မြန်မာ့အရေး ကုလလုံခြုံရေးကောင်စီရဲ့ဆုံးဖြတ်ချက် ကို မြန်မာနိုင်ငံက လက်မခံနိုင်ကြောင်း စစ်ကောင်စီက ဒီနေ့ မှာတုံ့ပြန်ထုတ်ပြန်လိုက်ပါတယ်။
ဒီလို လက်မခံနိုင်ကြောင်း စစ်ကောင်စီက အကြောင်းပြရာမှာ မြန်မာနိုင်ငံအရေးဟာ ပြည်တွင်းရေးသာဖြစ်ပြီးနိုင်ငံတကာ ငြိမ်းချမ်းရေးနဲ့ လုံခြုံရေးအပေါ် ထိခိုက်သက်ရောက်မှု မရှိဘူးလို့ ဖော်ပြပါတယ်။
ဒါကြောင့် လုံခြုံရေးကောင်စီရဲ့ လုပ်ပိုင်ခွင့်ထဲ မရှိတဲ့ကိစ္စရပ်ဖြစ်တယ်လို့လည်း စစ်ကောင်စီက တုံ့ပြန်ပါတယ်။
မြန်မာ့အရေးကို ဖြေရှင်းနိုင်ဖို့ မြန်မာနိုင်ငံသာအသိဆုံးဖြစ်ပြီး ပြည်ပနိုင်ငံတွေရဲ့ဖိအားပေးကြားဝင် ဆောင်ရွက်မှုတွေဟာအောင်မြင်မှု မရဘူးလို့လည်း စစ်ကောင်စီက ဆိုထားပါသေးတယ်။
Public Service Announcement
ဖိအားပေးမှုတွေဟာ အထောက်အကူဖြစ်မှာမဟုတ်တဲ့အပြင် လက်ခံမှာလည်းမဟုတ်ဘူးလို့စစ်ကောင်စီက ကုလလုံခြုံရေးကောင်စီရဲ့ဆုံးဖြတ်ချက်အပေါ် သဘောထားထုတ်ပြန်ပါတယ်။
နိုင်ငံတကာလုံခြုံရေးနဲ့ ငြိမ်းချမ်းရေးကို တာဝန်ယူရတဲ့ ကုလသမဂ္ဂ လုံခြုံရေးကောင်စီဟာ ပြီးခဲ့တဲ့ ရက်ပိုင်းက မြန်မာ့အရေးအတွက် ဆုံးဖြတ်ချက်တစ်ရပ်ချမှတ်ခဲ့ပါတယ်။
အဲဒီဆုံးဖြတ်ချက်ထဲမှာ မြန်မာနိုင်ငံအတွင်း အကြမ်းဖက်မှုတွေရပ်တန့်ဖို့ ၊ မတရားဖမ်းထားသူတွေကိုလွှတ်ပေးဖို့ ၊ လူထုရဲ့ ဆန္ဒကိုလေးစားလိုက်နာဖို့အချက်တွေပါဝင်ပါတယ်။
လုံခြုံရေးကောင်စီဟာအရင်ကလည်း မြန်မာ့အရေးနဲ့ပတ်သက်ပြီးကြေညာချက်တွေထုတ်ပြန်ဖူးပါတယ်။
ဒီတစ်ခေါက်ကတော့ ကြေညာချက်မဟုတ်ဘဲ ကောင်စီရဲ့ ဆုံးဖြတ်ချက်ဖြစ်သွားပြီး လေးစားလိုက်နာရမယ့်အဆင့်ဖြစ်တယ်လို့ သိရပါတယ်။
ဒါပေမယ့် မလိုက်နာရင် စစ်ကောင်စီကိုဘယ်လိုအရေးယူမလဲဆိုတဲ့အဆင့်ထိတော့မပါဝင်လာသေးတာတွေ့ရတယ်လို့ NUG အစိုးရရဲ့လူ့အခွင့်အရေးဝန်ကြီး ဦးအောင်မျိုးမင်းက ပြောပါတယ်။
