ရန်ကုန်တိုင်း စမ်းချောင်းမြို့နယ်ရှိ မြေနီကုန်းခုံးတံတားအောက် ရိုးမဘဏ်အနီးတွင် ယနေ့(အောက်တိုဘာ၂၀) ညနေ ၄ နာရီခန့်က ဗုံးပေါက်ကွဲမှု ဖြစ်ပွားခဲ့ကြောင်း ဒေသခံများက ပြောသည်။
“ခုံးတံတားအောက်မှာ ဗုံးပေါက်တာ ဆိုပေမယ့် တံတားအောက် တည့်တည့်မဟုတ်ဘဲ တံတားဘေးက ရိုးမဘဏ်နားမှာ ပေါက်တာပါ။ တံတားအောက်မှာဆို ပုံမှန်ကလေးတွေ ထိုင်နားကြတာမျိုး ရှိတတ်တယ်။ အခုက တစ်ဖက်ခြမ်းမှာ ပေါက်လို့ လူထိခိုက်တာမျိုး ရှိတာ မတွေ့ခဲ့ရပါဘူး။ ကားတစ်စီးတော့ နည်းနည်းထိသွားတာ တွေ့လိုက်ပါတယ် “ဟု မျက်မြင်တွေ့ရှိသူတစ်ဦးက ပြောသည်။
ဗုံးပေါက်မှု ဖြစ်ပွားပြီးနောက် စစ်ကောင်စီတပ်ဖွဲ့ဝင်များသည် မြေနီကုန်း မီးပွိုင့်အနီး ပြည်လမ်းတစ်လျောက် စစ်ဆေးမှုများ တင်းကြပ်နေကြောင်း ရပ်ကွက်နေပြည်သူများက ပြောသည်။
