မန္တလေးတိုင်း၊ နွားထိုးကြီးမြို့နယ်၊ ဝက်လူးကျေးရွာတွင် တပ်စွဲထားသော စစ်ကောင်စီတပ်အား တောကျီးကန်းစစ်ဆင်ရေးအဖြစ်လက်နက်ကြီးဖြင့် ပစ်ခတ်တိုက်ခိုက်ခဲ့ရာ စစ်ကောင်စီတပ်သား ထိခိုက်သေဆုံးမှုများရှိကြောင်း နွားထိုးကြီး PDFက သတင်းထုတ်ပြန်သည်။
စက်တင်ဘာလ ၄ ရက်နေ့ ညနေ ၆ နာရီဝန်းကျင်ခန့်က နွားထိုးကြီးမြို့နယ်၊ ဝက်လူးကျေးရွာတွင် တပ်စွဲ၍ ပြည်သူများအပေါ် မတရားခြိမ်းခြောက်အနိုင်ကျင့်ခြင်း၊ ငွေကောက်ခံခြင်း၊ လမ်းသွားလမ်းလာပြည်သူများအား နှိပ်စက်ရိုက်နှက်ခြင်းများ ပြုလုပ်နေသောကြောင့် ထိုအဖွဲ့အားလက်နက်ကြီးဖြင့် ဝင်ရောက်ပစ်ခတ် တိုက်ခိုက်ခဲ့ကြောင်းနွားထိုးကြီးPDFက ယနေ့ စက်တင်ဘာလ ၆ ရက်နေ့တွင်ထုတ်ပြန်သည့် ကြေညာချက်တွင် ဖော်ပြသည်။
ထိုသို့တိုက်ခိုက်မှုကြောင့် စစ်ကောင်စီတပ်သား ၃ဦး သေဆုံးပြီး ဒဏ်ရာရသူအများအပြားရှိကြောင်း နွားထိုးကြီး PDFက အသိပေးသည်။
ဖြစ်စဥ်နှင့်ပတ်သက်ပြီး နွားထိုးကြီး PDFအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
Public Service Announcement
အကြမ်းဖက်စစ်တပ်၏ ထိခိုက်သေဆုံးမှုအခြေအနေနှင့်ပတ်သက်၍ People’s Springကသီးခြားအတည်ပြုနိုင်ခြင်းမရှိသေးပေ။
နွားထိုးကြီး PDF အဖွဲ့သည် စက်တင်ဘာလ ၂ ရက် ညနေပိုင်းကလည်း နွားထိုးကြီးမြို့နယ်၊ ပြင်စည်ကျေးရွာစာသင်ကျောင်းတွင် တပ်စွဲထာသော စစ်ကောင်စီတပ်အား ပစ်ခတ်တိုက်ခိုက်ခဲ့ပြီး ထိခိုက်သေဆုံးမှုများ ရှိနိုင်ကြောင်း ၎င်းအဖွဲ့က ထုတ်ပြန်ခဲ့သည်။
