စစ်ကိုင်းတိုင်း၊ မုံရွာမြို့ပေါ်တွင် ယမန်နေ့ညက ဓားပြတိုက်မှုတစ်ခုဖြစ်ပွားခဲ့ပြီး အိမ်ရှင်ဇနီးမောင်နှံတွင်အမျိုးသားသေဆုံးခဲ့ပြီး ၊ဇနီးဖြစ်သူမှာဒဏ်ရာများရရှိကြောင်း မြို့ခံများက ပြောသည်။
မုံရွာမြို့၊ အောင်ချမ်းသာရပ်ကွက်ရှိ နေအိမ်တစ်အိမ်အားယမန်နေ့ (ဇန်နဝါရီလ ၂၀ ရက်နေ့) ည ၁၀ နာရီခွဲခန့်ကဓားပြတိုက်ခံရခြင်းဖြစ်ပြီး သေနတ်သံများပါကြားလိုက်ရကြောင်း မြို့ခံများက ပြောသည်။ အောင်ချမ်းသာရပ်ကွက်သည် ခမရ ၁၆ အမြောက်တပ်၊ ယခင်စသုံးလုံး (အထူးစုံစမ်းစစ်ဆေးရေးဌာန) ရုံးများရှိသောရပ်ကွက်ဖြစ်ကြောင်းဒေသခံများကပြောသည်။
စစ်ကောင်စီတပ်နှင့်ရုံးများရှိသောရပ်ကွက်တွင် အတင့်ရဲစွာဓါးပြတိုက်ခြင်းဖြစ်သောကြောင့် စစ်ကောင်စီတပ်သား၊စစ်ကောင်စီတပ် နောက်လိုက်များက ကျူးလွန်ခြင်းဖြစ်နိုင်ကြောင်း ဒေသခံများကသုံးသပ်ပြောကြားနေကြသည်။
“ဓားပြတိုက်တာ စကစ နဲ့ခိုးဆိုးတွေဘဲ”ဟု ပြည်သူကာကွယ်ရေးတပ်ဖွဲ့ဝင်တစ်ဦးကလည်းပြောသည်။ ဖြစ်စဥ်ကို အသေးစိပ် စုံစမ်းနေကြောင်းလည်း PDFတပ်ဖွဲ့ဝင်အချို့ကပြောသည်။
Public Service Announcement
ဓားပြတိုက်ခံရသည့်အိမ်မှာ ကုန်စုံဆိုင်ဖွင့်လှစ်ထားပြီး လူလေးဦးက ဆိုင်ကယ်များဖြင့် ရောက်ရှိလာကာ ဓါးများကိုင်ဆောင်၍ ဓားပြတိုက်ခဲ့ကြောင်း၊ ထို့နောက် ဆိုင်ရှင်လင်မယားကိုပါ ဓားဖြင့်ခုတ်ခြင်းဖြစ်ကြောင်း ဒေသခံများကပြောသည်။
ဓားပြတိုက် ငွေတောင်းသည်ကို ဆိုင်ရှင်ဇနီးမောင်နှံကငြင်းဆန်သောကြောင့်ဟုဆိုကာ အသင့်ပါလာသည့် ဓာဖြင့်ခုတ်သွားခြင်းဖြစ်ကာ ဆိုင်ရှင်အမျိုးသား၌ လက်မောင်း၊ နောက်ကျောနှင့် ရင်ဘတ် ပြတ်ရှဒဏ်ရာများရရှိကာ သေဆုံးခဲ့ခြင်းဖြစ်သည်။ဇနီးဖြစ်သူမှာ ပါးနှင့်လက်ချောင်း ပြတ်ရှဒဏ်ရာများဖြင့် ဆေးကုသမှုခံယူနေရကြောင်း နီးစပ်သူများက ပြောသည်။
“ကောင်လေးကတော့ ဆုံးသွားပါပြီ။ကောင်မလေးကဘဏ်ဝန်ထမ်းပါ။ ကလေးငယ်လေးတစ်ယောက်နဲ့ဗျာ။”ဟု မြို့ခံတစ်ဦးက ပြောသည်။
စစ်ကောင်စီတပ်အာဏာသိမ်းပြီးနောက်ပိုင်း မြို့ကြီးများတွင် ဥပဒေမဲ့ ဓားပြတိုက်၊ လုယက်သတ်ဖြတ်မှုများ မကြာခဏဖြစ်ပွားနေသည်။
