လစ်ဗျားမှာ ဆန္ဒပြသူတွေက လွှတ်တော်ကို စီးနင်းခဲ့တဲ့ကိစ္စ ကုလသမဂ္ဂ ရှုတ်ချ

ဆန္ဒပြသူတွေက လစ်ဗျား လွှတ်တော် အဆောက်အအုံထဲ ဝင်ရောက် စီးနင်းခဲ့တဲ့ လုပ်ရပ်အပေါ် ကုလသမဂ္ဂက ရှုတ်ချသွားခဲ့ပါတယ်။

လစ်ဗျားမှာ နိုင်ငံရေး မတည်ငြိမ်မှုနဲ့ စီးပွားရေး ကျပ်တည်းမှုတွေကြောင့် အစိုးရအပေါ် မကျေမနပ် အုံကြွ ဆန္ဒပြမှုတွေ ဖြစ်ပေါ်ခဲ့ပြီး ဇူလိုင် ၁ ရက်ကတော့ မြို့တော် ထရီပိုလီ အပါအဝင် မြို့ကြီးတချို့မှာ အခြေအနေတွေ အတော်လေး ဆိုးရွားသွားခဲ့ပါတယ်။ ဆန္ဒပြသူတွေဟာ နိုင်ငံအနှံ့က အစိုးရ အဆောက်အအုံတွေထဲ အတင်းအကျပ် ဝင်ရောက် သောင်းကျန်းခဲ့ပြီး နိုင်ငံ အရှေ့ပိုင်းက တိုဘရက်ခ်မြို့ရဲ့ လွှတ်တော်ကိုလည်း တိုက်ခိုက် စီးနင်းခဲ့ပါတယ်။

ကုလသမဂ္ဂရဲ့ လစ်ဗျားနိုင်ငံဆိုင်ရာ အထူးကိုယ်စားလှယ် စတက်ဖနီ ဝီလျံစ်က ဒီမိုကရေစီအရ ဆန္ဒပြကြတယ် ဆိုတာဟာ အခုလို မင်းမဲ့စရိုက်ဆန်ဆန် ကျူးလွန်မှုတွေ ရောစပ်ခွင့် မရှိဘူးလို့ ပြောပါတယ်။ ပြည်သူလူထုက ငြိမ်းချမ်းစွာ ဆန္ဒပြကြတယ် ဆိုတာမျိုးကို လေးလေးစားစား ကာကွယ်ပေးရမှာ ဖြစ်ပေမယ့် ဖျက်လိုဖျက်ဆီး ဆူပူ သောင်းကျန်းကြတာမျိုး၊ ဥပမာ အနေနဲ့ လွှတ်တော် အဆောက်အအုံထဲ ဝင်စီးနင်းတာမျိုးတွေက လုံးဝ လက်ခံနိုင်စရာ မရှိဘူးလို့ သူက ဝေဖန်ခဲ့ပါတယ်။

လစ်ဗျားမှာ လက်ရှိ အခြေအနေတွေကို အမြန်ဆုံး ပြန်တည်ငြိမ်အောင် ထိန်းသိမ်းဖို့ အရမ်းအရေးကြီးကြောင်း၊ ပြဿနာတွေ ဆိုးသထက် ဆိုးမလာအောင် သက်ဆိုင်ရာ အဖွဲ့အစည်း အသီးသီးက ပူးပေါင်း ဆောင်ရွက်ဖို့လိုကြောင်း ဝီလျံစ်က ဆိုပါတယ်။

Public Service Announcement

ထရီပိုလီ မြို့တော်က ဥပဒေပြု အဖွဲ့နဲ့ လွှတ်တော် ခေါင်းဆောင်တွေကြား နောက်တစ်ကြိမ် ဆွေးနွေးမှုတွေ အဆင်မပြေခဲ့တဲ့နောက် နိုင်ငံရေး ကဏ္ဍ တိုးတက်မှု အားနည်းနေတာကို စိတ်ပျက်လာတဲ့ ပြည်သူတွေက ဆန္ဒပြကြတာ ဖြစ်ပါတယ်။ လစ်ဗျားဟာ ဒီဇင်ဘာလမှာ ရွေးကောက်ပွဲ ကျင်းပနိုင်ဖို့ ရည်ရွယ်ထားခဲ့ပေမယ့် ဥပဒေကိစ္စ အငြင်းပွားမှုတွေ အပါအဝင် အရှုပ်အထွေးမျိုးစုံကြောင့် အထမမြောက်နိုင်သေးပါဘူး။ ဒါ့အပြင် ပြည်တွင်းက လက်နက်ကိုင် အင်အားစုတွေနဲ့ နိုင်ငံခြား တပ်ဖွဲ့တွေကလည်း ရွေးကောက်ပွဲအပေါ် လွှမ်းမိုး သက်ရောက်မှုတွေ အနည်းနဲ့အများ ရှိနေပြန်ပါတယ်။

ဆွစ်ဇာလန်နိုင်ငံ၊ ဂျနီဗာမြို့မှာ ကုလသမဂ္ဂက ကြားဝင် စေ့စပ်ပေးထားတဲ့ ဆွေးနွေးမှုတွေ ပျက်ပြယ်သွားခြင်းက မြေထဲပင်လယ် ဒေသတွင်း နိုင်ငံရဲ့ ငြိမ်းချမ်းရေးကို ကူညီ တည်ဆောက်ဖို့ ကြိုးစားနေတဲ့ နိုင်ငံတကာ အသိုက်အဝန်းအတွက် ထိုးနှက်ချက် တစ်ခုလည်း ဖြစ်လာပါတယ်။

ဆွေးနွေး ညှိနှိုင်းမှုတွေမှာ ယာယီ ဝန်ကြီးချုပ် အက်ဘ်ဒူဟာမစ် ဒီဘီဘာက ထရီပိုလီ အခြေစိုက် အစိုးရအဖွဲ့ကို ဦးဆောင်ပြီး ပြိုင်ဘက် အင်အားစုကိုတော့ စစ်ခေါင်းဆောင် ခါလီဖာဟက်ဖ်တာနဲ့ တိုဘရက်ခ် အခြေစိုက် လွှတ်တော် ကိုယ်စားလှယ်တွေ ထောက်ခံတဲ့ ပြည်ထဲရေး ဝန်ကြီးဟောင်း ဖာသီ ဘာရှက်ဂ်ဟာက ဦးဆောင်ခဲ့ပါတယ်။

ဆွေးနွေးမှုတွေ ကြာရှည်လာပေမယ့် နိုင်ငံရေး အခြေအနေတွေ ရှေ့မတိုးသာ နောက်မဆုတ်သာ ဖြစ်နေခြင်းကြောင့် စီးပွားရေးပါ ကျပ်တည်းလာခြင်းက လစ်ဗျား ပြည်သူတွေရဲ့ ဒေါသကို မီးစာဖြည့်ပေးလိုက်ပါတယ်။ လစ်ဗျားရဲ့ အဓိက နိုင်ငံခြား ဝင်ငွေ ရင်းမြစ်တစ်ခုဖြစ်တဲ့ စွမ်းအင် ထုတ်လုပ်ရေး ကဏ္ဍကလည်း နိုင်ငံရေး ပြဿနာတွေကြောင့် ဘက်ပေါင်းစုံ ကျဆင်းမှုတွေ ကြုံနေရကြောင်း သိရပါတယ်။