ကုလအထူးကိုယ်စားလှယ်နှင့် အာဆီယံအထူးကိုယ်စားလှယ်တို့ မြန်မာ့အရေး ပူးပေါင်းကြိုးပမ်းရန် ဆွေးနွေး

မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ်နှင့် အာဆီယံအထူးကိုယ်စားလှယ်တို့ ယမန်နေ့က ​တွေ့ဆုံကာ မြန်မာပြည်ငြိမ်းချမ်းရေးအတွက် ပူးပေါင်းကြိုးပမ်းရန်ဆွေးနွေးခဲ့ကြောင်း AFP သတင်းဌာနက ဖော်ပြ သည်။

အာဆီယံအထူးကိုယ်စားလှယ်၊ ကမ္ဘောဒီးယားနိုင်ငံခြား ရေးဝန်ကြီးက မတ်လနှောင်းပိုင်းတွင် မြန်မာနိုင်ငံသို့လာရောက်ခဲ့သည့်ခရီးစဥ်နှင့်ပတ်သက်၍ ကုလအထူးကိုယ်စားလှယ်ကို ရှင်းလင်းခဲ့သည်ဟု ဆိုသည်။

အာဆီယံအထူးကိုယ်စားလှယ်သည် လာမည့် မေလအစောပိုင်းတွင် မြန်မာပြည်၌ လူသားချင်းစာနာမှုအကူအညီပေးနိုင်ရေး အစီအစဥ်များကိုလည်း ဆွေးနွေးခဲ့ကြောင်း ကမ္ဘောဒီးယား နိုင်ငံခြားရေးဝန်ကြီးဌာနက ထုတ်ပြန်သည်။

မြန်မာစစ်တပ်၏ စစ်ဆင်ရေးများကြောင့် ပြည်သူထောင်ပေါင်းများစွာ အိုးမဲ့အိမ်မဲ့ဖြစ်ခဲ့ရသည်။

Public Service Announcement

ကုလသမဂ္ဂနှင့် အာဆီယံသည် သံတမန်နည်းလမ်းဖြင့် မြန်မာ့အကျပ်အတည်းကို အဖြေရှာရန် ကြိုးပမ်းခဲ့သော် လည်း ၎င်းတို့၏ ကြိုးပမ်းအားထုတ်မှုသည် အနည်းငယ်သာရှိသည်။

ကုလသမဂ္ဂသည် ဗီတိုပိုင်ဆိုင်သော မြန်မာစစ်တပ်၏ မဟာမိတ် တရုတ်နှင့် ရုရှားတို့ကြောင့် စစ်ဗိုလ်ချုပ်ကြီးများကို ထိရောက်စွာစုပေါင်းအရေးယူရန် မစွမ်းသာဖြစ်နေသည်။

အာဆီယံ၏ ကြိုးပမ်းမှုမှာ စစ်ကောင်စီကို အွန်လိုင်းမှ အစည်းအဝေးတက်ရောက်ခွင့် မပေးခြင်းသာ ရှိသည်။

အကြမ်းဖက်မှုများချက်ချင်းရပ်တန့်ရေး၊ သက်ဆိုင်သူများအကြား ဆွေးနွေးအဖြေရှာရေး စသည့် အချက်များပါဝင်သည့် အာဆီယံ၏ ဘုံဆုံးဖြတ် ၅ ရပ်ကို ချမှတ်သည်မှာ တစ်နှစ်နီးပါးရှိလာသည့်တိုင် ထိရောက်သောတိုးတက်မှု မရှိသေးပေ။

မကြာသေးခင်က မြန်မာသို့ လာရောက်ခဲ့သော အာဆီယံအထူးကိုယ်စားလှယ်သည် အကြမ်းဖက်စစ်ကောင်စီခေါင်းဆောင်၊ ၎င်း၏ လက်အောက်ခံ ဝန်ကြီးများ၊ နိုင်ငံရေးပါတီအချို့တို့နှင့်သာ ထိတွေ့ဆက်ဆံခဲ့သည်။

ပြည်သူလူထုရွေးကောက်ခံအများစုဖြင့် စုဖွဲ့ထားသော အမျိုးသားညီညွတ်ရေးအစိုးရ NUG နှင့် တွေ့ဆုံဆွေးနွေးခဲ့ခြင်းမရှိမှုအပေါ် NUG က စိတ်ပျက်ကြောင်း ထုတ်ပြန်ထားသည်။