တန့်ဆည်မြို့နယ်တွင် စစ်ကောင်စီတပ်များသည် ပြည်သူ့ယာဥ်များအား အသုံးပြုကာ အကြမ်းဖက်နေသောကြောင့် ပြည်သူများသတိပြုရမည့်အချက်များအား တန့်ဆည်မြို့နယ် ပြည်သူ့ကာကွယ်ရေးတပ်မတော်( Taze People Defence Force )က အသိပေးကြေညာထားသည်။
အကြမ်းဖက်စစ်ကောင်စီတပ်များသည် ပြည်သူတို့ထံမှ သိမ်းဆည်းထားသော အိမ်စီးကားများ၊ ကုန်တင်ကားများ၊ ဆိုင်ကယ်များကို အသုံးပြု၍ မြို့နယ်အတွင်း မြို့ ရွာများသို့ သွားလာခြင်း၊ အကြမ်းဖက် ပစ်ခတ်ခြင်း၊ မီးရှို့ဖျက်ဆီးခြင်းများကို ပိုမိုလုပ် ဆောင်လာကြောင်း၊ ပြည်သူနှင့် အကြမ်းဖက်စစ်ကောင်စီတပ် ခွဲခြားသိရန် လိုအပ်လာကြောင်း၊ ပြည်သူများထိခိုက်မည်ကို စိုးရိမ်ပါသဖြင့် ပြည်သူများအနေဖြင့် ညနေ ၆ နာရီမှ နောက်တစ်နေ့ နံနက် ၄ နာရီအထိ ရေဦး-တန့်ဆည်-ကလေးဝလမ်း၊ ရေဦး-တမာတော-ကံထူးမလမ်းတို့၌ ခရီးသွားလာခြင်းမပြုရန်၊ ရပ်ရွာအတွင်း သွားလာရာ၌ ကားကိုမှန်ချ မောင်းနှင်ကြရန်၊ စစ်ကောင်စီယာဥ်တန်းနှင့် ကပ်လျက်လိုက်ပါခြင်းမပြုရန် တန့်ဆည်PDFက ယနေ့ (စက်တင်ဘာ ၂၇ ရက်)တွင် သိပေးကြေညာထားသည်။
တန့်ဆည်မြို့ပေါ်တွင် စစ်ကောင်စီတပ်များသည် နေ့စဥ် ရွေ့လျားစစ်ဆေးနေပြီး အထူးသဖြင့် လူငယ်များအား ပိုမိုစစ်ဆေးနေကြောင်း၊ ကားအတွင်း၊ ဆိုင်ကယ်တူးဘောက်စ်အတွင်းနှင့် ဖုန်းများပါမကျန် တင်းကျပ်စွာ စစ်ဆေးနေသည်ဟု တန့်ဆည် ဒေသခံများက ပြောသည်။
စက်တင်ဘာလ ၂၃ ရက်နှင့် ၂၄ ရက်များတွင် စစ်ကောင်စီတပ်များသည် တန့်ဆည်မြို့နယ်ရှိ ကျီကုန်းရွာကို နှစ်ကြိမ်တိုင်ဝင်ရောက်ကာ မီးရှိူ့ဖျက်ဆီးခဲ့ပြီး အိမ် ၁၅လုံးထက်မနည်း ပျက်စီးသွားခဲ့ကြောင်း ဒေသခံများက ပြောသည်။
Public Service Announcement
