စစ်ကိုင်းတိုင်းအထက်ပိုင်း ဟုမ္မလင်းမြို့နယ် ချင်းတွင်းမြစ်ဘေးက ရွှေပြည်အေးမြို့ကို PDF တပ်တွေ ထိန်းချုပ်လိုက်ပြီးနောက် စစ်ကောင်စီရဲ့လေကြောင်းတိုက်ခိုက်မှုတွေ ရှိလာနိုင်လို့ ဘေးလွတ်ရာကိုတိမ်းရှောင်နေရတယ်လို့ မြို့ခံတွေဆီကသိရပါတယ်။
မြို့ကို ပြန်ရဖို့အတွက် စစ်ကောင်စီဘက်က တန်ပြန်ထိုးစစ်ပြုလုပ်လာနိုင်တဲ့အတွက် နီးစပ်ရာကျေးရွာ တွေဆီ တိမ်းရှောင်နေရတယ်လို့ ဆိုပါတယ်။
ဖေဖော်ဝါရီလ ၁ ရက်က ရွှေပြည်အေးမြို့ကို ထိန်းလိုက်ပြီးနောက် တစ်ရက်အကြာမှာပဲ ဒေသခံတွေနဲ့ ဌာနဆိုင်ရာဝန်ထမ်းတွေ မြို့ကို စွန့်ခွာတာရှိတယ်လို့ ဟုမ္မလင်းမြို့နယ်ပြည်သူ့ကာကွယ်ရေးတပ်ဖွဲ့ (HPDF) က တာဝန်ခံကပြောပါတယ်။
“မြို့မှာ ဘယ်သူမှမရှိကြတော့ဘူး၊ဝန်ထမ်းတွေအားလုံးလည်း သူတို့(စစ်ကောင်စီ )ကယ်ထုတ်သွားတယ်၊ဒါကိုတော့ ကျွန်တော်တို့အနှောက်အယှက်မပေးဘူး” လို့ HPDF တာဝန်ခံကဆိုပါတယ်။
Public Service Announcement
ဒါပေမယ့် စစ်ကောင်စီရဲ့လေကြောင်းတိုက်ခိုက်မှုတွေရှိလာနိုင်လို့ ကြိုတင်ပြင်ဆင်မှုတော့လုပ်ထားပါတယ်” လို့ HPDF က တာဝန်ခံက ပြောပါတယ်။
ရွှေပြည်အေး မြို့ရဲ့ ၉၀ရာခိုင်နှုန်းကို လက်ရှိအချိန်ထိ PDFတွေ ထိန်းထားနိုင်ဆဲလို့သိရပါတယ်။
ရွှေပြည်အေးမြို့ဟာ စစ်ကောင်စီရဲ့ ချင်းတွင်းမြစ် မြစ်ကြောင်းပိုင်းထောက်ပို့လမ်းကြောင်းမှာ အဓိကကျနေတဲ့အတွက် ထိန်းချုပ်လိုက်တာဖြစ်တယ်လို့ HPDF ထံကသိရပါတယ်။
ဟုမ္မလင်းမြို့နယ်ထဲက ရွှေပြည်အေးမြို့ဟာ ယခင်စစ်အစိုးရလက်ထက် ရွာကြီး အဆင့်ကနေ မြို့သစ်တည်ပေးခဲ့တာဖြစ်ပြီး အကျယ်အဝန်း ၃.၉၆ စတုရန်းမိုင် ကျယ်ဝန်းပါတယ်။
၂၀၁၉ ခုနှစ် ထွေအုပ်ရဲ့ စာရင်းတွေအရ ရွှေပြည်အေးမြို့ဟာ လူဦးရေ ၂,၅၀၀ ကျော်နေထိုင်တယ်လို့သိရပါတယ်။
ဟုမ္မလင်းမြို့ဟာ မြေပြင်အနေအထားအရ မြို့ရဲ့အရှေ့ဘက်မှာ ကချင်ပြည်နယ် ဖားကန့် ၊မိုးညှင်း ၊အနောက်ဘက်မှာ ချင်းပြည်နယ် တမူးမြို့တို့နဲ့ထိစပ်နေတဲ့ မြို့ဖြစ်ပါတယ်။
