ပြင်ပဈေးကွက်တွင် ရွှေဈေး တစ်ကျပ်သားလျှင် ၂၇ သိန်းကျပ်နားကပ်လာချိန်တွင်ရန်ကုန်တိုင်းအတွင်းရှိ ရွှေဆိုင်များအားလုံး အခေါက်ရွှေတစ်ကျပ်သားလျှင် ၂,၅၃၀,၀၀၀ကျပ် သာရောင်းချရမည်ဟု ရန်ကုန်တိုင်းရွှေလုပ်ငန်းရှင်များအသင်းကထုတ်ပြန်သည်။
“ရွှေတစ်ကျပ်သားကို ကျပ် ၂၇ သိန်းကျော်အထိမရောက်ဖို့ စစ်ကောင်စီက အသင်းကတဆင့် ကြိုးစားနေတာ။နောက်ပြီးဆိုင်တွေကိုလည်း သတ်မှတ်နှုန်းအတိုင်းရောင်းချဖို့လည်း ဖိအားပေးနေတယ်”ဟု ရွှေလုပ်ငန်းရှင်တစ်ဦးကပြောသည်။
အဆိုပါအသင်းက ၂၅ သိန်းသုံးသောင်းဖြင့်သာရောင်းရန်ထုတ်ပြန်ချက်ကိုပန်ကြားလွှာဟုသုံးနှူန်းထားသည်။ အဆိုပါ ပန်ကြားလွှာကို အသင်း၏စာမျက်နှာတွင်မှတ်ချက်(Comment )ပိတ်၍ထုတ်ပြန်ထားခြင်းဖြစ်သည်။ စစ်ကောင်စီအလိုအတိုင်းလိုက်လံလုပ်ပေးနေသောကြောင့် ရန်ကုန်တိုင်းရွှေအသင်း၏ဖေစ်ဘွခ်စာမျက်နှာ(YGEA)ကို ပြည်သူများကဝေဖန်၊လှောင်ပြောင်မှုများပုံမှန်ပြုလုပ်လေ့ရှိပြီး လွန်ခဲ့သော ၆ ရက်ကစ၍ Comment ပိတ်ထားသည်ကိုတွေ့ရသည်။
စစ်ကောင်စီက ရွှေဈေးမြင့်တက်ခြင်းသည် ကုန်ဈေးနှုန်းကိုပါ လိုက်လံမြင့်တက်စေသည်ဟုဆိုကာရွှေဆိုင်များကို ၎င်းတို့သတ်မှတ်ထားသည့် နှုန်းအတိုင်းရောင်းချရန် ဖိအားပေးနေခြင်းဖြစ်သည်ဟု အထက်ပါလုပ်ငန်းရှင်ကပြောသည်။
Public Service Announcement
လက်ရှိပြင်ပဈေးကွက်တွင် အခေါက်ရွှေတစ်ကျပ်သားလျှင် ၂,၆၇၀,၀၀၀ ကျပ် နှင့် အမေရိကန် တစ်ဒေါ်လာလျှင် ၃၀၄၀ ကျပ်ပေါက်ဈေးရှိနေသည်။
“အခေါက်ရွှေဆိုရင် ၅ ကျပ်သားတောင်မရောင်းကြတော့ဘူး။ ၃ ကျပ်သားအထိရွှေထည်တွေပဲရောင်းတယ်”ဟု ယနေ့ ရွှေဝယ်ယူရန် ဆိုင်များသို့သွားရောက်စုံစမ်းခဲ့သူတစ်ဦးကလည်းပြောသည်။
ရွှေဆိုင်များကိုလည်း ရွှေဈေးနှုန်းများကိုတရားဝင်ထုတ်ပြန်ကြေညာခြင်းမပြုရန်လည်း စစ်ကောင်စီက ခြိမ်းခြောက်ထားသည်။
ရန်ကုန်တိုင်းရွှေလုပ်ငန်းရှင်များအသင်းကနေစဥ်ရည်ညွှန်းနှုန်းကိုထုတ်ပြန်ပေးနေသော်လည်း အဆိုပါနှုန်းမှာ ပြင်ပဈေးထက်များစွာနည်းနေ၍ အရောင်းအဝယ်ပြုလုပ်ရာတွင် အသုံးမပြုကြပေ။အောက်တိုဘာ ၂၉ရက် အသင်းရည်ညွှန်းနှုန်းမှာ ၁,၉၄၀,၀၀၀ကျပ်ဖြစ်သည်။
