စစ်​ကောင်စီခြိမ်းခြောက်မှုများကြောင့်​ ဒေါ်လာအရောင်းအဝယ်ရပ်တန့်

စစ်ကောင်စီက ဒေါ်လာအရောင်းအဝယ်လုပ်ကိုင်သူများကို ဖမ်းဆီးမည်ဟု ခြိမ်းခြောက်နေခြင်းကြောင့် ငွေလဲကောင်တာများနှင့် ပြင်ပမှောင်ခိုဈေးကွက်များတွင် ဒေါ်လာအရောင်းပိတ်ထားကြောင်း ငွေကြေးလုပ်ငန်းဆောင်ရွက်နေသူများကပြောသည်။

စစ်ကောင်စီထိန်းချုပ်ထားသည့် ဗဟိုဘဏ်က ပြည်တွင်းရှိ ဒေါ်လာရောင်းချသူများကို ၎င်းတို့သတ်မှတ်ထား​သောဈေးအတိုင်းမရောင်းချခြင်းကြောင့် ငွေလဲကောင်တာအချို့ကို ခြိမ်းခြောက်ပိတ်သိမ်းစေပြီးနောက် ဈေးကွက်အတွင်း ဒေါ်လာအရောင်းအဝယ် ရပ်ဆိုင်းသွားခြင်းဖြစ်သည်ဟု ငွေလဲလုပ်ငန်းဆောင်ရွက်နေသူများကပြောသည်။

“အခုက ဈေးကွက်ထဲမှာ ဒေါ်လာကို ၂၀၁၀ရှေ့ပိုင်းကလို ခိုးကြောင်၊ခိုးဝှက်ဝယ်နေရတယ်။ ငွေလဲကောင်တာတွေကလည်း ဒေါ်လာကို အဝယ်ပဲရှိတယ်။ အရောင်းပိတ်ထားကြတယ်”ဟု ငွေလဲကောင်တာပိုင်ရှင်တစ်ဦးကပြောသည်။

လက်ရှိမှောင်ခိုဈေးကွက်တွင်လည်းဒေါ်လာအရောင်းအဝယ်မလုပ်ရဲဘဲ ဈေးကွက်တခုလုံး ရပ်တန့်နေခြင်းဖြစ်သည်ဟု ၎င်းကဆက်​ပြောသည်။

Public Service Announcement

“ဒေါ်လာဈေးကို အရောင်းအဝယ်လုပ်လို့ တက်တယ်ဆိုပြီး အရောင်းအဝယ်မဖြစ်အောင်လုပ်တယ်။ စစ်အုပ်စုနဲ့ နီးစပ်သူတွေပဲ ထိန်းချုပ်ပြီး သာမာန်ပြည်သူတွေကို ဒေါ်လာမကိုင်နိုင်အောင် တင်းကျပ်တာ၊ ခြိမ်းခြောက်တာတွေလုပ်နေတယ်”ဟု ရန်ကုန်အခြေစိုက်စီးပွားရေးလုပ်ငန်းရှင်တစ်ဦးကပြောသည်။

ပြည်ပသို့ သွား​ရောက်အလုပ်လုပ်ရန် နိုင်ငံခြားငွေလိုအပ်သူများသည့် ဈေးကွက်အတွင်း ဒေါ်လာများကို ဈေးကြီးပေးဝယ်နေရပြီး လိုသလောက်ဝယ်ယူ၍ မရကြောင်း ပြည်ပအလုပ်အကိုင်ရှာဖွေရေးအေဂျင်စီ ပိုင်ရှင်တစ်ဦးကပြောသည်။

စစ်ကောင်စီထိန်းချုပ်ထားသည့် ဗဟိုဘဏ် အောက်တိုဘာ ၁၇ ရက်က Thomas Khanno ငွေလဲကောင်တာကို သတ်မှတ်ဈေးအတိုင်းရောင်းချခြင်းမပြု​သောကြောင့်ဟုဆိုကာလိုင်စင်ဖျက်သိမ်းကြောင်းကြေညာခဲ့သည်။ထိုအတူ စက်တင်ဘာအတွင်း Family Moe Paing ငွေလဲကောင်တာကိုလည်း စစ်ကောင်စီသတ်မှတ်နှုန်းအတိုင်း ဒေါ်လာမရောင်း၍ဟုဆိုကာလိုင်စင် ၃ လပိတ်သိမ်းခဲ့သည်။

လက်ရှိတွင် စစ်အုပ်စုက အမေရိကန် တစ်ဒေါ်လာကို ၂၁၀၀ကျပ်သတ်မှတ်ထားပြီး ပြင်ပပေါက်ဈေးတွင် တစ်ဒေါ်လာကို ကျပ် ၃၀၀၀ ဝန်းကျင်ရှိနေသည်။