စစ်​ကောင်စီလက်နက်ကြီးနဲ့ပစ်လို့ ​ကော့ကရိတ်မှာပြည်သူ ၇ ဦးဒဏ်ရာရ

အာဏာသိမ်းစစ်ကောင်စီတပ် လက်နက်ကြီးနဲ့ပစ်ခတ်မှုကြောင့် ကော့ကရိတ်မှာ ကလေးငယ်တစ်ဦးအပါအဝင် ဒေသခံပြည်သူ ၇ ဦး ထိခိုက်ဒဏ်ရာရရှိသွားခဲ့ပြီး အဲ့ဒီထဲမှာ သုံးဦးက ဒဏ်ရာပြင်းထန်တယ်လို့ ကရင်လူ့အခွင့်အရေးအဖွဲ့(KHRG)က သတင်းထုတ်ပြန်ပါတယ်။

ဒီကနေ ဇန်နဝါရီ ၈ ရက် မနက် ၇ နာရီအချိန်ခန့်က ကော့ကရိတ်မြို့အခြေစိုက် စစ်ကောင်စီရဲ့ ခလရ(၉၇)တပ်ရင်းထဲကနေ လက်နက်ကြီးနဲ့ ကော့ကရိတ်မြို့နယ် ကော့နွဲ့ကျေးရွာအုပ်စု မြို့ဟောင်းကျေးရွာထဲကို ပစ်ခတ်ခဲ့တာပါ။

ဒီလို စစ်ကောင်စီရဲ့လက်နက်ကြီးကြောင့် မြို့ဟောင်းကျေးရွာက အမျိုးသားတစ်ဦးနဲ့ အမျိုးသမီး ခြောက်ဦး ထိခိုက်ဒဏ်ရာရရှိသွားခဲ့ပြီး ဒဏ်ရာရရှိသူတွေထဲက အမျိုးသမီးသုံးဦးမှာ ဒဏ်ရာပြင်းထန်တယ်လို့ ထုတ်ပြန်ချက်မှာ ဖော်ပြထားပါတယ်။

ထိခိုက်ဒဏ်ရာရရှိသူတွေထဲမှာ ကလေးငယ်တစ်ဦးပါဝင်ပြီး ဒဏ်ရာရရှိသွားတဲ့ ဒေသခံတွေကိုတော့ နီးစပ်ရာဆေးပေးခန်းကို ပို့ဆောင်ပေးခဲ့တယ်လို့ KHRG က ဆိုထားပါတယ်။

Public Service Announcement

ပစ်ခတ်မှုကြောင့် လူနေအိမ် ၄ လုံးနဲ့ ဘုန်းကြီးကျောင်းလည်း ထိခိုက်ပျက်စီးခဲ့ရပြီး အဲဒီလိုလက်နက်ကြီးနဲ့ပစ်ခတ်တာတွေကြောင့် ကော့နွဲ့ကျေးရွာအုပ်စုအတွင်းက ဒေသခံတွေအတွက် လုံခြုံမှုမရှိတော့ပဲ ထွက်ပြေးတိမ်းရှောင်နေကြရတာ ဖြစ်ပါတယ်။

ပြီးခဲ့တဲ့ ဒီဇင်ဘာ ၂၄ ရက်ကလည်း စစ်ကောင်စီရဲ့လက်နက်ကြီးကြောင့် ကောနွဲ့ကျေးရွာမှာ ဒေသခံပြည်သူတစ်ဦးရဲ့နေအိမ် ပျက်စီးသွားခဲ့ပါသေးတယ်။

ပြီးခဲ့တဲ့ ဒီဇင်ဘာလက စတင်ကာ ကေအဲန်ယူ-ဒူးပလာယာခရိုင် ကော့ကရိတ်မြို့နယ် ကော့နွဲ့ကျေးရွာအုပ်စုထဲမှာ ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၆ နဲ့ အာဏာသိမ်းစစ်ကောင်စီတပ်တို့အကြား စစ်ရေးပဋိပက္ခတွေပြင်းထန်နေပြီး ကော့နွဲ့ကျေးရွာအပါအဝင် ရွာ ၆ ရွာက ဒေသခံပြည်သူ ၂၀၀၀ ခန့်ဟာ လက်ရှိမှာ တိမ်းရှောင်နေရတာ ဖြစ်ပါတယ်။