မန္တလေးမြို့တွင် အရပ်ဝတ် အိမ်စီးကားဖြင့် လူငယ်များလိုက်လံဖမ်းဆီးနေသည့် ထလရ(၁၆) ကင်းတဲ လက်ပစ်ဗုံးဖြင့်တိုက်ခိုက်

မန္တလေးမြို့တွင် အရပ်ဝတ်ဝတ်ဆင်ကာ အိမ်စီးကားဖြင့်လှည့်လည်ကာ လူငယ်များ လိုက်လံဖမ်းဆီးနေသည့် စစ်ကောင်စီ​၏ ထလရ(၁၆)ကင်းတဲဂိတ်ကို လက်ပစ်ဗုံးဖြင့် ပစ်ပေါက်တိုက်ခိုက်ခဲ့ကြောင်း အောင်စည်တော်စစ်ဆင်ရေး(AST-MDY)မှ တာဝန်ရှိသူတစ်ဦးက ပြောသည်။

“ထလရ(၁၆)ဂိတ်ပေါက်ကင်းကို လျက်ဆားကျွေးခဲ့တာပါ။အထိအခိုက်ရှိနိုင်ပေမယ့် Mission ပြီးတာနဲ့ လမ်းပိတ်ချလိုက်လို့ မသိရသေးဘူး” ဟု ၎င်းက ပြောသည်။

မတ်လ ၁၄ ရက် နေ့လည် ၂ နာရီကျော်တွင် အဆိုပါစစ်ဆင်ရေးကို လုပ်ဆောင်ခဲ့ခြင်းဖြစ်ပြီး ဗုံးပစ် သည့်အချိန်တွင် ကင်းတဲ၌ အကြမ်းဖက်စစ်ကောင်စီတပ်ဖွဲ့ဝင် ငါးဦးရှိကြောင်း ၎င်းက ဆိုသည်။

တိုက်ခိုက်မှုကြောင့် ဂိတ်အမိုးပွင့်ထွက်သွားခဲ့ပြီး အကြမ်းဖက်စစ်ကောင်စီဘက်မှ သေနတ်ဖြင့် ၁၀ချက်ခန့် ပစ်ခဲ့သော်လည်း အဖွဲ့သားအားလုံး ဘေးကင်းစွာဖြင့် ဆုတ်ခွာလာနိုင်ခဲ့သည်ဟု ၎င်းကပြောသည်။

Public Service Announcement

“စကစနှင့် သက်ဆိုင်သည့် မည်သည့်နေရာမဆို ကျွန်ုပ်တို့ အောင်စည်တော်စစ်ဆင်ရေး ရဲဘော် များမှ စစ်ဆင်ရေးပစ်မှတ်ထားကာ တိုက်ခိုက်မှုများကို အရှိန်အဟုန်မြှင့်လုပ်ဆောင်သွားမည်ဖြစ်ကြောင်း သတိပေးကြေညာအပ်သည်။” ဟု AST-MDY ကသတိပေးထားသည်။