လက်နက်၊ခဲယမ်း အခက်အခဲကြောင့် စစ်ကောင်စီတပ်များကို တိုက်ခိုက်မှု ခေတ္တရပ်တန့်ထားရပြီး ပြန်လည်ဖြည့်နိုင်ရန် လုပ်ဆောင်နေကြောင်း မတူပီ ချင်းဒေသကာကွယ်ရေးတပ်(CDF) ပြောရေးဆိုခွင့်ရှိသူက ပြောကြားသည်။
မင်းတပ်မှ မတူပီမြို့သို့ အင်အားဖြည့်တင်းရန်လာသည့် စစ်ကောင်စီယာဉ်တန်းကို သွားကြိုသည့် မတူပီ အခြေ စိုက် စစ်ကောင်စီတပ်များကို မတ်လ ၃၀ရက်မှစ၍ မတူပီ CDFက တိုက်ခိုက်မှုများ ဆက်တိုက် လုပ်ဆောင်ခဲ့ရာ ဧပြီ ၂ရက်အထိ တိုက်ပွဲများ နေ့စဉ်ဖြစ်ပွားခဲ့သည်။
လတ်တလော မတူပီဒေသ စစ်ရေးအခြေအနေကို မေးမြန်းရန် မတူပီ CDF ပြောရေးဆိုခွင့်ရှိသူက “လောလောဆယ် ကျွန်တော်တို့ဘက်က လက်နက်ခဲယမ်းပိုင်း နည်းနည်းလေး၊ ရှင်းရှင်းပြောရရင် ကျည်ကုန်ပြီပေါ့။ ကျည်ဆံကုန်လို့ ကျွန်တော်တို့ဘက်က ခဏလေးတော့ ရပ်တန့်ထားတယ်။ ဒါပေမဲ့အခြေအနေတစ်ခုတော့ စောင့်ကြည့်နေတာပေါ့။ လက်နက်ခဲယမ်းပိုင်း ရတဲ့ဘက်က ပြန်ပြီးတော့ အားဖြည့်နိုင်ဖို့ ကြိုးစားနေတာလေ”ဟု ပြောသည်။
လတ်တလောတွင် မင်းတပ်မြို့မှဆင်းလာသည့် စစ်ယာဉ်တန်းသည် မင်းတပ် – မတူပီလမ်း မိုင်တိုင်(၇၀) အနီးရောက်လာပြီဟု သတင်းရပြီး မကြာမီ မတူပီ မြို့နယ်အတွင်း ဝင်ရောက်လာတော့မည်ဟုဆိုသည်။
Public Service Announcement
မင်းတပ် CDF အနေဖြင့်လည်း စစ်ကောင်စီတပ်ကို ကြားဖြတ်တိုက်ခိုက်မှုများ မတ်လ ၂၆ရက်မှစ၍ နေ့စဉ်နီးပါး ပြုလုပ်ခဲ့ရာ စစ်ကောင်စီယာဉ်တန်းအနေဖြင့် တစ်နေ့လျင် ငါးမိုင်ခန့်သာ ခရီးတွင်ကြောင်း မင်းတပ် CDF တာဝန်ရှိသူတစ်ဦးက ပြောသည်။
မည်သို့ပင်ဖြစ်စေ မတူပီမြို့နယ်၌ တိုက်ပွဲများပြင်းထန်လာနိုင်သည့် အနေအထားရှိ၍ ပြည်သူလူထုများကို အားကိုးကြောင်း မတူပီ CDFက ပြောသည်။
“လက်နက်ခဲယမ်းပိုင်းကို ပိုပြီးမှ ထောက်ပံ့ပေးနိုင်မယ် ပေးဖို့ ကျွန်တော်တို့ မျှော်လင့်နေပါတယ်လို့ သတင်း စကား ပါးချင်ပါတယ်”ဟု မတူပီ CDF ပြောရေးဆိုခွင့် ရှိသူက ပြောသည်။
မတူပီ CDF၏ တိုက်ခိုက်မှုများကြောင့်မတ်လ ၃၀ရက်မှ ဧပြီ ၂ရက်အတွင်း စစ်ကောင်စီတပ်မှ အရာရှိ အပါအဝင် စစ်ကောင်စီတပ်ဖွဲ့ဝင် ၂၅ဦးထက်မနည်း သေဆုံးပြီး ဒဏ်ရာရသူများလည်းရှိကြောင်း မတူပီ CDFက ထုတ်ပြန်ထားသည်။
