သပိတ်ကျင်းမြို့အား သြဂုတ် ၂၅ ရက်တွင် အပြီးသတ်သိမ်းပိုက်နိုင်ခဲ့ပြီဖြစ်ကြောင်း အမှတ် (၁) စစ်ဒေသကထုတ်ပြန်လိုက်သည်။
သပိတ်ကျင်းမြို့အား ဩဂုတ်လ ၁၇ ရက်နေ့မှ စတင်တိုက်ခိုက်ခဲ့ခြင်းဖြစ်ပြီး ဩဂုတ်လ (၁၉) ရက်နေ့တွင် မြို့အား တိုက်ခိုက် သိမ်းပိုက်နိုင်သော်လည်း စစ်ကောင်စီအဖွဲ့ဝင်များ မြို့ဦးတောင်စေတီသို့ ဆုတ်ခွာသွားသဖြင့် ဆက်လက် တိုက်ခိုက်ခဲ့ကြခြင်းဖြစ်ပြီးဩဂုတ်လ (၂၅) ရက်နေ့ နံနက်ပိုင်းတွင် အောင်မြင်စွာ တိုက်ခိုက် သိမ်းပိုက်နိုင်ခဲ့ကြောင်းအသိပေးသည်။
ပြင်ဦးလွင်ခရိုင်၊ သပိတ်ကျင်းမြို့တွင် သနတ-၁၊ စခတ-၂၊ တတက-၁၃၊ ရဲ၊ ပျူစောထီး ပူးပေါင်းအင်အား (၁၃၀) ခန့်အား ပြင်ဦးလွင်ခရိုင် ကွပ်ကဲရေးရုံး ကွပ်ကဲမှုဖြင့် ပြင်ဦးလွင်ခရိုင် တပ်ရင်း (၁၊ ၂)၊ အမှတ် (၅၀၉၊ ၅၁၀၊ ၅၁၂) တပ်ရင်း၊ မန္တလေးခရိုင် တပ်ရင်း-၅၊ မန္တလေးတိုင်း ဒရုန်းတပ်ဖွဲ့၊ အမှတ် (၁) ရွှေဘိုခရိုင် ကွပ်ကဲရေးရုံး ဒရုန်းတပ်ဖွဲ့၊ ကန့်ဘလူခရိုင် W-89 တပ်ဖွဲ့၊ ကန့်ဘလူခရိုင် ပကဖ AA Gun တပ်ဖွဲ့၊ သပိတ်ကျင်းမြို့နယ် ပကဖ ပူးပေါင်းတပ်ဖွဲ့က တိုက်ခိုက်သိမ်းပိုက်ခဲ့ခြင်းဖြစ်သည်။
Public Service Announcement
တိုက်ပွဲဖြစ်ပွားနေစဉ် စစ်ကောင်စီဘက်မှ ဂျက်တိုက်လေယာဉ်ဖြင့် ဗုံးသီးအလုံး (၇၀) ကျော် ကြဲချ တိုက်ခိုက်ပြီး Y-12 ဖြင့် ဗုံးသီး (၁၅၀) ကျော် ကြဲချတိုက်ခိုက်၍ Mi-35 (၂) စီးဖြင့် ပစ်ခတ် တိုက်ခိုက်ခဲ့သည်။
စစ်ကောင်စီဘက်မှ ဒု-ဗိုလ်မှူးကြီး စိုးမင်းသူ အား ဖမ်းဆီးရမိပြီး လက်နက်မျိုးစုံ (၆၈) လက်၊ ကျည်မျိုးစုံ (၁၈၆၆၉) တောင့်၊ ဗုံးသီးမျိုးစုံ (၄၂) လုံး၊ RPG ဒုံးသီး (၃၆) လုံး၊ Jammer (၃) လုံး၊ ဆက်သွယ်ရေးစက် (၁) ခုနှင့် အခြားလူသုံးကုန် စက်ပစ္စည်းအချို့ သိမ်းဆည်းရရှိခဲ့သည်။
မြို့သိမ်းတိုက်ပွဲတွင် ရဲဘော် (၄) ဦး မြင့်မြတ်စွာ ကျဆုံးခဲ့ကြောင်းလည်းအသိပေးထားသည်။
သပိတ်ကျင်းမြို့နယ် သည် မန္တလေးတိုင်း၊စစ်ကိုင်းတိုင်းနှင့် ကချင်ပြည်နယ်တို့ကို ချိတ်ဆက်နိုင်သဖြင့် စစ်ရေးအရရော ၊လမ်းပန်းဆက်သွယ်ရေးအရ အရေးပါသောဒေသဖြစ်သည်။ ရွှေထွက်သောဒေသဖြစ်ပြီး စစ်တပ်လက်ဝါးကြီးအုပ်ထားသော ရွှေလုပ်ကွက်များစွာရှိသောဒေသဖြစ်သည်။
သပိတ်ကျင်းမြို့အားသိမ်းပိုက်နိုင်ပြီဖြစ်သောကြောင့်တော်လှန်ရေးတပ်များသိမ်းပိုက်သောမြို့ ၈၀ နီးပါးရှိလာပြီဖြစ်သည်။
တချိန်တည်းတွင် ပင်လယ်ဘူး၊ ထီးချိုင့် ၊အင်းတော်မြို့များရှိ စစ်တပ်စခန်းများကိုလည်း PDFနှင့် ပူးပေါင်းတပ်များက မြို့သိမ်းတိုက်ပွဲများတင်နွှဲနေပြီး စခန်းအများအပြားကိုသိမ်းပိုက်ထားပြီဖြစ်သည်။
(သပိတ်ကျင်းမြို့သိမ်းပြီးနောက်PDF နှင့်ပူးပေါင်းတပ်များ ၊ သိမ်းဆည်းရရှိသောလက်နက်ခဲယမ်းများ။ ဓါတ်ပုံ-အမှတ်(၁)စစ်ဒေသ )
