အာဏာသိမ်း ၂ နှစ်တာကာလအတွင်း စစ်ကိုင်းတိုင်း ၊ မကွေးတိုင်းနဲ့ ချင်းပြည်နယ်ထဲက လဝက ရုံး စုစုပေါင်း ၉ ရုံးမီးရှို့ဖျက်ဆီးခံလိုက်ရတယ်လို့စစ်ကောင်စီဘက်ကသတင်းထုတ်ပါတယ်။
ဖျက်ဆီးခံရတဲ့ ရုံးတွေထဲမှာ စစ်ကိုင်းတိုင်းက ၄ ရုံး ၊ချင်းပြည်နယ် ၂ ရုံးနဲ့ မကွေးတိုင်း က ၃ ရုံးဖြစ်တယ်လို့ စစ်ကောင်စီက ဆိုထားပါတယ်။
စစ်ကောင်စီရဲ့စာရင်းအရ အဲဒီ ၉ ရုံးမှာ ရေစကြို ၊ မြိုင် ၊ မြင်းမူ နဲ့ ဆားလင်းကြီးရုံးတွေဟာ ၂၀၂၃ ခုနှစ် ၊ ဇန်နဝါရီလ မှာ မှ မီးရှို့ခံရတာဖြစ်ပါတယ်။
အဲဒီအချိန်ဟာ ရွေးကောက်ပွဲအတွက် စစ်ကောင်စီက လူဦးရေ မဲစာရင်းကောက်ယူနေတဲ့ ကာလလည်းဖြစ်ပါတယ်။
Public Service Announcement
စစ်ကောင်စီရဲ့ လဝက ရုံးတွေကို တော်လှန်ရေးအဖွဲ့တွေက မီးရှို့တာဖြစ်ပြီး စစ်အာဏာရှင်သက်ဆိုးရှည်မယ့် အတုအယောင်ရွေးကောက်ပွဲအတွက် မဲစာရင်းပြင်ဆင်လို့ မီးရှို့ဖျက်ဆီးတာလို့ အတိအလင်းပြောထားပါတယ်။
ဒီနှစ်ထဲကျင်းပမယ်ဆိုတဲ့ရွေးကောက်ပွဲအတွက် လူဦးရေမဲစာရင်းကို စစ်ကောင်စီဟာ ဇန်နဝါရီလ ၉ ရက်ကနေ ဇန်နဝါရီလကုန်အထိ မြေပြင်မှာ ထွေအုပ် ၊လဝက ဝန်ထမ်းတွေနဲ့ ကွင်းဆင်းကောက်ယူနေပါတယ်။
