ကေအဲန်ယူ-ဒူးပလာယာခရိုင် တပ်မဟာ ၆ နယ်မြေထဲက စစ်ဘေးရှောင်တွေနေထိုင်တဲ့ ကျေးရွာသုံးရွာကို ကျုံဒိုးမြို့နယ် စည်းရုံးရေးနဲ့ပြန်ကြားရေးဌာနက ဦးဆောင်ပြီး ဆန်အိတ်တွေ သွားရောက်ဝေပေးခဲ့တယ်လို့ သိရပါတယ်။
မေ ၂၉ ရက်က ကေအဲန်ယူ-ကျုံဒိုးမြို့နယ် လောင်းကိုင်ကျေးရွာအုပ်စုထဲက ကော့ဖောင်း၊ မိထလန်းနိုင်နဲ့ ကမော့ကသူကျေးရွာသုံးရွာက အိမ်ခြေ (၃၆၀)အတွက် တစ်အိမ်ကို ၂၀ ပြည်ဝင် ဆန်အိတ်တစ်အိတ်နှုန်းနဲ့ သွားရောက်ဝေငှပေးခဲ့တယ်လို့ ဒူးပလာယာခရိုင်က သတင်းထုတ်ပြန်ထားပါတယ်။
“ကျုံဒိုးမြို့နယ်အတွင်း ၃ လပိုင်း ၁၁ ရက်နေ့ကစပြီး အခုချိန်ထိ ပစ်ခတ်မှုမရပ်သေးတာကြောင့် ပြည်သူတွေရဲ့ စားဝတ်နေရေး သက်သာစေဖို့ တဖက်တလမ်းကနေ သွားရောက်ပေးဝေရတာဖြစ်တယ်၊ နောက်လာမယ့် ၆ လပိုင်း ၇ လပိုင်းတွေမှာလည်း သွားရောက်ပေးဝေသွားဦးမယ်” လို့ ကျုံဒိုးမြို့နယ် စည်းရုံးရေးနဲ့ ပြန်ကြားရေးဌာန အတွင်းရေးမှူးက ပြောပါတယ်။
ဒါ့အပြင် ပြီးခဲ့တဲ့ မေလ ၂၃ ရက်ကလည်း တောင်ကြာအင်းကျေးရွာအုပ်စုထဲမှာ စားနပ်ရိက္ခာအချို့ကို သွားရောက်ဝေငှပေးခဲ့သေးတယ်လို့ ထုတ်ပြန်ချက်မှာ ဖော်ပြထားပါတယ်။
ကေအဲန်ယူ-ကျုံဒိုးမြို့နယ်အတွင်းမှာ စစ်ကောင်စီရဲ့ နယ်မြေကျူးကျော်ပြီး တပ်စွဲထားမှုတွေကြောင့် ပြီးခဲ့တဲ့မတ်လအတွင်းက စတင်ပြီး စစ်ကောင်စီတပ်နဲ့ KNDO တပ်ရင်း ၆ ပူးပေါင်းတပ်ဖွဲ့တို့အကြား တိုက်ပွဲဖြစ်ပွားခဲ့ရာ ဒေသခံပြည်သူတွေများစွာ စစ်ဘေးရှောင်နေခဲ့ကြရတာဖြစ်ပါတယ်။