နွေဦးတော်လှန်ရေးဖြင့် စစ်အာဏာရှင်စနစ် နိဂုံးချုပ်မည်ဖြစ်ပြီး ပြည်သူ့အင်အားကို စစ်အာဏာရှင်များ အနိုင်မယူနိုင်ဘူးဆိုသည်ကို သက်သေပြရမည်ဟု အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ဒုတိယဝန်ကြီး နိုင်ကောင်းရွက်က ပြောကြားသည်။
ပြည်သူ့ကာကွယ်ရေးအဖွဲ့(ပ.က.ဖ)များဖွဲ့စည်းခြင်း (၂)နှစ်ပြည့်သို့ ပေးပို့သော ဒုဝန်ကြီး၏ သတင်းစား၌ အထက်ပါအတိုင်း ပြောကြားခဲ့ခြင်းဖြစ်သည်။
“ဒီနွေဦးတော်လှန်ရေးနဲ့ပဲ ငါတို့မြေပေါ်မှာ စစ်အာဏာရှင်စနစ်ကို နိဂုံးချုပ်မယ်။ စစ်အာဏာရှင် အောက်မှာ ငါတို့မျိုးဆက်သစ်တွေ အတိမ်မြုပ်မခံနိုင်သလို ငါတို့မြေ ပေါ်မှာလဲ စစ်အာဏာရှင်စနစ် ရှင်သန်ခွင့်ပြုမှာမဟုတ်ဘူး။ ဒါကြောင့် နွေဦးတော်လှန်ရေးဟာ စစ်အာဏာရှင်စနစ်ကို အမြစ်ဖြတ်မယ့် အဆုံးသတ် တိုက်ပွဲဖြစ်တယ်”ဟု ဒုဝန်ကြီးက ပြောသည်။
နွေဦးတော်လှန်ရေးသည် ပြည်သူ့တော်လှန်ရေးဖြစ်၍ နိုင်ကိုနိုင်ရမည်ဖြစ်ကြောင်း ၎င်းက ဆိုသည်။
Public Service Announcement
“ပြည်သူကို ငါတို့သစ္စာခံတယ်။ အနိုင်ရသည်အထိတော်လှန်သွားမယ်။ စစ်မိစ္ဆာသည် ပြည်သူ့ အင်အားကို မနိုင်ဘူးဆိုတာကို ငါတို့သက်သေပြမယ်”ဟု ဒုဝန်ကြီး နိုင်ကောင်းရွက်က ပြောသည်။
နိုင်ငံ၌ စစ်အာဏာရှင်စနစ်ရှိနေသ၍ နွေဦးတော် လှန်ရေးသည် ဆက်လက်ရှင်သန်နေပြီး ဆက်လက် တော်လှန်နေမည်ဖြစ်ကြောင်း၊ နွေဦးတော်လှန်ရေး၏ အဆုံးသတ်သည် ပန်းတိုင်ဖြစ်ကြောင်း ၎င်း ကဆိုသည်။
“အသက်၊ သွေး၊ ချွေးနဲ့ရင်းပြီး အနာဂတ်ဖက်ဒရယ် ပြည်ထောင်စုကို တည်ဆောက်ကြမယ်။ နွေဦးတော်လှန်ရေး အောင်မှဖြစ်မယ်။ ငါတို့ဟာ စစ်မိစ္ဆာကို ချေမှုန်းဖို့ တော်လှန်ခဲ့တာဖြစ်လို့ စစ်ဖိနပ်အောက်တော့ ပြန်သွားမှာမဟုတ်ဘူး။ ခြေလှမ်းဦးတည်ရာ ပြန်လှည့်မှာမဟုတ်ဘဲ အဆုံးထိ ရောက်အောင် ဆက်လျှောက်မယ်။ ဒီနွေဦးတော်လှန်ရေးနဲ့ပဲ ငါတို့မြေပေါ်မှာ စစ်အာဏာရှင်စနစ်ကို နိဂုံးချုပ်မယ်။ စစ်အာဏာရှင်အောက်မှာ ငါတို့မျိုးဆက်သစ်တွေ အတိမ်မြုပ်မခံနိုင်သလို ငါတို့မြေ ပေါ်မှာလဲ စစ်အာဏာရှင်စနစ် ရှင်သန်ခွင့်ပြုမှာမဟုတ်ဘူး”ဟု ဒုဝန်ကြီးက ပြောသည်။
ပြည်သူ့ကာကွယ်ရေးအဖွဲ့(ပ.က.ဖ)များကို မြို့နယ် အလိုက်ကျေးရွာအလိုက်ဖွဲ့စည်းပြီး စစ်ကောင်စီကို တော်လှန်တိုက်ခိုက်လျက်ရှိသည်။ ထိုသို့ တိုက်ခိုက်ရာတွင် ပြည်သူ့ကာကွယ်ရေးတပ်မတော်(PDF)၊ တိုင်းရင်းသားတော်လှန်ရေးအင်အားစုများ၊ ဒေသကာကွယ်ရေးတပ်ဖွဲ့များ နှင့် လက်တွဲဆောင်ရွက်လျက်ရှိသည်။
NUG ကာကွယ်ရေးဝန်ကြီးဌာန အနေဖြင့် နှစ်နှစ်ကျော်ကာလအတွင်း PDF တပ်ရင်းနှင့် စစ်ကြောင်း ၃၀၀ ကျော်ဖွဲ့စည်းထားနိုင်သကဲ့သို့ မြို့နယ်ပေါင်း ၂၅၀ ကျော်တွင် ရပ်ရွာအခြေပြု ပကဖ အဖွဲ့များ တည်ထောင်ထားသည်။
“လူအင်အားအရ ကျနော်တို့ရဲ့ တိုက်ခိုက်ရေးအင်အားဟာ ရန်သူ့(စစ်ကောင်စီတပ်)ထက် သာလွန်အင်အားဖြစ်အောင် စုဖွဲ့တည်ထောင်နိုင်ခဲ့ပြီလို့ ဆိုနိုင်ပါတယ်”ဟု ယာယီသမ္မတ ဒူဝါလရှီးလက မေလအတွင်းက အသိပေးပြောကြားထားသည်။
