ဖရူဆိုမြို့နယ်တွင် မေလ၆ရက်က ဖြစ်ပွားခဲ့သည့် တိုက်ပွဲအတွင်း KNDFမှ ရဲဘော်တစ်ဦး ကျဆုံးခဲ့ရသည်။
မေလ၆ရက် နေ့လယ်က ဖရူဆိုမြို့နယ်၊ မာခရော်ရှေ့ကျေးရွာနှင့် လောကျေခူရွာသစ်ကျေးရွာကြား တိုက်ပွဲတွင် ၎င်းတို့တပ်မှ ရဲဘော်ခူးသဲရယ် ကျဆုံးခဲ့ရသည်ဟု ကရင်နီအမျိုးသားများကာကွယ်ရေးတပ်(KNDF) တပ်ရင်း(၁၅)က သတင်းထုတ်ပြန်သည်။
“ရဲဘော် မင်းတာဝန်ကျေလွန်းခဲ့ပြီ။ ကောင်းရာမွန်ရာရောက်ပါစေ”ဟု ခူးသံရယ်၏ စျာပန မှတ်တမ်းဓာတ်ပုံနှင့်အတူ KNDFတပ်ရင်း(၁၅)က ထုတ်ပြန်ထားသည်။
မေလ ၆ရက်တိုက်ပွဲတွင် ကရင်နီတပ်မတော်(KA)၊ ကရင်နီအမျိုးသားများကာကွယ်ရေးတပ်(KNDF) တပ်ရင်း(၄)နှင့်တပ်ရင်း(၁၅)တို့က အကြမ်းဖက်စစ်ကောင်စီကို ပူးပေါင်းတိုက်ခိုက်ခဲ့ကြခြင်းဖြစ်သည်။
Public Service Announcement
အကြမ်းဖက်စစ်ကောင်စီဖက်မှ သေဆုံးမှုရှိခဲ့သော်လည်း အတိအကျမသိရဟု ထုတ်ပြန်ထားသည်။
ကရင်နီပြည်နယ်၌ ယခုရက်ပိုင်းတိုက်ပွဲတွင် စစ်ကောင်စီ အထိနာနေပြီး လေကြောင်းအသုံးပြုတိုက်ခိုက်နေသည်။
ထို့အပြင် မေလ ၆ရက်ကလည်း ရှားတောတိုက်ပွဲတွင် စစ်ကောင်စီဘက်က ခမရ(၄၂၈)ဒုတပ်ရင်းမှူးအပါအဝင် ခြောက်ဦးသေဆုံးခဲ့သည်။ မေလ ၇ရက်က ဖရူဆိုတိုက်ပွဲတွင်လည်း စစ်ကောင်စီယာဥ်တန်းကို ဖျက်ဆီးနိုင်ခဲ့ပြီး အရှင်ဖမ်းမိသူများရှိသည်ဟု KNDFက ထုတ်ပြန်ထားသည်။
