က​လေးPDFတပ်ဖွဲ့ဝင်အိမ် မီးလာရှို့​သော စစ်တပ်ကိုမိုင်း​ထောင်တိုက်ခိုက် ၁၅ ဦးထက်မနည်း​သေဟုဆို

ကလေးမြို့တွင် PDFတပ်ဖွဲ့ ဝင်အိမ်ကို မီးလာရှို့သည့် စစ်ကောင်စီတပ်အား အိမ်အတွင်းမိုင်းထောင်၍ တိုက်ခိုက်ရာ စစ်ကောင်စီဘက်က ၁၅ ဦးထက်မနည်းသေဆုံးခဲ့ကြောင်း People’s Defence Force (Kalay) က သတင်းထုတ်ပြန်သည်။

ယမန်နေ့ (ဒီဇင်ဘာလ ၇ ရက်)နေ့လယ်ပိုင်းက စစ်ကောင်စီတပ်အင်အား ၅၀ထက်မနည်းသည်ကလေးမြို့ အင်ဒိုင်းကုန်းကျေးရွာမှ က​လေးPDFတပ်ရင်း(၅) မှ တပ်ဖွဲ့ဝင်နှစ်ဦး၏ အိမ်ကိုမီးရှို့စဥ် ပြည်သူ့ကာကွယ်ရေးတပ်ဖွဲ့က မိုင်းထောင် တိုက်ခိုက်ခဲ့ခြင်းဖြစ်သည်။

” အိမ်ကိုမီးလာရှို့မှာကို သိလို့ မိုင်းလေးလုံးထောင်ပြီး ခွဲပစ်တာ။ ဒီကောင်တွေက အင်အားများတယ်။ ရွာထဲကနေ လာတာတောင် လူစုခွဲလာကြတာ” ဟုက​လေး PDFမှတာဝန်ရှိသူတစ်ဦးကပြောသည်။

စစ်ကောင်စီတပ်က မီးလာရှို့မည့်သတင်းကြောင်းကိုယ့်အိမ်ကိုယ် မိုင်းထောင်ဖောက်ခွဲလိုက်သူမှာက​လေးPDFတပ်ရင်း(၅)မှ ရဲဘော်တစ်ဦး ဖြစ်သည်။

Public Service Announcement

“အင်ဒိုင်းကုန်းကျေးရွာ၌ ပြည်သူနေအိမ် ၁ လုံးကို မီးရှို့ဖျက်ဆီးအပြီး နောက် ၁ အိမ် မီးရှို့ရန် ပြင်ဆင်နေချိန်တွင် PDF(Kalay) မိုင်းတပ်ဖွဲ့မှ အသင့်တပ်ဆင်ထားသော မိုင်း (၄)လုံးဖြင့်မွန်းလွဲ ၁နာရီ ၁၀ မိနစ်အချိန်ခန့်တွင် မိုင်းခွဲတိုက်ခိုက်ခဲ့ပါသည်။ မိုင်းခွဲတိုက်ခိုက်မှုအတွင်း အကြမ်းဖက်စစ်ကောင်စီ တပ်ဖွဲ့ဝင် ၁၅ ဦးထက်မနည်း သေဆုံးခဲ့ပြီး ကျန်တပ်ဖွဲ့ဝင်များအများပြား ထိခိုက်မှုရှိသည်” ဟု က​လေးPDFကထုတ်ပြန်ထားသည်။ စစ်​ကောင်စီတပ်​သေဆုံးထိခိုက်မှုအ​ခြေအ​နေကို People’s Spring ကသီးခြားအတည်မပြုနိုင်ပါ။

မိုင်းခွဲတိုက်ခိုက်သည့် နေ​ရာအနီး၌ ဖြတ်သန်းသွားလာနေသော ပြည်သူ သုံး ဦး မိုင်းထိမှန်ခဲ့ကြောင်းသိရှိရသည့်အတွက်လည်း အနူးအညွှတ်တောင်းပန်ကြောင်းလည်း​ဖော်ပြထားသည်။

“မိုင်းထိတဲ့ ပြည်သူသုံးဦးကြီးကြီးမားမားဒဏ်ရာမရဘူးလို့ သိရတယ်” ဟုက​လေးPDFမှပြန်ကြားရေးတာဝန်ခံကပြောသည်။

ပြည်သူများအနေဖြင့်လုံခြုံရေးအထူးသတိပြု၍စစ်ကောင်စီတပ်ဖွဲ့များကို ဝေးဝေးမှ ရှောင်ရှားနေထိုင်ကြရန်လည်း က​လေးPDFက မေတ္တာရပ်ခံသည်။

က​လေးPDF မိုင်းတပ်ဖွဲ့သည် မိုင်းထုတ်လုပ်ရေး၊ ဖောက်ခွဲရေးတို့တွင် နာမည်ကြီးသည်။ ပြီးခဲ့သည့် နိုဝင်ဘာလတွင်တမူးမှ ကလေးမြို့သည့် လာသည့် စစ်ကောင်စီယာဥ်တန်းကို အထိနာအောင် တိုက်ခိုက်ရာတွင် PDF(Kalay) မိုင်းတပ်ဖွဲ့လည်း ပါဝင်ခဲ့သည်။