ကရင်အမျိုးသားအစည်းအရုံး(KNU) တပ်မဟာ(၅) နယ်မြေ ဖာပွန်ခရိုင်၌ ဧပြီအတွင်းက တိုက်ပွဲပေါင်း ၃၈၃ကြိမ် ဖြစ်ပွားခဲ့ရာ စစ်ကောင်စီတပ်မှ ၁၇၃ဦး သေဆုံးပြီး ၈၇ ဦး ဒဏ်ရာရခဲ့ကြောင်း တပ်မဟာ(၅)က သတင်းထုတ်ပြန်သည်။
KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA)နှင့် စစ်ကောင်စီတပ်၊ စစ်ကောင်စီလက်အောက်ခံ နယ်ခြားစောင့်တပ်(BGF) တို့အကြား ဧပြီလအတွင်း တိုက်ပွဲဖြစ်ပွားမှု အခြေအနေများကို ယမန်နေ့တွင် ဖော်ပြခဲ့ခြင်းဖြစ်သည်။
စစ်ကောင်စီတပ်မှ သေဆုံးသူများထဲတွင် တပ်ရင်းမှူးတစ်ဦး၊ ဒုတပ်ရင်းမှူး တစ်ဦး၊ တပ်ကြပ်ကြီး နှစ်ဦးနှင့် တပ်ကြပ်တစ်ဦး ပါဝင်ကြောင်း အတည်ပြုသိရှိရသည်ဟု ဆိုသည်။
ထို့ပြင် စစ်ကောင်စီတပ်၏ ထောက်ပို့မြင်းလား ၄ကောင်ကို သုတ်သင်နိုင်ခဲ့ပြီး စစ်ကောင်စီတပ် ထောက်ပို့အတွက် သုးသည့် တံတား ၃စီး ၊ မော်တော်ယာဉ် ၄စီးနှင့် လက်နက်သိုလှောင်ရုံ ဂိုဒေါင် ၂လုံးအား ဖျက်ဆီးနိုင်ခဲ့သည်ဟု ဖော်ပြထားသည်။
Public Service Announcement
ကရင်အမျိုးသားတပ်မတော်(KNLA)ဘက်မှလည်း စစ်သည် သုံးဦး ကျဆုံးကာ ၁၆ဦး ဒဏ်ရာရရှိခဲ့သည်ဟု ဆိုသည်။
စစ်ကောင်စီတပ်က ပြည်သူလူထုနေထိုင်ရာ ကျေးရွာများနှင့် လယ်ယာ၊ဥယျာဉ်ခြံမြေများ အတွင်းသို့ လေကြောင်းမှ တိုက်ခိုက်ခြင်း၊ လက်နက်ကြီးများဖြင့် ပစ်ခတ်ခြင်းတို့ ဆက်လက် ပြုလုပ်ခဲ့ကြောင်း ဖော်ပြထားသည်။ထိုသို့ တိုက်ခိုက်မှုများကြောင့် အရပ်သားသေဆုံးထိခိုက်မှုများရှိခဲ့သော်လည်း အရေအတွက် အတိအကျ ကို ဖော်ပြမထားပေ။
