အိမ်နီးချင်းနိုင်ငံများနဲ့ ဆက်ဆံရေး၊ နယ်စပ်ဒေသလုံခြုံရေးဆိုင်ရာကြေညာချက်ကို NUG ထုတ်ပြန်

အမျိုးသားညီညွတ်ရေးအစိုးရ(NUG)ဟာ မြန်မာ့ပိုင်နက်နယ်မြေအတွင်းကနေ အိမ်နီးချင်းနိုင်ငံတွေရဲ့ အမျိုးသားလုံခြုံရေးကို ခြိမ်းခြောက်တဲ့အဖွဲ့အစည်းတွေကို လက်ခံခွင့်ပြုမှာမဟုတ်ဘူးလို့ ကြေညာလိုက်ပါတယ်။

NUGရဲ့ အိမ်နီးချင်းနိုင်ငံများနဲ့ ဆက်ဆံရေးနဲ့ နယ်စပ်ဒေသလုံခြုံရေးဆိုင်ရာ ကြေညာချက်ကို ဒီကနေ့ (အောက်တိုဘာ ၁၄)ရက်စွဲနဲ့ ထုတ်ပြန်ခဲ့ပါတယ်။

NUGဟာ ပြည်သူလူထုကို ဗဟိုပြုပြီး ဖက်ဒရယ်ဒီမိုကရက်တစ်ပြည်ထောင်စုဆီဦးတည်တဲ့ စံနှုန်းတွေနဲ့အတူ လွတ်လပ်ပြီးတက်ကြွတဲ့နိုင်ငံခြားရေးမူဝါဒကို လိုက်နာကျင့်သုံးတယ်လို့ ဆိုပါတယ်။

အထူးသဖြင့် မြန်မာ့အိမ်နီးချင်းနိုင်ငံတွေနဲ့ နှစ်နိုင်ငံအကျိုးစီးပွားတွေမြှင့်တင်ရာမှာ နီးကပ်စွာပူးပေါင်းဆောင်ရွက်ရေး မိတ်ဆွေရင်းဆက်ဆံရေးတွေကို ထိန်းသိမ်းမယ်လို့ NUGက ကတိပြုပါတယ်။

Public Service Announcement

ဒါပေမဲ့ ပြည်ပနိုင်ငံလက်နက်ကိုင်မဟုတ်တဲ့အဖွဲ့အစည်းအချို့ဟာ အကြမ်းဖက်စစ်ကောင်စီကို ကူညီဖို့ မြန်မာပိုင်နက်နယ်မြေအတွင်းမှာ အခြေချနေတာကို သတိပြုမိကြောင်းနဲ့ ပြည်သူ့ကာ ကွယ်ရေးတပ်ဖွဲ့(PDF)တွေကို တိုက်ခိုက်ဖို့ စစ်ကောင်စီက အဲဒီအဖွဲ့အစည်းတွေကို အသုံးချကာ အားသာချက်ယူနေကြောင်း NUG က ထုတ်ပြန်ပါတယ်။

NUG ဟာ တာဝန်ခံမှုရှိတဲ့ဒေသတွင်း မိတ်ဖက်အနေနဲ့ နယ်စပ်ဒေသ တည်ငြိမ်ရေးနဲ့လုံခြုံရေးကို ဆက်လက်ထိန်းသိမ်းဖို့ နယ်စပ်ဖြတ်ကျော်ယန္တရားတွေ၊ မူဝါဒတွေနဲ့ အခြေခံအဆောက်အဦတွေကို မြှင့်တင်လုပ်ဆောင်ဖို့ အိမ်နီးချင်းနိုင်ငံတွေကို ကတိကဝတ်ပြုတယ်လို့ ထပ်လောင်း ကြေညာပါတယ်။