖော်ပြချက်မှာပါရှိပါတယ်။
ဒ့ါအပြင် ကချင်ပြည်နယ် တနိုင်းဒေသ လီဒိုလမ်းမှာလည်း စစ်တပ်နဲ့ မင်းဇေသန့် ပြည်သူ့စစ်တပ်တွေဟာ အောက်တိုဘာ ၁၂ရက်မှာ စစ်အင်အားဖြည့်တင်းတာတွေ အရင်ထက်ပိုလုပ်လာတာ တွေ့ရတယ်လို့ ဖော်ပြပါတယ်။
လဝါးကျေးရွာကနေ တနိုင်းမြို့ အထိ စစ်ဆေးရေးဂိတ်နေရာအားလုံး စစ်အင်အား လက်နက်အင်အားဖြည့်တင်းတာ ကတုတ်ကျင်းတူးတာ ယခင်ကထက်ပိုလုပ် နေသလို ဝါရာဇွပ်၊ ရှဒူးဇွပ် က ဆင်းလာတဲ့ ပြည်သူ့စစ်တပ်တွေဟာ အောက်တိုဘာ ၁၁ရက်မှာ နောင်းမီ KBC ဆုတောင်းတောင်ခြေမှာ စခန်းချထားတယ်လို့ဆိုပါတယ်။
လီဒိုလမ်းမတလျှောက် စစ်ဆေးရေးဂိတ်ချ၊ စစ်အင်အားဖြည့်တင်းနေလို့ ပြည်သူတွေ သတိထားသွားလာဖို့ လိုအပ်ကြောင်းလည်း သတိပေးထားပါတယ်။
စစ်တပ်ဟာ အောက်တိုဘာ ဒုတိယပတ်မှာ မန္တလေးဘက်ကနေ ကချင်ပြည်နယ်ကို စစ်ယာဉ်တန်းတွေနဲ့ အင်အား၊ခဲယမ်းဖြည့်တင်းလာတာလို့ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အောက်တိုဘာ ၁၄ရက်မနက်မှာ ပြောကြားထားပါတယ်။ အဲဒီ စစ်ယာဉ်တန်းတွေဟာ မြစ်ကြီးနားမြို့အခြေစိုက် မြောက်ပိုင်းတိုင်းစစ်ဌာချုပ်(မပခ) အပါအဝင် ကချင်ဒေသ စစ်တပ်စခန်းတွေကို စစ်လက်နက်ခဲယမ်း အင်အားတွေ ဖြည့်တင်းနေတာလို့ ပြောပါတယ်။
အခုလို စစ်အင်အားဖြည့်တင်းနေတာဟာ စစ်တပ်ဟာ သူတို့ ဆုံးရှုံးထားတဲ့နယ်မြေဒေသတွေ ပြန်ရဖို့ မူလရှိခဲ့တဲ့ မြို့ယန္တရားတွေ ဆောက်လုပ်နိုင်ဖို့ ကြိုးစားပုံရတယ်လို့ ဗိုလ်မှူးကြီးနော်ဘူက ပြောပါတယ်။
“အဓိကတော့ ဗန်းမော်ဘက်ကို သူတို့ ဆုံးရှုံးထားတဲ့ နယ်မြေတွေကို ပြန်ထိန်းချုပ်နိုင်ဖို့ အတွက် ကြိုးစားပုံရပါတယ်။ ဗန်းမော်ဘက်ကလည်း သင်္ဘောရောက်ပြီးနောက်ပိုင်း မြေပြင်တိုက်ပွဲကလည်း ဆက်တိုက်ရှိပါတယ်” လို့ ဗိုလ်မှူးကြီးနော်ဘူက ပြောပါတယ်။
တိုက်ပွဲဖြစ်ပွားပြီး စစ်ရေးတင်းမာနေတဲ့ ဒေသတွေက ဗန်းမော်၊ မိုးမိတ်၊ အင်းတော်ကြီး ဒေသတွေဖြစ်သလို ခေါင်လန်ဖူးဘက်မှာလည်း စစ်တပ်က အင်အားဖြည့်တာရှိတယ်လို့ ဆိုပါတယ်။ ဒါကြောင့် ခေါင်လန်ဖူးမြို့နယ်မှာ အချိန်မရွေး တိုက်ပွဲဖြစ်နိုင်ခြေရှိကြောင်း အသိပေးပါတယ်။ ၀ိုင်းမော်ဘက်မှာလည်း စစ်တပ်က လက်နက်ကြီးနဲ့ ပစ်၊ ဒရုန်းနဲ့ ကင်းထောက်တာတွေရှိကြောင်း ဗိုလ်မှူးကြီးနော်ဘူက ပြောကြားပါတယ်။
