အောက်တိုဘာ ၁၂၊၂၀၂၆။သုည/People’s Spring
ဩစတေးလျနိုင်ငံ၊ မဲလ်ဘုန်းမြို့မှာ ပြည်ပရောက်မြန်မာတွေက ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးလွတ်မြောက်ရေးနဲ့ စစ်အုပ်စုရဲ့ ပြည်သူတွေကို ပစ်မှတ်ထား ဗုံးကြဲတိုက်ခိုက်မှုတွေကို ရှုတ်ချဆန့်ကျင်တဲ့ ဆန္ဒပြပွဲ အောက်တိုဘာ ၁၁ ရက် က ပြုလုပ်ခဲ့ပါတယ်။
စစ်တပ်အာဏာသိမ်းပြီးနောက်ပိုင်း ဖမ်းဆီးထိန်းသိမ်းခံထားရတဲ့ ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသား ၂၀,၀၀၀ ကျော်ကို ပြန်လွှတ်ပေးဖို့ တောင်းဆိုဆန္ဒပြခဲ့တာ ဖြစ်ကြောင်း သြစတြေးလျရောက် မြန်မာနိုင်ငံသားတွေက ဆိုပါတယ်။
ဒါ့အပြင် ရခိုင်ပြည်နယ်၊ ကျောက်တော်မြို့အပါအဝင် မြန်မာနိုင်ငံတစ်ဝန်းမှာ စစ်အုပ်စုက ပြည်သူတွေကို ပစ်မှတ်ထား ဗုံးကြဲတိုက်ခိုက်နေတာတွေ ရှုတ်ချကန့်ကွက်ခဲ့ကြောင်းကိုလည်း ဆန္ဒထုတ်ဖော်ခဲ့ပါတယ်။
Public Service Announcement
အဲဒီဆန္ဒပြပွဲမှာ မြန်မာတက္ကသိုလ်ကျောင်းသား၊ ကျောင်းသူတွေ၊ အာဏာဖီဆန်ရေးလှုပ်ရှားမှု CDM ဝန်ထမ်းမိသားစုတွေ၊ ကရင်၊ ကယား၊ ကယန်းနဲ့ ချင်းတိုင်းရင်းသားတွေ ပါဝင်ပူးပေါင်းခဲ့ကြပါတယ်။
