ကြားကာလဖက်ဒရယ်သူနာပြုနှင့် သားဖွားကောင်စီ (မြန်မာနိုင်ငံ)ဖွဲ့စည်းလိုက်ကြောင်း ဖက်ဒရယ် ကျန်းမာ ရေးပညာရှင်များကောင်စီက ယနေ့(စက်တင်ဘာ ၄)အသိပေးထုတ်ပြန်သည်။
မြန်မာနိုင်ငံ သူနာပြုနှင့်သားဖွားများအတွက် လိုင် စင်ကိစ္စရပ်များအပါအဝင် သူနာပြု၊ သားဖွားရေးရာကိစ္စရပ်များကို တတ်စွမ်းသမျှ ကူညီဆောင်ရွက်ပေးနိုင်ပါရန်နှင့် ဖက်ဒရယ် ကျန်းမာရေးပညာရှင်များကောင်စီ၏ လမ်းညွှန်ချက်များအတိုင်း ဆောင်ရွက်ပေးနိုင်ပါရန်ရည်ရွယ်၍ ဩဂုတ် ၈ ရက်တွင် စတင် ဖွဲ့စည်းခဲ့ကြောင်း ဖော်ပြသည်။
ကြားကာလဖက်ဒရယ်သူနာပြုနှင့်သားဖွားကောင်စီ၏ ရည်ရွယ်ချက်များတွင် အချက် (၆)ချက်ပါဝင်ပြီးသူနာ ပြုနှင့်သားဖွားများအား ကာကွယ်မှုပေးနိုင်သော မူဝါဒများ၊ ဥပဒေများပြင်ဆင်ရေးဆွဲခြင်း၊ ဘွဲ့ဒီဂရီအလိုက်အသိအမှတ်ပြုလက်မှတ်များ၊ ထောက်ခံချက်များ၊ လုပ်ငန်းလိုင်စင်များထုတ်ပေးနိုင်ရေး စီစစ်၍ ဆောင် ရွက်ပေးရန်၊ သူနာပြုနှင့်သားဖွားပညာရပ်များကို နိုင်ငံ တကာစံညွှန်းများနှင့်အညီ မြှင့်တင်ဆောင်ရွက်ရန်တို့ ပါဝင်သည်။
ထို့အပြင် သူနာပြုနှင့်သားဖွားပညာရပ်ဆိုင်ရာများကို စဉ်ဆက်မပြတ်လေ့လာဆည်းပူးခြင်း လုပ်ငန်းစဉ်များအား ထိန်းသိမ်းမြှင့်တင်ပေးရန်၊ ကျင့်ဝတ်သိက္ခာများကို လိုက်နာစောင့်ထိန်းရေးအား ကြပ်မတ်ထိန်းသိမ်းရန်၊ပြည်သူလူထုအား တန်းတူညီမျှသော ကျန်းမာရေးစောင့်ရှောက်မှုရရှိစေရေး အဆင့်ဆင့်ကြီးကြပ် ဆောင်ရွက်ရန်ဖြစ် သည်ဟု ဖော်ပြသည်။
Public Service Announcement
ကြားကာလ ဖက်ဒရယ်သူနာပြုနှင့်သားဖွားကောင်စီအနေဖြင့် သူနာပြုနှင့်သားဖွားဆိုင်ရာ မူဝါဒများ၊ ဉပဒေများ ပြင်ဆင်ညှိနှိုင်းရေးဆွဲခြင်း၊ သူနာပြုနှင့်သားဖွားအင် အားစုအတွက် အချက်အလက်များ စစ်ဆေးခြင်း၊လိုင်စင်ကိစ္စရပ်များအတွက် သတင်းအချက်အလက်များ စီစစ်လက်ခံခြင်း၊ ပညာရပ်ဆိုင်ရာ အရည်အသွေးမြှင့်တင်မှု အကဲဖြတ်မှတ်တမ်းများ ပြင်ဆင်ဆောင်ရွက်ခြင်းတို့ကို ဆက်လက်လုပ်ကိုင်သွားမည်ဟု အသိပေးသည်။
အထက်ပါ ကြားကာလဖက်ဒရယ်သူနာ ပြုနှင့်သားဖွားကောင်စီ၏ဥက္ကဋ္ဌအဖြစ် ဖက်ဒရယ်ကျန်းမာရေးပညာ ရှင်များကောင်စီတွင် အဖွဲ့ဝင်အဖြစ်ပါဝင်ဆောင်ရွက်နေသော သူနာပြုနှင့်သားဖွားကိုယ်စားလှယ် ဆရာမက ဆောင်ရွက်ပြီး ပြည်နယ်၊ တိုင်းဒေသကြီး (၁၅)ခုမှ သူနာပြုနှင့်သားဖွားကိုယ်စားလှယ်များ ပါဝင်ဖွဲ့စည်းထား ကြောင်း ထုတ်ပြန်ထားသည်။
