စစ်တပ်အာဏာသိမ်းတဲ့ နေ့ကတည်းက မတရားဖမ်းဆီးခံထားရတဲ့ ၈၈ မျိုးဆက်ကျောင်းသားခေါင်းဆောင် ဦးမြအေးကို ရာဇသတ်ကြီး ပုဒ်မ ၅၀၅ (ဂ) နဲ့ ဒီနေ့မှာ ထောင်ဒဏ် ၂ နှစ်ချလိုက်တယ်လို့သိရပါတယ်။
ဒီလို ထောင်ဒဏ်ချခံရတဲ့နေ့ဟာ ဦးမြအေးရဲ့ ၅၆ နှစ်မြောက်မွေးနေ့ဖြစ်သလို မတရားဖမ်းဆီးချုပ်နှောင်ထားတာ ၁ နှစ်နဲ့ ၁၀ ရက်ကြာတဲ့ နေ့လည်းဖြစ်တယ်လို့ ဦးမြအေး ရဲ့သမီးကြီး မဝေနှင်းပွင့်သုန်က လူမှုကွန်ရက်ကနေ အသိပေးထားပါတယ်။
အမိန့်ချ တဲ့အခါ ချုပ်ရက်ခံစားခွင့်ပေးတယ်လို့သိရပါတယ်။
” လျော့ရက်နဲ့တွက်ရင် နောက်တစ်နှစ်ပဲကျန်တော့တယ်ဆိုပေမယ့် ထောင်ထဲမှာ တစ်နှစ်ဆိုတဲ့အချိန်ကနည်းတာမဟုတ်ဘူး။ ပြီးရင် မအလတို့ လုပ်ချင်သလိုလုပ်နေတဲ့အချိန်၊ ဥပဒေက သူတို့ပါးစပ်ပေါ်မှာရှိနေတဲ့အချိန်မှာ မျော်လင့်ချက်လဲမထားရဲဘူး” လို့မဝေနှင်းပွင့်သုန်က ဆိုထားပါတယ်။
Public Service Announcement
စစ်ကောင်စီဟာ အာဏာသိမ်းတဲ့မနက်အစောပိုင်းမှာ ဦးမြအေးကို ဖမ်းဆီးသွားခဲ့တာပါ။ အဲဒီနောက် လွန်ခဲ့တဲ့ ၈ နှစ်က တရုတ်နိုင်ငံသားတစ်ဦးဆီ ပို့ခဲ့တဲ့ အီးမေးလ်တစ်စောင်ကိုအကြောင်းပြုကာ ထောင်ဒဏ် ၂ နှစ်ထိချလို့ရတဲ့ ရာဇသတ်ကြီးပုဒ်မ ၅၀၅ (ဂ)နဲ့ တရားစွဲဆိုတာဖြစ်ပါတယ်။
ဒီပုဒ်မဟာ လူမျိုးအချင်းချင်းကိုဖြစ်စေ ၊ လူမျိုးတစ်မျိုးနဲ့ တစ်မျိုးကိုဖြစ်စေ ၊တစ်ဖက်နဲ့တစ်ဖက် ပြစ်မှုကျုးလွန်အောင်လှုံဆော်ရာ ရောက်တယ်ဆိုတဲ့ကိစ္စတွေမှာ စွဲဆိုတဲ့ပုဒ်မမျိုးဖြစ်ပါတယ်။
ဦးမြအေးကတော့ သူ့မှာအပြစ်မရှိကြောင်း တရားခွင်မှာ ထုချေထားပါတယ်။
ဖမ်းဆီးခံထားရတဲ့တစ်နှစ်ကျော်ကြာအချိန်အတွင်း ဦးမြအေးဟာ ကျန်းမာရေး ထိခိုက်လာတဲ့အတွက် ဆေးရုံတက်ရောက်ကုသမှုခံခဲ့ရပါသေးတယ်။
