ကေအဲန်ယူ-တောအူး(တောင်ငူ)ခရိုင် တပ်မဟာ ၂ နယ်မြေဖြစ်တဲ့ သံတောင်-တောင်ငူလမ်းပိုင်းမှာ ကင်းလှည့်နေတဲ့ စစ်ကောင်စီတပ်သားနှစ်ဦး ဒီကနေ့မနက်ပိုင်းက မိုင်းဆွဲတိုက်ခိုက်ခံရပြီး သေဆုံးသွားခဲ့တယ်လို့ တောအူးကရင်သတင်းစဉ်က ထုတ်ပြန်ထားပါတယ်။
ဒီကနေ့ ဧပြီ ၂၀ ရက် မနက် ၆ နာရီခွဲအချိန်ခန့်က သံတောင်ကြီးမြို့နယ် သံတောင်မြို့နဲ့ ပျားစခန်းကျေးရွာကြားမှာရှိတဲ့ ၁၁ မိုင်ကုန်းအနားမှာ ခြေလျင်နဲ့ကင်းလှည့်နေတဲ့ စစ်ကောင်စီတပ်သား နှစ်ဦး မိုင်းဆွဲတိုက်ခိုက်ခံခဲ့ရပြီး အဲ့ဒီနေရာမှာ ပွဲချင်းပြီးသေဆုံးသွားခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
“မနက် ၆ နာရီခွဲခန့်က အသံအကျယ်ကြီး နှစ်ချက်ကြားရတယ်။ သံတောင်မြို့လမ်း အမှိုက်ပစ်နေရာအောက်က ထင်ပါတယ်။ ပြီးတော့မကြာဘူး။ မြို့ဝင်ဂိတ်ကို စစ်ကောင်စီက ပိတ်ထားတယ်။ သူတို့က လာသမျှလူတွေကို စစ်ဆေးတာပါ။ နောက်မှ သိရတာက စစ်တပ်နှစ်ဦးမိုင်းဆွဲခံရလို့ သေသွားပြီတဲ့”လို့ ဒေသခံတစ်ဦးက ဆိုပါတယ်။
မိုင်းဆွဲတိုက်ခိုက်ခံခဲ့ရလို့ သေဆုံးသွားတဲ့ စစ်ကောင်စီတပ်သားနှစ်ဦးထံကနေ လက်နက်နှစ်လက် သိမ်းဆည်းရခဲ့တယ်လို့ နယ်မြေခံ KNLA တပ်မဟာ ၂ ထံကနေ သိရပါတယ်။
Public Service Announcement
အဆိုပါ မိုင်းပေါက်ကွဲနေစဉ် စစ်ကောင်စီတပ်သားတွေကြား ဒေသခံတစ်ဦးမောင်းနှင်လာတဲ့ ဆိုင်ကယ်တစ်စီးလည်း ဖြတ်လာခဲ့ကာ တိမ်းမှောက်သွားခဲ့ပြီး ဒဏ်ရာအနည်းငယ်ရရှိခဲ့တယ်လို့ သိရပါတယ်။
ပြီးခဲ့တဲ့ ၂၀၂၁ ခုနှစ် နိုဝင်ဘာလပိုင်းက အဲ့ဒီလမ်းပိုင်း စစ်ကောင်စီတပ်ဟာ မိုင်းဆွဲတိုက်ခိုက်ခံခဲ့ရသေးတာဖြစ်ပြီး ပြည်သူတွေအနေနဲ့ စစ်ကောင်စီနဲ့ နီးနီးကပ်ကပ် သွားလာတာတွေ မပြုလုပ်ကြဖို့ နယ်မြေခံ KNLA တပ်က ပြောကြားပါတယ်။
