ဒုက္ခသည် ခုနှစ်သိန်းကျော်နဲ့ ပြည်တွင်းနေရပ်စွန့်ခွာနေရသူတွေအပါအဝင် မြန်မာပြည်သူလူထုအတွက် အရေးပေါ် လူသားချင်းစာနာမှုအကူအညီ ဒေါ်လာ သန်း ၅၀ ကျော်ကို ကူညီထောက်ပံ့ထားတယ်လို့ အမေရိကန်သံရုံးက ဒီနေ့ထုတ်ပြန်ပါတယ်။
ဖေဖော်ဝါရီ၁ ရက် စစ်တပ်အာဏာသိမ်းပြီးနောက်ပိုင်း အကြမ်းဖက်မှုတွေနဲ့ဖိနှိပ်မှုတွေကြောင့် ထွက်ပြေးနေရတဲ့ပြည်သူတွေကို အကူအညီပေးသွားမှာဖြစ်ပြီး အကူ အညီပေးမယ့်အထဲမှာ အသက်ကယ်တင် စောင့်ရှောက်ရေး၊ နေရာထိုင်ခင်း၊ မရှိမဖြစ်ကျန်းမာရေးစောင့်ရှောက်မှု၊ အရေးပေါ်စားနပ်ရိက္ခာတွေအပြင် ရေ၊ မိလ္လာနဲ့ တစ်ကိုယ်ရေကျန်းမာသန့်ရှင်းရေး ဝန်ဆောင်မှုတွေပါဝင်တယ်လို့ ဆိုပါတယ်။
မြန်မာနိုင်ငံက ထွက်ပြေးလာရသူတွေနဲ့ မြန်မာပြည်တွင်းက ပြည်သူတွေအတွက် အကူအညီပေးဖို့ ကုလသမဂ္ဂဆိုင်ရာ အမေရိကန်သံအမတ်ကြီး လင်ဒါသောမတ်စ်ဂရင်းဖီးလ်က သြဂုတ် ၁၀ ရက်မှာကြေညာခဲ့တာဖြစ်ပြီး အကူအညီတွေကို အစိုးရမဟုတ်တဲ့အဖွဲ့အစည်းတွေနဲ့ အခြားသောကုလသမဂ္ဂနဲ့ နိုင်ငံတကာမိတ်ဖက်အဖွဲ့အစည်းတွေကတစ်ဆင့် ပေးအပ်သွားမှာဖြစ်ပါတယ်။
အမေရိကန်ဟာ မြန်မာပြည်သူတွေရဲ့ ဒီမိုကရေစီအရေးအတွက်ဆန္ဒပြတောင်းဆိုမှုကို ထောက်ခံအားပေးတယ်လို့ ထပ်လောင်း ပြောကြားပါတယ်။
Public Service Announcement
ဒါကြောင့် ဖေဖော်ဝါရီ ၁ ရက် အာဏာသိမ်းမှုနဲ့ ပြည်သူလူထုအပေါ် အကြမ်းဖက်နှိပ်ကွပ်မှုအတွက်တာဝန်ရှိတဲ့ စစ်တပ်ခေါင်းဆောင်တွေကို အမေရိကန်က ဒဏ်ခတ်ပိတ်ဆို့အရေးယူခဲ့တာ ဖြစ်တယ်လို့ ဆိုပါတယ်။
အမေရိကန်ရဲ့ ဒဏ်ခတ်အရေးယူမှုဟာ စစ်အာဏာရှင်ကို အထိနာစေဖို့ နဲ့ မြန်မာပြည်သူလူထုအပေါ် စီးပွားရေးအရ ထိခိုက်မှုမရှိစေဘဲ အာဏာသိမ်းမှုနဲ့ လူ့အခွင့်အရေးချိုးဖောက်မှုတွေအတွက်တာဝန်ယူမှု၊ တာဝန်ခံမှုရှိစေရေးအတွက် ချမှတ်ခဲ့တာဖြစ်တယ်လို့ ShareAmerica မှာ ရေးသားဖော်ပြပါတယ်။
(မန္တလေးမြို့၌ ဘာသာပေါင်းစုံသပိတ်စစ်ကြောင်းမှ လူုယ်များ ယနေ့ချီတက်ဆန္ဒပြနေစဥ်၊ဓါတ်ပုံ – Poison)
