▪️စစ်ကောင်စီတပ်သား ၁၅ဦးထက်မနည်းသေဟုဆို
ကချင်ပြည်နယ်နှင့် စစ်ကိုင်းတိုင်းအစပ်ရှိ မြို့လှမြို့ နယ်မြေအတွင်း ခြေလျင်စစ်ကြောင်းထိုးလာသည့် အကြမ်းဖက်စစ်ကောင်စီတပ်နှင့် တိုက်ပွဲဖြစ်ရာ
အကြမ်းဖက်စစ်ကောင်စီတပ်သား ၁၅ဦးထက်မနည်း သေဆုံးကြောင်း မြို့လှPDFက ယနေ့(ဇန်နဝါရီ ၁၈)တွင် ထုတ်ပြန်သည်။
တိုက်ပွဲဖြစ်စဥ်မှာ မြို့လှနယ် ရွှေငြိမ်းချမ်းကျေးရွာမှ ခြေလျင်စစ်ကြောင်းထိုး တက်လာသော အင်အား ၅၀ ကျော်ရှိသည့် အကြမ်းဖက်စစ်ကောင်စီတပ်ကို ဇန်နဝါရီ ၁၇ ရက် နံနက် ၉ နာရီခန့်က အမှတ်ကြီးကုန်းရွာအနီးတွင် မြို့လှ PDF နှင့် KIA ပူးပေါင်းတပ်ဖွဲ့တို့က ပူးပေါင်းတိုက်ခိုက်ခဲ့သည်။
တိုက်ပွဲအတွင်းလက်နက်ကြီးများဖြင့် အပြန်အလှန် ပစ်ခတ်မှုများရှိခဲ့ကြောင်း မြို့လှ PDFက ဆိုသည်။
Public Service Announcement
အကြမ်းဖက်စစ်ကောင်စီဘက်မှ ၁၅ဦးထက်မနည်း သေဆုံး၍ အမြောက်အများဒဏ်ရာရရှိခဲ့ပြီး မြို့လှ PDF တပ်မှ ရဲဘော် သုံးဦးမစိုးရိမ်ရဒဏ်ရာ ရရှိခဲ့ကြောင်း ထုတ်ပြန်ချက်၌ ဖော်ပြသည်။
ယနေ့ နံနက်ပိုင်းတွင် အကြမ်းဖက်စစ်ကောင်စီဘက်မှသေဆုံးသူနှင့် ဒဏ်ရာရရှိသူများကို နီးစပ်ရာ ယရေလမ်းကြောင်းမှတစ်ဆင့် သယ်ဆောင်နေကြောင်းလည်း မြို့လှ PDF က အသိပေးသည်။
ယခုလဆန်းပိုင်းကစ၍ ဧရာဝတီမြစ်ကြောင်း ပေါ်မှတစ်ဆင့် ကချင်နှင့် စစ်ကိုင်း အထက်ပိုင်းတွင် အင်အားဖြည့်တင်နေသော အကြမ်းဖက်စစ်ကောင်စီတပ်ကို မြို့လှ PDFက အကြိမ်ကြိမ် ဆီးကြိုတိုက်ခိုက်ခဲ့သည်။
ဇန်နဝါရီ ၅ရက်က အကြမ်းဖက်စစ်ကောင်စီ၏ တပ်သားများတင်ဆောင်လာသည့် သဘော်တစ်စီးပျက်စီးကာ စစ်ကောင်စီတပ်သား ၅၀ဦးထက်မနည်း သေဆုံးခဲ့ကြောင်း မြို့လှ PDFက ထုတ်ပြန်ထားသည်။
အလားတူ ဇန်နဝါရီ ၈ ရက်ကလည်း ရွှေကူမြို့ နယ်အတွင် တိုက်ပွဲ နှစ်နေရာဖြစ်ပွားခဲ့ကာ စစ်ကောင်စီတပ်သား ၂၅ဦးခန့် သေဆုံးနိုင်ကြောင်း မြို့လှPDF က ဆိုသည်။
