ကမ္ဘာ့ငွေကြေးခဝါချမှု နှင့်အကြမ်းဖက်မှုဘဏ္ဘာရေးဆိုင်ရာစောင့်ကြည့်ရေးအဖွဲ့ FATFက မြန်မာနိုင်ငံကို အမည်ပျက်စာရင်းသွင်းပြီးနောက်ဒေါ်လာဈေး တဟုန်ထိုးမြင့်တက်လာပြီး ဈေးကွက်အတွင်း အရောင်းအဝယ်ဈေးကွက်မဖွင့်နိုင်တော့ကြောင်းငွေကြေးဈေးကွက်အတွင်းမှသိရသည်။
FATFက ယမန်နေ့ည(အောက်တိုဘာ ၂၁) တွင်ကြေငြာပြီး နောက်ညတွင်းချင်းပင် အမေရိကန်ဒေါ်လာဈေးတရှိန်ထိုးမြင့်တက်လာပြီး တစ်ဒေါ်လာကို ကျပ် ၅၈၀၀ အထိရှိလာခဲ့လာကာ ယနေ့တွင် ဈေးကွက်မဖွင့်နိုင်ကြောင်း ငွေလဲလှယ်ရေးလုပ်ငန်း ဆောင်ရွက်နေသူအချို့ကပြောသည်။
“Black list စာရင်းက လောလောလတ်လတ် သက်ရောက်မှာတော့မဟုတ်ဘူး။ ဒါပေ့မယ့် အခုဖြစ်နေတာက ကြောက်စိတ်ဈေးကွက်ဖြစ်နေတာ။ ဒါကို စစ်ကောင်စီကလည်း ထိန်းသိမ်းနိုင်တော့မယ် မထင်ဘူး”ဟု ငွေလဲကောင်တာပိုင်ရှင်တစ်ဦးကပြောသည်။
ယနေ့ (အောက်တိုဘာ ၂၂ ရက်) နေ့လယ်ပိုင်းတွင်တစ်ဒေါ်လာကို ကျပ် ၆၃၀၀အထိ မြင့်တက်လာပြီး ဈေးကွက်သည် ကြိုက်ရောင်းကြိုက်ဝယ် ဈေးကွက်ဖြစ်နေသည်ဟုလည်း ငွေလဲလုပ်ငန်းဆောင်ရွက်နေသူများကပြောသည်။
Public Service Announcement
ယမန်နေ့(အောက်တိုဘာ ၂၂ ရက်)ကဒေါ်လာဈးမှာ၂၉၂၀ကျပ် နှင့် ရွှေဈေး ၂,၅၉၅,၀၀၀ကျပ် ဈေးပေါက်ခဲ့ရာမှ ဈေးများတဟုန်းထိုးတက်ခဲ့ခြင်းဖြစ်သည်။
ဒေါ်လာဈေးနှင့်အတူ ပြည်တွင်းရွှေဈေးမှာလည်းမြင့်တက်နေပြီး ရွှေဆိုင်အများစုက အရောင်းပိတ်ထားကာအဝယ်ကိုသာ လက်ခံတော့ကြောင်း ရွှေလုပ်ငန်းရှင်အချို့ကပြောသည်။
“အခေါက်ရွှေတစ်ကျပ်သား ၂၉သိန်းလောက်ပေါက်တယ်။ ရွှေဆိုင်တွေက ဒီဈေးကိုဖွင့်ထားပေမယ့်၊ အရောင်းအဝယ်တော့မလုပ်ဘူး”ဟု ရွှေလုပ်ငန်းရှင်တစ်ဦးကပြောသည်။
ဒေါ်လာအရောင်းအဝယ်ဈေးကွက်နှင့်ရွှေဈေးကွက်မှာယခုအခါ အရောင်းအဝယ် ကသောင်းကနင်းဖြစ်နေကြောင်းရွှေနှင့်ငွေကြေးလုပ်ငန်းဆောင်ရွက်နေသည့် လုပ်ငန်းရှင်များကပြောသည်။
