ရီပတ်ဘလစ်ကန် အမာခံ ပြည်နယ်မှာ ဒီမိုကရက်တစ် အထက်လွှတ်တော် အမတ်လောင်း အနိုင်ရ

နိုဝင်ဘာ ၃ ရက်နေ့က ကျင်းပခဲ့တဲ့ အမေရိကန် ကြားကာလ ရွေးကောက်ပွဲမှာ လွှတ်တော် နှစ်ရပ်ရဲ့ အမတ်နေရာတွေအတွက် မဲရေတွက်မှုတွေ မပြီးဆုံးသေးပေမယ့် အာဏာရ ရီပတ်ဘလစ်ကန် ပါတီအတွက် အထိနာစေမယ့် ရလဒ်တစ်ခုတော့ ထွက်ပေါ်လာပါတယ်။

တောင်ပိုင်း ကာရိုလိုင်းနား ပြည်နယ်ရဲ့ အထက်လွှတ်တော် အမတ်နေရာ ရွေးကောက်ပွဲမှာ အတိုက်အခံ ဒီမိုကရက်တစ် ပါတီရဲ့ အမတ်လောင်း အန်နီ အန်ဒရူးစ်က အနိုင်ရသွားပြီး ရီပတ်ဘလစ်ကန် ကိုယ်စားပြု လက်ရှိအမတ် ဒါလိုင်း ဂရေဟမ်ကို နေရာကနေ ဖယ်ထုတ်လိုက်နိုင်ကြောင်း အမေရိကန် မီဒီယာတွေက ဖော်ပြခဲ့ပါတယ်။

ဒါကြောင့် ဒီမိုကရက်တစ် ပါတီဟာ အထက်လွှတ်တော်မှာ ရီပတ်ဘလစ်ကန်တွေ အသာစီး ရမှုကို ပြောင်းပြန် လှန်ပစ်ဖို့ မျှော်လင့်ချက်အတွက် အရေးပါတဲ့ အမတ်နေရာ တစ်ခုစာ တိုးပြီး ရထားပြီ ဖြစ်ပါတယ်။

အန်ဒရူးစ်ဟာ ကလေးအထူးကု ဆရာဝန် တစ်ဦးဖြစ်ပြီး တောင်ပိုင်း ကာရိုလိုင်းနား ပြည်နယ်ရဲ့ သမိုင်းမှာ နောက်ဆုံး နှစ်ပေါင်း ၂၀ ကျော် ကာလအတွင်း ပထမဆုံးအကြိမ် ဒီမိုကရက်တစ် ပါတီ ကိုယ်စားပြု အထက်လွှတ်တော် အမတ် ဖြစ်လာတော့မှာပါ။ သူနဲ့ ယှဉ်ပြိုင်ခဲ့တဲ့ ဂရေဟမ်ကတော့ အစ်ကိုဖြစ်သူ သက်တော်ရှည် အမတ်ဟောင်း လင်းဆေးဂရေဟမ် ကွယ်လွန်သွားလို့ အခုနှစ်လယ်လောက်တုန်းက အစားထိုး ဆက်ခံထားသူ ဖြစ်ပါတယ်။

Public Service Announcement

အန်ဒရူးစ်ရဲ့ အနိုင်ရမှုဟာ ရီပတ်ဘလစ်ကန် ပါတီအတွက် ထိုးနှက်ချက် ဖြစ်သွားရုံသာ မကဘဲ ဒီမိုကရက်တစ် ပါတီကိုယ်တိုင် အတွက်လည်း အံ့ဩစရာ ဖြစ်ခဲ့ပါတယ်။ တောင်ပိုင်း ကာရိုလိုင်းနားမှာ လွန်ခဲ့တဲ့ နှစ်ပေါင်း ၂၀ ကျော်အတွင်း ဒီမိုကရက်တစ် ပါတီက လုံးဝ အနိုင်မရခဲ့ဖူးသလို ရဲရဲတောက် ရီပတ်ဘလစ်ကန် နယ်မြေလို့တောင် သတ်မှတ် ခံထားရတာ ဖြစ်ပါတယ်။

ရီပတ်ဘလစ်ကန် အားကောင်းလှတဲ့ ပြည်နယ်တစ်ခုမှာတောင် ဒီမိုကရက်တစ် အထက်လွှတ်တော် အမတ်တစ်ဦး အနိုင်ရသွားတယ်ဆိုတဲ့ အခြေအနေက သမ္မတ ထရမ့်ရဲ့ မူဝါဒတွေအပေါ် လူထုထောက်ခံမှု လျော့နည်းလာနေတယ် ဆိုတာကို ပိုပြီး ထင်ရှား မြင်သာလာစေပါတယ်။

အထက်လွှတ်တော် အမတ်နေရာအတွက် အခုရွေးကောက်ပွဲမှာ ယှဉ်ပြိုင်တဲ့ ပြည်နယ်တွေမှာတော့ မစ်ချီဂန် ပြည်နယ် ရွေးကောက်ပွဲရဲ့ အနေအထားကိုလည်း အများစုက စိတ်ဝင်စားနေပါတယ်။ အကြောင်းကတော့ ဒီမိုကရက်တစ် ပါတီ အမတ်လောင်း အက်ဘ်ဒူ အယ်လ်ဆာယတ်ဒ်ကြောင့်ပါ။ တကယ်လို့ အခု ရွေးကောက်ပွဲမှာ အနိုင်ရခဲ့မယ်ဆိုရင် အယ်လ်ဆာယတ်ဒ်ဟာ အမေရိကန်ရဲ့ ပထမဆုံး မွတ်ဆလင် အထက်လွှတ်တော် အမတ် ဖြစ်လာနိုင်ပါတယ်။ မစ်ချီဂန်ဟာ ဒီမိုကရက်တစ်ပါတီ အားကောင်းတဲ့ နယ်မြေဖြစ်ပြီး လက်ရှိ အခြေအနေ အရလည်း အယ်လ်ဆာယတ်ဒ် အနိုင်ရဖို့ အလားအလာ များနေပါတယ်။

နယူးဟမ့်ရှိုင်းယား ပြည်နယ် ရွေးကောက်ပွဲမှာတော့ ဒီမိုကရက်တစ် ပါတီရဲ့ ခရစ္စပက်ပါ့စ်က အနိုင်ရခဲ့ပြီး ကိုယ့်ကိုယ်ကိုယ် လိင်တူ စုံမက်သူ (gay)အဖြစ် ကြေညာထားသူတွေထဲမှာ ပထမဆုံး အမေရိကန် အထက်လွှတ်တော် အမတ်နေရာအတွက် တင်မြှောက် ခံရသူ ဖြစ်လာပါတယ်။

ရီပတ်ဘလစ်ကန် ပါတီဟာ ဝိုင်အိုမင်း၊ အိုကလာဟိုးမား၊ ကန်တက်ကီ၊ အနောက်ဗာဂျီးနီးယား၊ ဖလော်ရီဒါစတဲ့ ပြည်နယ်တွေမှာတော့ အထက်လွှတ်တော် နေရာတွေကို ဆက်လက် ထိန်းသိမ်းထားနိုင်ပြီး မွန်တာနာ၊ တောင်ပိုင်းဒါကိုတာ၊ မင်နီဆိုးတား၊ လူဝီစီးယားနားစတဲ့ ပြည်နယ်တွေက မဲရေတွက်မှုတွေမှာ ဦးဆောင်နေပါတယ်။

ဒီမိုကရက်တစ် ပါတီကတော့ ကော်လိုရာဒို၊ နယူးမက္ကဆီကို၊ အီလီနွိုက်စ်၊ မြောက်ကာရိုလိုင်းနား၊ ဂျော်ဂျီယာစတဲ့ ပြည်နယ်တွေမှာ အထက်လွှတ်တော် အမတ်နေရာတွေကို ဆက်လက် ထိန်းသိမ်းထားဖို့ သေချာနေပြီး တက္ကဆက်စ်၊ အိုင်ယိုဝါ၊ ကန်းဆက်စ်၊ အိုဟိုင်ယိုစတဲ့ ပြည်နယ်တွေရဲ့ မဲရေတွက်မှုတွေမှာ အသာစီးက ဦးဆောင်နေပါတယ်။

အခုရွေးကောက်ပွဲမှာတော့ အောက်လွှတ်တော် အမတ်နေရာ အားလုံးအတွက် ပြည်နယ်အားလုံးမှာ ရွေးကောက်ပွဲ ပြန်လည် ယှဉ်ပြိုင်ရပြီး အဲဒီ ရွေးကောက်ပွဲတွေမှာတော့ ဒီမိုကရက်တစ် ပါတီက အသာစီး ရထားပြီလို့ ကနဦး မဲရလဒ်တွေက ညွှန်ပြနေပါတယ်။ ဒါကြောင့် လွှတ်တော်နှစ်ခုထဲက အနည်းဆုံး အောက်လွှတ်တော်ရဲ့ ထိန်းချုပ်ခွင့်ကိုတော့ ရီပတ်ဘလစ်ကန် ပါတီက လက်လွှတ်ရဖို့ အလားအလာ များသွားပြီ ဖြစ်ပါတယ်။

ကိုးကား: NBC