စစ်ကိုင်းတိုင်း၊ ထီးချိုင့်မြို့နယ်ရှိ မန္တလေး – ဗန်းမော်ဗျူဟာလမ်းဘေးရှိ ကျေးရွာများသို့ စစ်ကြောင်းထိုးလာသည့် အကြမ်းဖက်စစ်ကောင်စီတပ်ကို စောင့်ကြိုတိုက်ခိုက်ရာ ၂၀ခန့် သေဆုံးကြောင်း Special.9-HPDF က ထုတ်ပြန်သည်။
ယနေ့(မေလ ၂ ရက်) နံနက် ၉နာရီခန့်ကစ၍ အင်အား ၁၀၀ခန့်ပါ စစ်ကောင်စီစစ်ကြောင်းကို
အင်းရွာလမ်းဆုံအနီး Special.9 နှင့် Fox Army -HPDFတို့ ပူးပေါင်းကာ စောင့်ကြိုတိုက်ခိုက်ခဲ့သည်ဟု ဆိုသည်။
ထို့နောက် အဆိုပါစစ်ကြောင်းကိုပင် ညောင်ပင်စုနှင့် ကိုးတဲရွာကြား၌ မဟာမိတ်အဖွဲ့ Special.9-HPDF ၊FOX Army -HPDF၊ ကိုးတောင်ကျားနှင့် ရေမြွေအဖွဲ့တို့ ထောင်ထားသည့် မိုင်းကွင်းအတွင်း ထပ်မံတိုက်ခိုက်နိုင်ခဲ့ကြောင်း Special.9-HPDF က အသိပေးသည်။
“ကျွန်တော်တို့ နောက်ဆုံးရတဲ့သတင်းအရဆို မိုင်းမိသွားတဲ့ စခ စစ်ကြောင်းဟာ ကိုးတဲရွာနားမှာ နာရေးကားတွေစောင့်နေတယ်။ပြီးတော့ အဲဒီနားက တဲ ငါးတဲကို မီးရှို့ နေတယ်”ဟု Special.9-HPDF တာဝန်ရှိသူက People’s Spring သို့ ပြောသည်။
Public Service Announcement
ယနေ့ တိုက်ခိုက်မှုနှစ်ကြိမ်တွင် စစ်ကောင်စီတပ်သား ၂၀ခန့်သေဆုံးကာ ဒဏ်ရာရရှိသူ ၂၀ထက်မနည်းရှိနိုင်ကြောင်း ၎င်းက ဆိုသည်။
မတ်လအတွင်းကလည်း စစ်ကောင်စီတပ်မှ ဗိုလ်ကြီးတစ်ဦးအပါအဝင် သုံးဦးခန့် သေဆုံးခဲ့သော တကောင်းမြို့ မောင်းကုန်းကျေးရွာအနီး မိုင်းဆွဲတိုက်ခိုက်မှုကို Special.9-HPDF က ဆောင်ရွက်ခဲ့ခြင်းဖြစ်သည်။
