ကျော်ဇော/People’s Spring
တနင်္သာရီမြို့နယ်၊ ကော့မပြင်းကျေးရွာမှ သဲ၊ ကျောက်တူးဖော်ရေးလှေပေါ်ပါ အလုပ် သမားကိုးဦးကို အကြောင်းမဲ ဖမ်းဆီးခေါ်ဆောင်သွားကြောင်း ဒေသခံများက လူထုနွေဦးသို့ ပြောသည်။
ကော့မပြင်းကျေးရွာမှ လှေလုပ်သားလူငယ်ကိုးဦးသည် လှေသုံးစင်းဖြင့် စစ်ကောင်စီတပ်သားများရောက်ရှိနေသော လှေဆိပ်ရှေ့သို့ ဖြတ်မောင်းစဥ် ၎င်းတို့က တားဆီး၍ ကမ်းကပ်ခိုင်းကာ ခမရ – ၅၅၇တပ်ရင်းသို့ သြဂုတ် ၃၁ ရက်နေ့လယ် ၃ နာရီခန့်တွင် ဖမ်းဆီးခေါ်ဆောင်သွားခြင်း ဖြစ်သည်။
Public Service Announcement
“လှေက သုံးစီး၊ သဲကျောက်လှေပါ။ လှေပေါ်မှာ လှေလုပ်သားတွေပဲပါတယ်။ ပိုင်ရှင်က ဘိတ် (မြိတ်)က။ လူငယ်တွေချည်းပဲ အားလုံးကိုးယောက်”ဟု စစ်ကောင်စီတပ်က ဖမ်းဆီးသွားသည့် လှေလုပ်သားများနှင့်စပ်လျဥ်းပြီး ဒေသခံတစ်ဦးက ပြောသည်။
ဖမ်းဆီးခံလိုက်ရသော လှေလုပ်သားများအား ပြန်လည်ထုတ်ယူရန် ၎င်းတို့၏သူဌေး(လှေပိုင်ရှင်)မှ ခမရ – ၅၇၇တပ်ရင်းသို့ သွားရောက်စုံစမ်းခဲ့သော်လည်း တွေ့ခွင့်မပေးဘဲ ပြန်လွှတ်လိုက်ကြောင်း ဒေသခံများထံမှ စုံစမ်းသိရသည်။
ပြီးခဲ့သည့် ဇွန်လအတွင်းကလည်း အထက်ပါကဲ့သို့ လှေလုပ်သားအချို့ ဖမ်းဆီးခံရမှုရှိခဲ့ပြီး စစ်ကောင်စီတပ်ထံ လုပ်သားတစ်ဦးလျှင် ကျပ်ငါးသိန်းဆီပေး၍ ပြန်လည်ထုတ်ယူ၍ရခဲ့သော်လည်း ယခုတစ်ကြိမ်ဖမ်းဆီးမှုဖြစ်စဥ်မှာ ငွေပေးထုတ်၍မရသောကြောင့် တစ်သားသစ်အဖြစ် ပေါ်တာဆွဲခြင်းဖြစ်နိုင်ကြောင်း ထင်ကြေးပေးမှုများလည်း ရှိနေသည်။
တနင်္သာရီမြို့နယ်တွင် ပြီးခဲ့သည့် သြဂုတ်လနှောင်းပိုင်းက ၆ မိုင်ကျေးရွာအနီး၌ စစ်ကောင်စီတပ်နှင့် တော်လှန်ရေးတပ်ဖွဲ့များကြား (၄)ရက်ဆက် တိုက်ပွဲဖြစ်ထားပြီး စစ်ကောင်စီဘက်မှ အရာရှိအပါအဝင် ခုနစ်ဦးသေဆုံးကာ လက်နက်ခဲယမ်းအချို့ကိုပါ တော်လှန်ရေးတပ်ဖွဲ့များက သိမ်းဆည်းရရှိခဲ့သည်။
သို့ဖြစ်ရာ စစ်ကောင်စီတပ်ဘက်မှ အင်အားထပ်မံဖြည့်တင်းမည်ဟု မြို့နယ်တွင်း သ တင်းများထွက်နေပြီး စစ်တပ်စခန်းအချို့မှနေ၍ ဘန်လောကျေးရွာအပါအဝင် ကျေးရာအချို့သို့ လက်နက်ကြီးရမ်းသမ်းပစ်ခတ်မှုများ ရှိနေသည်။
